អ្នកគាំទ្រគណបក្សសង្គ្រោះជាតិ មកពីខេត្តសៀមរាបជាង ៥០នាក់ ប្រមូលផ្ដុំគ្នាតវ៉ានៅមុខទីស្នាក់ការកណ្ដាល នៅសង្កាត់ចាក់អង្រែលើ រាជធានីភ្នំពេញ នៅព្រឹកថ្ងៃទី២ មីនា ដើម្បីទាមទារឲ្យប្រធានបក្សផ្លាស់ប្ដូរប្រធានក្រុមការងារគណបក្សប្រចាំខេត្តនេះ។
ក្រុមអ្នកតវ៉ាបានស្រែកនៅមុខទីស្នាក់ការធំរបស់គណបក្សនៅសង្កាត់ចាក់អង្រែលើ រាជធានីភ្នំពេញ ទាមទារឲ្យផ្លាស់ប្ដូរប្រធានក្រុមការងារគណបក្សប្រចាំខេត្តសៀមរាប គឺអ្នកស្រី កែ សុវណ្ណរតន៍ ចេញពីខេត្តនេះ។
អ្នកតវ៉ាមួយរូបដែលជាចៅសង្កាត់រងសាលាកម្រើក ក្រុងសៀមរាប គឺលោក សាន ណៃ ថ្លែងថា ការដឹកនាំរបស់អ្នកស្រី កែ សុវណ្ណរតន៍ នៅខេត្តសៀមរាប មិនដូចជាអ្នកដឹកនាំទេ គឺដូចជាថៅកែ និងគូលី៖ «ចង់ដូរនរណា ចង់ដាក់អ្នកណាស្រេចតែគាត់ ហើយគាត់នៅយូរវាដុះស្លែ បក្សពួក។ គេចោទថា សុទ្ធតែគណបក្សប្រជាជនឱ្យលុយហើយបានមកនេះ។ រៃគ្នាទម្រាំបានមួយឡាន ហើយអ្នកចង់មកអត់មានលុយជិះឡាន ទុកចោល។ បើថាឱ្យទៅសៀមរាប ចង់បានប៉ុន្មានឡានក៏បានដែរ»។
អ្នកតវ៉ាបញ្ជាក់ថា ពួកគាត់មិនទាមទារឱ្យទម្លាក់ឋានៈ និងមុខងារ អ្នកស្រី កែ សុវណ្ណរតន៍ ទេ ប៉ុន្តែទាមទារឲ្យដូរចេញពីប្រធានក្រុមខេត្តសៀមរាប ហើយដាក់អ្នកថ្មីជំនួស ទោះជានរណាក៏ដោយ។ ពួកគាត់ចោទថា អ្នកស្រីដឹកនាំក្រុមការងារបក្សនៅខេត្តនេះរយៈពេលជាង ៣អាណត្តិមកហើយ ដោយមិនសូវបានរីកចម្រើនទេ ហើយបង្កើតឱ្យមានបញ្ហាផ្ទៃក្នុងផង។ ម្យ៉ាងពួកគាត់មិនចង់ឱ្យអ្នកស្រីកាន់នៅខេត្តនេះយូរទេ ដើម្បីកុំឱ្យដូចគណបក្សប្រជាជនកម្ពុជា៖ «ព្រោះគាត់ដឹកនាំដដែលៗ។ រឿងមួយចំនួនអត់បង្ហាញជូនទេ។ ប៉ុន្តែអាហ្នឹងផ្ទៃក្នុងគណបក្សធ្វើសេចក្ដីសម្រេច។ ការចាយវាយមិនតម្លាភាពមួយចំនួន»។
បដិសេធទៅនឹងការចោទប្រកាន់របស់អ្នកតវ៉ា ប្រធានក្រុមការងារ និងជាតំណាងរាស្ត្រគណបក្សសង្គ្រោះជាតិ មណ្ឌលសៀមរាប គឺអ្នកស្រី កែ សុវណ្ណរតន៍ មានប្រសាសន៍បន្ថែមថា អ្នកស្រីគ្មានអំណាចធ្វើអ្វីៗ ស្រេចតែចិត្ត ដែលមិនបានដឹងឮពីសមាជិកថ្នាក់ក្រោម និងថ្នាក់លើរបស់បក្សទេ៖ «ពាក្យពុករលួយ ចាយគ្មានតម្លាភាពហ្នឹង យកមកប្រើកន្លែងនេះ ដូចជាមិនត្រូវ។ ខ្ញុំគ្មានបងប្អូនឯណាទេ មានតែសមាជិកសមាជិកាហ្នឹងជាបងប្អូន។ អ្វីដែលយើងផ្ដល់ឱ្យទាំងអស់គ្នា មានការឯកភាព។ សេចក្ដីសម្រេចនៅក្នុងគណបក្សនេះ អត់មានសម្រេចដោយបុគ្គលទេ គឺសម្រេចដោយរចនាសម្ព័ន្ធ ដែលមានចែងនៅក្នុងច្បាប់។ រាល់សេចក្ដីសម្រេចទាំងអស់ត្រូវដាក់នៅលើតុជជែកគ្នា។ ខ្ញុំដូចជាគ្មានអំណាចអ្វី ធ្វើសេចក្ដីសម្រេចម្នាក់ឯងបានទេ។ ខ្ញុំជាស្ត្រីម្នាក់ដែលទន់ខ្សោយ សម្រេចអីក៏ធំម្ល៉េះ!»។
ទោះជាយ៉ាងនេះក្ដី ក្រុមអ្នកតវ៉ាត្រឡប់ទៅផ្ទះវិញហើយ នៅព្រឹកថ្ងៃទី២ មីនា ដដែល បន្ទាប់ពីលោក សម រង្ស៊ី ប្រធានគណបក្សសង្គ្រោះជាតិ ចេញមកជួបពួកគាត់ដោយថ្លែងថា លោកបានទទួលព័ត៌មានអំពីការទាមទារនេះហើយ ហើយលោកនឹងទទួលព័ត៌មានពីអ្នកគាំទ្រនៅខេត្តសៀមរាប ផ្សេងទៀត ថាតើពួកគាត់គិតយ៉ាងណា ចំពោះការទាមទារនេះ។
លោកសន្យាថា លោកនឹងជួបអ្នកគាំទ្រជាទ្រង់ទ្រាយធំ នៅខេត្តសៀមរាប នៅថ្ងៃទី៤ មីនា ដើម្បីដោះស្រាយបញ្ហានេះ៖ «យើងនឹងទៅខេត្តសៀមរាប ខានស្អែកនេះ ដើម្បីបងប្អូនផ្ទាល់ បងប្អូនគ្រប់ក្រុមទាំងអស់។ មុននឹងធ្វើសេចក្ដីសម្រេច ទាល់តែយើងស្ដាប់ទាំងសង្ខាង ហើយយកមកថ្លឹងថ្លែងទាំងអស់គ្នា។ អរគុណបងប្អូន ដែលអញ្ជើញមកសម្ដែងមតិ។ យើងត្រូវតែមានចិត្តក្លាហានសម្ដែងមតិតវ៉ា។ ពេលណាយើងមានបញ្ហា ត្រូវតែតវ៉ា!»។
មុននឹងរំសាយការទាមទារនេះ ក្រុមអ្នកតវ៉ាថ្លែងថា នឹងរង់ចាំការដោះស្រាយពីប្រធាន និងអនុប្រធានបក្សសង្គ្រោះជាតិ ហើយព្រមានថា នឹងបន្តការតវ៉ាទៀតរហូតដល់មានការផ្លាស់ប្ដូរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។