គណបក្សសង្គ្រោះជាតិ ប្រកាសនៅថ្ងៃទី៦ មិថុនា ថា ខ្លួននឹងរៀបចំការជួបជុំមហាជនដោយសន្តិវិធីនៅទីស្នាក់ការកណ្ដាលរបស់គណបក្សសង្គ្រោះជាតិ នាសង្កាត់ចាក់អង្រែលើ រាជធានីភ្នំពេញ ដើម្បីឃ្លាំមើលស្ថានការណ៍នយោបាយនៅថ្ងៃទី១៤ មិថុនា។
ការប្រកាសអំពីគម្រោងជួបជុំមហាជននៅថ្ងៃទី១៤ មិថុនា ត្រូវបានសមាជិកព្រឹទ្ធសភាគណបក្ស សម រង្ស៊ី លោក ទាវ វណ្ណុល ថ្លែងប្រាប់សកម្មជន និងអ្នកគាំទ្រអំពីការសម្រេចរបស់គណៈអចិន្ត្រៃយ៍គណបក្សនេះ នៅព្រឹកថ្ងៃទី៦ មិថុនា៖ « យើងនឹងមានកម្មវិធីនិមន្តព្រះសង្ឃប្រហាក់ប្រហែលនឹងថ្ងៃស្អែកនេះដែរ ប៉ុន្តែយើងនឹងធ្វើនៅខេត្តសៀមរាប។ ប៉ុន្តែពេលវេលា គឺយើងមិនទាន់បានកំណត់ច្បាស់លាស់ទេ។ បន្ថែមបន្តិចទៀតដែរថា ថ្ងៃទី១៤ នេះ យើងនឹងមានសកម្មជន ប្រជាពលរដ្ឋនឹងមកជួបជុំគ្នានៅទីស្នាក់ការកណ្ដាលគណបក្សសង្គ្រោះជាតិ » ។
នេះជាគម្រោងជួបជុំធំលើកទី២ បន្ទាប់ពីការប្រមូលផ្ដុំធំម្ដងកាលពីថ្ងៃទី២៩ និងថ្ងៃទី៣០ ខែឧសភា ដែលជាថ្ងៃប្រមូល និងហែញត្តិទៅព្រះបរមរាជវាំងរកព្រះរាជអន្តរាគមន៍ពីព្រះមហាក្សត្រ ឲ្យជួយប្រធានស្ដីទីគណបក្សសង្គ្រោះជាតិ គឺលោក កឹម សុខា និងឲ្យដោះលែងសកម្មជនគណបក្ស សកម្មជនអង្គការសង្គមស៊ីវិល និងមន្ត្រី គ.ជ.ប ដែលកំពុងជាប់ឃុំឃាំង។
ការកំណត់ថ្ងៃជួបជុំមហាជននៅថ្ងៃទី១៤ មិថុនា ចំថ្ងៃដែលចៅក្រមស៊ើបសួរសាលាដំបូងរាជធានីភ្នំពេញ គឺចៅក្រម ថាន់ ឡេង ចេញដីកាបង្គាប់ឲ្យលោក កឹម សុខា ចូលខ្លួនទៅឆ្លើយពីដំណើររឿងដែលលោកបដិសេធក្នុងការចូលខ្លួនជាសាក្សី កាលពីថ្ងៃទី២៦ ឧសភា។
ការបដិសេធមិនចូលខ្លួនទៅតុលាការ ហើយអាជ្ញាធរនគរបាលតាមរកចាប់ខ្លួននៅថ្ងៃនោះហើយ ដែលធ្វើឲ្យលោក កឹម សុខា សម្រេចចូលទៅស្នាក់នៅក្នុងទីស្នាក់ការកណ្ដាលរបស់គណបក្សរហូតមកដល់ពេលនេះ។ មន្ត្រីខាងគណបក្សសង្គ្រោះជាតិ តែងចាត់ទុកចំណាត់ការកោះហៅលោក កឹម សុខា ថាខុសរដ្ឋធម្មនុញ្ញ ហើយធ្វើសកម្មភាពស្វែងរកស្នាមមេដៃគាំទ្រញត្តិរកព្រះរាជអន្តរាគមន៍ពីព្រះមហាក្សត្រ។
ករណីលោក កឹម សុខា នេះ ត្រូវបានមន្ត្រីនាំពាក្យរដ្ឋាភិបាល លោក ផៃ ស៊ីផាន ថ្លែងក្នុងទំព័រហ្វេសប៊ុក (Facebook) របស់លោកថា ជាសកម្មភាពបដិវត្តន៍ប្រឆាំងនីតិរដ្ឋ និងដំណើរការយុត្តិធម៌ដែលមានចែងក្នុងច្បាប់។
ជាការឆ្លើយតប មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងកាលពីថ្ងៃទី៥ មិថុនា ថា សកម្មភាពនេះជាការប្រយ័ត្នប្រយែងរបស់គណបក្សលោកមិនឲ្យដូចករណីមុនៗ៖ «កន្លងមក យើងឃើញមានដំណើរការនៃនីតិវិធីផ្សេងៗដែលពាក់ព័ន្ធទៅនឹងអ្នកនយោបាយ គឺបានបញ្ចប់ដោយការជាប់ឃុំ។ យើងមិនចោទប្រកាន់អ្នកណាទេ ប៉ុន្តែយើងធ្វើការអ្វីត្រូវតែប្រុងប្រយ័ត្នរហូតទៅដល់មានដំណោះស្រាយពិតប្រាកដមួយ»។
ក្នុងសេចក្ដីប្រកាសព័ត៌មាននៅថ្ងៃទី៦ មិថុនា គណបក្សសង្គ្រោះជាតិ កំពុងបន្តប្រើយន្តការធ្វើញត្តិថ្មីមួយទៀត ដើម្បីទៅព្រះបរមរាជវាំងជាលើកទី២។ គណបក្សសង្គ្រោះជាតិ កំណត់ការប្រមូលញត្តិពលរដ្ឋពីមូលដ្ឋានទាំង ២៥ខេត្ត-រាជធានី នៅថ្ងៃទី១៣ មិថុនា។ ប៉ុន្តែគណបក្សនេះនៅមិនទាន់កំណត់ថ្ងៃហែញត្តិទៅព្រះបរមរាជវាំងនៅឡើយទេ។
ទន្ទឹមគ្នានេះ គណបក្សសង្គ្រោះជាតិ ក៏នឹងរៀបចំពិធីសូត្រមន្ត និងរាប់បាត្រព្រះសង្ឃចំនួន ១២៣អង្គនៅព្រឹកថ្ងៃទី៧ មិថុនា ដើម្បីបួងសួងដល់វត្ថុស័ក្ដិសិទ្ធិ ធ្វើឲ្យមានសន្តិភាព ការផ្សះផ្សាបង្រួបបង្រួមជាតិពិតប្រាកដ និងកុំឲ្យមានការរំលោភបំពានអភ័យឯកសិទ្ធិសភា។
ប្រភពពីមន្ត្រីគណបក្សសង្គ្រោះជាតិ ដែលសុំលាក់ឈ្មោះ បង្ហើបព័ត៌មានឲ្យដឹងថា លោក កឹម សុខា អាចនឹងចេញមកជួបអ្នកគាំទ្រ និងសាធារណជនជាលើកដំបូងនៅក្នុងពិធីសូត្រមន្តនោះ បន្ទាប់ពីលោកចូលស្នាក់នៅឯទីស្នាក់ការគណបក្សអស់រយៈពេល ១៣ថ្ងៃ។
គណបក្សសង្គ្រោះជាតិ ប្រកាសថា ខ្លួននឹងបន្តយន្តការតស៊ូមតិដូចរាល់ថ្ងៃនេះ រហូតទាល់តែមានដំណោះស្រាយ ហើយស្ថានការណ៍នយោបាយវិលទៅរកសភាពធម្មតាឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។