មន្ត្រីគណបក្សសង្គ្រោះជាតិ បដិសេធចំពោះការចោទប្រកាន់ដែលថា មន្ត្រីគណបក្សនេះរៀបចំឲ្យមានមនុស្សរំខាន និងរារាំងដល់ការតវ៉ារបស់ អ្នកស្រី ឡាក់ សុភាព អតីតសមាជិកគណៈកម្មាធិការនាយក ដែលត្រូវបក្សបណ្ដេញចេញ។
ការបដិសេធនេះ ធ្វើឡើងដោយសមាជិកគណៈកម្មាធិការវិន័យរបស់គណបក្សសង្គ្រោះជាតិ គឺលោក ហូរ វ៉ាន់ បន្ទាប់ពី អ្នកស្រី ឡាក់ សុភាព ចោទប្រកាន់ថា ហ្វូងមនុស្សមួយចំនួនដែលរំខានការតវ៉ារបស់អ្នកស្រី នាមុខទីស្នាក់ការគណបក្ស នៅព្រឹកថ្ងៃទី១ មករា រៀបចំដោយគណបក្សសង្គ្រោះជាតិ៖ «ទៅរៀបចំអី ព្រោះគាត់នៅជាមួយយើង យើងស្គាល់មនុស្សហ្នឹងច្បាស់ ហើយគេដឹងឥទ្ធិពលគាត់កម្រិតណា ហើយបើគាត់ធ្វើ កម្លាំងហ្នឹងគេគិតថាខ្លួនគាត់ហ្នឹងមិនមានកម្លាំងអីទេ។ ដូច្នេះ ចំពោះគាត់ គេយល់គេស្គាល់ច្បាស់ ព្រោះមនុស្សធ្លាប់នៅជាមួយគ្នាច្រើនឆ្នាំហើយ»។
អ្នកស្រី ឡាក់ សុភាព អតីតសមាជិកគណៈកម្មាធិការនាយកនៃគណបក្សសង្គ្រោះជាតិ ចាត់ទុកថា ការបណ្ដេញអ្នកស្រីចេញពីគណបក្ស គឺមានភាពអយុត្តិធម៌។ អ្នកស្រីថ្លែងថា ការតវ៉ារបស់អ្នកស្រី គឺចង់កែលម្អឲ្យគណបក្សសង្គ្រោះជាតិ អនុវត្តទៅតាមច្បាប់ ដើម្បីធ្វើជាគំរូល្អកុំឲ្យមានបក្ខពួក និងគ្រួសារនិយមនៅផ្ទៃក្នុងបក្ស ជាពិសេស គឺសមាជិកគណៈកម្មាធិការអចិន្ត្រៃយ៍របស់បក្ស។ ការតវ៉ារបស់អ្នកស្រីនៅព្រឹកថ្ងៃទី១ មករា មានស្រែករំខាន ដូចជា ស្រែកទារលុយពីអ្នកស្រីថា ជំពាក់ថ្លៃកាហ្វេ ជាដើម។ អ្នកស្រីថ្លែងថា មិនបានជំពាក់អ្វីទេ ហើយអ្នកស្រីសន្យាថានឹងតវ៉ាម្ដងទៀតនៅពេលណាមួយខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។