គណបក្សសង្គ្រោះជាតិ បានប្រកាសថា គិតមកដល់ថ្ងៃទី២១ ខែមិថុនា គណបក្សប្រមូលស្នាមមេដៃថ្មីបានជិត ៣០ម៉ឺនស្នាមមេដៃ។ គណបក្សសង្គ្រោះជាតិ បានបន្តប្រមូលស្នាមមេដៃថ្វាយព្រះមហាក្សត្រ ដើម្បីឲ្យព្រះអង្គធ្វើព្រះរាជអន្តរាគមន៍ដោះលែងអ្នកជាប់ឃុំ និងស្ដារអភ័យឯកសិទ្ធិតំណាងរាស្ត្រ នៅស្របពេលដែលរដ្ឋាភិបាលប្រកាសលទ្ធផលធ្វើកោសល្យវិច័យស្នាមមេដៃដែលបានថ្វាយព្រះមហាក្សត្រកាលពីចុងខែឧសភា ថាមានភាពមិនប្រក្រតី។
គណបក្សសង្គ្រោះជាតិ នឹងចូលគាល់ព្រះមហាក្សត្រដើម្បីថ្វាយញត្តិ តែមិនដង្ហែញត្តិ និងហែក្បួនអ្នកគាំទ្រដូចមុនទេ។
អនុប្រធានគណៈកម្មាធិការនាយកគណបក្សសង្គ្រោះជាតិ លោក អេង ឆៃអ៊ាង មានប្រសាសន៍ថា គិតមកដល់ថ្ងៃទី២១ ខែមិថុនា គណបក្សប្រមូលបានស្នាមមេដៃចំនួន ២៨ម៉ឺនស្នាមមេដៃ ដែលមិនបូកសរុបជាមួយស្នាមមេដៃដែលប្រមូលបាន ១៧ម៉ឺនស្នាមមេដៃកាលពីលើកមុននោះទេ។ លោកថា គណបក្សកំពុងរង់ចាំចម្លើយពីព្រះបរមរាជវាំងជុំវិញការសុំចូលគាល់ព្រះមហាក្សត្រផ្ទាល់ ដើម្បីថ្វាយញត្តិស្នាមមេដៃនេះ ស្របពេលដែលការប្រមូលស្នាមមេដៃនៅតែបន្ត។
លោក អេង ឆៃអ៊ាង ថ្លែងថា «តំណាងរាស្ត្រគណបក្សសង្គ្រោះជាតិ បានចេញលិខិតមួយសុំទូលថ្វាយលោក ចូលគាល់ថ្វាយញត្តិ។ យើងមិនចង់ដង្ហែទេ បើសិនព្រះរាជាលោកព្រះរាជអនុញ្ញាតឲ្យតំណាងរាស្ត្រចូលគាល់ យើងនឹងចូលគាល់ថ្វាយលោកផ្ទាល់តែម្ដង»។
យុទ្ធនាការប្រមូលស្នាមមេដៃរបស់គណបក្សសង្គ្រោះជាតិ នៅពេលនេះ ធ្វើឡើងស្របពេលដែលរដ្ឋាភិបាល គឺក្រសួងមហាផ្ទៃ ដែលជាស្ថាប័នសាមី កំពុងធ្វើកោសល្យវិច័យពិនិត្យលើភាពត្រឹមត្រូវនៃញត្តិស្នាមមេដៃដែលគណបក្ស និងអ្នកគាំទ្របានថ្វាយព្រះមហាក្សត្រ ឲ្យធ្វើព្រះរាជអន្តរាគមន៍ដោះលែងអ្នកជាប់ឃុំ និងពិនិត្យស្ថានការណ៍វិបត្តិនយោបាយកាលពីថ្ងៃទី៣០ ខែឧសភា។
ជុំវិញបញ្ហានេះ អ្នកនាំពាក្យក្រសួងមហាផ្ទៃ លោក ខៀវ សុភ័គ ថ្លែងថា បន្ទាប់ពីក្រុមការងារបច្ចេកទេសបានពិនិត្យលើញត្តិមួយចំនួន បានរកឃើញភាពមិនប្រក្រតីលើញត្តិដែលបានថ្វាយព្រះមហាក្សត្រកាលពីលើកមុន ក្នុងនោះមានដូចជា ញត្តិមិនបានប្រមូលគ្រប់ ២៥ខេត្ត-រាជធានីដូចការអះអាង មានឈ្មោះមិនមានស្នាមមេដៃ មានស្នាមមេដៃមិនមានឈ្មោះ និងនៅលើញត្តិពីស្រុកខ្សាច់កណ្ដាល ខេត្តកណ្ដាល មានស្នាមមេដៃតែមួយ បានផ្ដិតលើឈ្មោះផ្សេងៗគ្នាផ្ដិតចំនួន ៨៨ដង។ លោក ខៀវ សុភ័គ បញ្ជាក់ថា គណៈកម្មការត្រួតពិនិត្យ នឹងធ្វើរបាយការណ៍ទៅរដ្ឋាភិបាលស្នើសុំចាត់វិធានការតាមច្បាប់ ចំពោះជនដែលបានផ្ដិតមេដៃក្លែងបន្លំ ហើយលោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ ជាអ្នកនាំយកញត្តិថ្វាយព្រះមហាក្សត្របែបនេះ គឺជាការក្លែងបន្លំឯកសារសាធារណៈ ដែលនឹងទទួលខុសត្រូវចំពោះមុខច្បាប់។
លោក ខៀវ សុភ័គ ថ្លែងថា «ឧទាហរណ៍ថាម្នាក់ផ្ដិតម្នាក់មាន ៨៨រូប នេះត្រូវចាប់ផ្ដើម ហើយ ម្នាក់ហើយ ៣-៤ នាក់ហ្នឹងក៏ត្រូវសួរដែរ ហើយធ្ងន់ធ្ងរណាស់ ។ អាម្នាក់ឯងដើរតួ ៨៨នាក់ហ្នឹង ហើយរាប់ ១៧ម៉ឺនដែរ ។ ទី២ អ្នកដែលយកស្នាមមេដៃទៅថ្វាយព្រះករុណា តំណាងរាស្ត្រ ឯកឧត្ដម យ៉ែម បុញ្ញឫទ្ធិ គាត់យកស្នាមមេដៃក្លែងក្លាយទៅថ្វាយព្រះករុណាចឹង ខ្ញុំគិតថាមិនរួចខ្លួនទេ ហើយការចោទប្រកាន់យ៉ាងណាអាស្រ័យលើតុលាការ ។ ខ្ញុំគិតផ្ទាល់ខ្លួនទេ ធ្វើបើគ្រាន់តែផ្សព្វផ្សាយ ព័ត៌មានឲ្យ គេដឹងខុសចឹង ធ្វើមិនចាត់វិធានការយល់ល្អមិនបាច់ ទេ»។
តែទោះជាយ៉ាងណា លោក អេង ឆៃអ៊ាង មិនទទួលស្គាល់ការធ្វើកោសល្យវិច័យនេះទេ។ ប៉ុន្តែលោក ខៀវ សុភ័គ ចាត់ទុកការមិនទទួលស្គាល់នេះ ថាជាសិទ្ធិសេរីភាព ហើយថានេះជាទម្លាប់មិនទទួលស្គាល់របស់គណបក្សប្រឆាំងរួចទៅហើយ។
ពាក់ព័ន្ធបញ្ហានេះ អ្នកស្រាវជ្រាវផ្នែកទំនាក់ទំនងអន្តរជាតិ និងអភិវឌ្ឍន៍ភាពជាអ្នកដឹកនាំ លោក ឆាំ ប៊ុនថេត មានទស្សនៈថា ការស្រាវជ្រាវនេះមិនអាចចាត់ទុកថាមានភាពសុក្រឹតបានទេ ដោយសារគ្មានការចូលរួមពីភាគីផ្សេងទៀត។ លោកថា ការធ្វើកោសល្យវិច័យនេះ គឺខុសបច្ចេកទេសសុទ្ធសាធ។ បញ្ហានេះ គេគួរតែពិនិត្យទៅលើខ្លឹមសារញត្តិវិញទើបជាការត្រឹមត្រូវ៖ «ពាក់ព័ន្ធលោក យ៉ែម បុញ្ញឫទ្ធិ ពាក់ព័ន្ធនរណាគេអីមិនសំខាន់ទេ សំខាន់ដោះស្រាយអ្វីដែលប្រជាពលរដ្ឋចង់ បាន»។
ថ្វីត្បិតតែក្រសួងមហាផ្ទៃ ព្រមានចាត់វិធានការលើភាពមិនប្រក្រតីលើញត្តិរបស់គណបក្សសង្គ្រោះជាតិ ក្ដី ប៉ុន្តែសមាជិក និងសកម្មជនគណបក្សនេះ នៅបន្តសកម្មភាពប្រមូលស្នាមមេដៃជារៀងរាល់ថ្ងៃ ទោះបីជាមានការរារាំងពីអាជ្ញាធរមូលដ្ឋាន ពេលខ្លះសមត្ថកិច្ចឃាត់ខ្លួនពួកគេឲ្យធ្វើកិច្ចសន្យាឈប់ធ្វើសកម្មភាពនេះក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។