សកម្មជនគណបក្សសង្គ្រោះជាតិ នៅសង្កាត់បន្សាយរាក់ ក្រុងសំរោង កំពុងទាមទារឲ្យសមត្ថកិច្ច និងអាជ្ញាធរខេត្តឧត្តរមានជ័យ ចាត់វិធានការផ្លូវច្បាប់ទៅលើមេភូមិ ២រូប ដែលគេស្គាល់មុខ និងជាជនដៃដល់ក្នុងការបំផ្លាញស្លាកសញ្ញាគណបក្សសង្គ្រោះជាតិ ចំនួនពីរផ្ទាំង។
សកម្មជននៃគណបក្សសង្គ្រោះជាតិ ប្រចាំសង្កាត់បន្សាយរាក់ គឺលោក ម៉ក់ វ៉ាន់វុទ្ធី។ លោកមានប្រសាសន៍កាលពីរសៀលថ្ងៃពុធ ទី១ ខែមិថុនា ដោយទាមទារឲ្យសមត្ថកិច្ច និងអាជ្ញាធរក្រុងសំរោង ចាត់វិធានការផ្លូវច្បាប់ប្រឆាំងទៅលើមេភូមិអូរបាត់ដាវ ឈ្មោះ ភួង ភឿន និងមេភូមិត្រពាំងត្រាវ ឈ្មោះ ម៉ោន គឹមយ៉ាន។ លោកចោទប្រកាន់មេភូមិទាំងពីរនេះ ថាជាជនដៃដល់ក្នុងការបំផ្លាញស្លាកគណបក្សសង្គ្រោះជាតិ ចំនួនពីរផ្ទាំង ដែលទើបតែដាក់នៅតាមដងផ្លូវ៖ « កាលពីថ្ងៃអាទិត្យ ខ្ញុំ បានលើក ស្លាកសញ្ញាគណបក្សសង្គ្រោះជាតិ។ តែគណបក្សប្រជាជនកម្ពុជា លោកចៅសង្កាត់បន្សាយរាក់ បានបញ្ជាឲ្យមេភូមិ អូរបាត់ដាវ និងមេភូមិ ត្រពាំងត្រាវ ទម្លាក់ស្លាកនោះ »។
កាលពីអំឡុងខែកញ្ញា ឆ្នាំ២០១៥ កន្លងទៅ ស្លាកគណបក្សសង្គ្រោះជាតិ ១ផ្ទាំង នៅភូមិសំបួរ នៃសង្កាត់បន្សាយរាក់ ដែរ ត្រូវគេដុតបំផ្លាញ ហើយគណបក្សសង្គ្រោះជាតិ បានប្ដឹងទៅប៉ូលិសប៉ុស្តិ៍ ប៉ុន្តែសមត្ថកិច្ចមិនបានខ្នះខ្នែង និងចាត់វិធានការផ្លូវច្បាប់ជុំវិញរឿងនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។