គណបក្សសង្គ្រោះជាតិសម្រេចជាផ្លូវការ ទិញដីដំឡើងអង់តែន និងសង់ស្ថានីយទូរទស្សន៍ក្នុងពេលខាងមុខដ៏ខ្លី ដើម្បីដំណើរការទូរទស្សន៍ព្រះអាទិត្យរបស់ខ្លួន។
ការសម្រេចទិញដីដំឡើងអង់តែនសង់ស្ថានីយទូរទស្សន៍នេះ ត្រូវបានធ្វើឡើងក្នុងកិច្ចប្រជុំគណៈកម្មាធិការអចិន្ត្រៃយ៍ នៃផែនការសកម្មភាពត្រីមាសទី៤ ឆ្នាំ២០១៥ នាស្នាក់ការកណ្ដាលគណបក្ស នៅនៅថ្ងៃទី១៤ កញ្ញា។
អ្នកនាំពាក្យគណបក្សសង្គ្រោះជាតិ លោក យ៉ែម ប៉ុញ្ញឫទ្ធិ ឲ្យដឹងថា ទីតាំងសម្រាប់សាងសង់ស្ថានីយនឹងចាប់ផ្ដើមនៅខែកញ្ញានេះ ដោយត្រូវការទំហំដី២០ គុណ៥០ម៉ែត្រ។
ចំណែកទំហំទឹកប្រាក់ដែលត្រូវការចំណាយដើម្បីទិញដី ចន្លោះពី១២ទៅ៣០ម៉ឺនដុល្លារ អង់តែនចន្លោះពី១០ម៉ឺនទៅ១៦ម៉ឺនដុល្លារ និងអាគារប្រមាណ១០ម៉ឺនដុល្លារ។
គិតមកត្រឹមថ្ងៃទី១៤ កញ្ញា ទឹកប្រាក់វិភាកទានចូលរួមបង្កើតទូរទស្សន៍ព្រះអាទិត្យ របស់គណបក្សសង្គ្រោះជាតិ ពីមជ្ឈដ្ឋានទូទៅទាំងក្នុង និងក្រៅប្រទេស មានប្រមាណ៧០ម៉ឺនដុល្លារ។
យ៉ាងណាក៏ដោយ លោក យ៉ែម ប៉ុញ្ញឫទ្ធិ បញ្ជាក់ថា គម្រោងផ្សាយជាផ្លូវការអាចនឹងចាប់ផ្ដើមនៅដើមឆ្នាំ២០១៦យ៉ាងយូរ ដោយចាប់ផ្ដើមផ្សាយគ្របដណ្ដប់រាជធានីភ្នំពេញ និងខេត្តជាប់នេះ ហើយជាបណ្ដើរៗនឹងរៀបចំផ្សាយទៅគ្រប់ខេត្តក្រុង នៃព្រះរាជាណាចក្រកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។