មន្ត្រីរដ្ឋាភិបាលកម្ពុជា ប្រតិកម្មនឹងគណបក្សសង្គ្រោះជាតិ ដែលចោទរដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន ថាបានធ្វើឲ្យទឹកដីកម្ពុជាក្រោម និងក្រោះត្រល់ ត្រូវបាត់បង់ទៅវៀតណាម នោះ គឺមិនពិតឡើយ។ រដ្ឋលេខាធិការនៃទីស្ដីការគណៈរដ្ឋមន្ត្រី ចាត់ទុកថា សម្ដីរបស់ថ្នាក់ដឹកនាំគណបក្សសង្គ្រោះជាតិ នៅពេលនេះ ចោទប្រកាន់ទាំងទទឹងទិស និងបើសិនថា បានដឹកនាំប្រទេសនាំឲ្យចង្រៃថែមទៀតផង។
លោក កែវ រ៉េមី រដ្ឋលេខាធិការនៃទីស្ដីការគណៈរដ្ឋមន្ត្រី បានហៅសារនយោបាយរបស់ថ្នាក់ដឹកនាំគណបក្សប្រឆាំង ដែលអះអាងថា លោកនាយករដ្ឋមន្ត្រី ហ៊ុន សែន និងរដ្ឋាភិបាលរបស់លោកមានកំហុស បានធ្វើឲ្យទឹកដីកម្ពុជាក្រោម និងកោះត្រល់ ត្រូវធ្លាក់ក្រោមការគ្រប់គ្រងដោយវៀតណាម វិញនោះ គឺជាសារនយោបាយវាយប្រហារដោយគ្មានសីលធម៌ និងខុសពីការពិតទាំងស្រុង។
ការថ្លែងដូចនេះរបស់ លោក កែវ រ៉េមី ធ្វើឡើងនៅក្នុងសន្និសីទកាសែតនៅទីស្ដីការគណៈរដ្ឋមន្ត្រីព្រឹកថ្ងៃទី៦ ខែមិថុនា។
ថ្លែងចំណោះមុខអ្នកសារព័ត៌មាន លោក កែម រ៉េមី ដែលក្នុងអតីតកាលធ្លាប់មានវោហារសាស្ត្រនយោបាយមកពីខាងគណបក្សប្រឆាំងដ៏ប៉ិនប្រសប់ ហើយវាយប្រហាររដ្ឋាភិបាល លោក ហ៊ុន សែន ដែរនោះ នៅពេលនេះលោកបានរិះគន់មេដឹកនាំគណបក្សសង្គ្រោះជាតិ វិញម្ដង។ ដោយមិនសំដៅចំឈ្មោះ តែទំនងជា លោក កែវ រ៉េមី ចង់និយាយពី លោក សម រង្ស៊ី និងលោក កឹម សុខា។ លោកថ្លែងថា ការចោទប្រកាន់របស់គណបក្សសង្គ្រោះជាតិ គឺពុំមានមូលដ្ឋានឡើយ។
ជាងនេះទៀត លោកថា គណបក្សសង្គ្រោះជាតិ តែងកេងចំណេញនយោបាយចោទប្រកាន់រដ្ឋាភិបាលទាំងទទឹងទិស។ លោក កែវ រ៉េមី បានលើកឡើងទៀតថា ការប្រកាន់គំនិតបែបនេះបង្ហាញថា ប្រសិនបើគណបក្សនេះបានកាន់អំណាច មិនដឹងបំផ្លិចបំផ្លាញ និងប្រើអំណាចបែបណាឡើយ។
លោក កែវ រ៉េមី ពន្យល់ថា លោកនាយករដ្ឋមន្ត្រី ហ៊ុន សែន ក៏ជាជនជាតិខ្មែរ និងការពារទឹកដីកម្ពុជា ហើយការបាត់បង់ទឹកដីកម្ពុជាក្រោម និងកោះត្រល់ ឬចំណែកណាមួយនោះ ជារឿងប្រវត្តិសាស្ត្រ គឺចប់សព្វគ្រប់ហើយ មិនមែនបាត់ក្នុងសម័យដែលលោកដឹកនាំនេះឡើយ៖ «កាលពីជំនាន់ ប៉ុល ពត ក៏គាត់រស់នៅហ្នឹង ឪពុកគាត់ក៏ត្រូវបាន ប៉ុល ពត សម្លាប់ ហើយគាត់រស់រហូតដល់គាត់រៀបការមានប្រពន្ធមានកូន។ កូនគាត់ធំៗតទៅទៀត ឥឡូវមកបង្កើតគណបក្សប្រឆាំងតទល់រកសំឡេងឆ្នោតជាមួយគ្នាប្រជែងជាមួយគ្នា ហើយមកនិយាយមួលបង្កាច់អ៊ីចឹង សួរថាយុត្តិធម៌សម្រាប់គណបក្សប្រជាជនកម្ពុជា សម្រាប់សម្ដេចតេជោ ដែរ។ ឥឡូវយើងនិយាយថា បើសិនជាដំណាក់កាលបន្ទាប់មកទៀត បើសិនជាទាក់ទងបំបាត់ពូជសាសន៍ខ្មែរ សួរថារដ្ឋាភិបាលកម្ពុជា ដឹកនាំដោយសម្ដេចតេជោ ខិតខំភាពក្រីក្រគ្មានប្រយោជន៍អី»។
លើសពីនេះទៀត លោក កែវ រ៉េមី និយាយថា ទឹកដីកម្ពុជា អាចនឹងមានទំហំធំជាងអ្វីដែលមានសព្វថ្ងៃ ក្រោយបោះបង្គោលរួចជាមួយប្រទេសវៀតណាម។
ប្រតិកម្មរបស់មន្ត្រីរដ្ឋាភិបាលនៅពេលនេះ ធ្វើឡើងរយៈពេល ២ថ្ងៃបន្ទាប់ពី លោក កឹម សុខា អនុប្រធានគណបក្សសង្គ្រោះជាតិ ថ្លែងរិះគន់បញ្ហាបូរណភាពទឹកដីនេះ និងបានសន្យាថា បើបក្សប្រឆាំងបានកាន់អំណាច នឹងស្នើឲ្យសភាលើកលែងលិខិតឆ្លងដែន ដោយអនុញ្ញាតឲ្យខ្មែរកម្ពុជាក្រោម ចេញចូលកម្ពុជា ដោយសេរី។ ចំពោះបញ្ហានេះ លោក កែវ រ៉េមី ថ្លែងការពារថា លោក ហ៊ុន សែន បានអនុវត្តគោលនយោបាយតាមព្រះរាជតម្រិះព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ ហើយ គឺចាត់ទុកខ្មែរក្រោម ក៏ជាខ្មែរដែរ។ ប៉ុន្តែថា នៅពេលនេះ ទឹកដីកម្ពុជា ជារបស់វៀតណាម ទៅហើយ។ ហេតុនេះ ការចេញចូលណាមួយនោះ គឺត្រូវអនុវត្តតាមក្របខ័ណ្ឌច្បាប់។
និយាយពីរឿងកោះត្រល់ វិញ ក្រៅពីអ្នកនយោបាយបក្សប្រឆាំងចោទប្រកាន់ហើយ លើសពីនេះទៀត ប្រធានសហព័ន្ធយុវជនខ្មែរអ្នកស្នេហាជាតិ លោក នាង សុឃុន កាលពីខែកុម្ភៈ បានដាក់បណ្ដឹងប្ដឹងលោកនាយករដ្ឋមន្ត្រីម្ដងរួចមកហើយដែរ ដោយចោទថា លោក ហ៊ុន សែន បានកាត់កោះត្រល់ និងប្រជុំកោះមួយចំនួនទៀត ឲ្យទៅវៀតណាម ក្រោយទៅវិញទេ។ បណ្ដឹងរបស់ លោក នាង សុឃុន នៅពេលនេះ ត្រូវបានតុលាការរុញចុះរុញឡើង។
លោក កឹម សុខា អនុប្រធានគណបក្សសង្គ្រោះជាតិ ចាត់ទុកថា លោកមិនខ្ចីឆ្លើយតបត្រឹមកម្រិត លោក កែវ រ៉េមី ទេ។ លោកអះអាងថា បើគណបក្សប្រជាជនកម្ពុជា ចិត្តសឿង ឲ្យ លោក ហ៊ុន សែន តតាំងជាមួយនឹងលោកវិញ។ ជាពិសេស លោក ហ៊ុន សែន គួរហ៊ានលើកពីបញ្ហាផ្ដល់ដីសម្បទាន ៩៩ឆ្នាំ ដែលអាចឲ្យវៀតណាម តាំងទីលំនៅបានដោយស្របច្បាប់ ដែលបញ្ហានេះ នរណាៗក៏គេដឹងដែររឿងនេះ៖ «យួន គេបញ្ជូនកូនក្មេងគេមកនៅកាន់កាប់ដីហ្នឹង នៅគ្រប់កន្លែងទាំងអស់ ប៉ុន្តែម៉េចក៏មិនឆ្លើយមក ហើយបញ្ហាព្រំដែនដែលមកបោះបង្គោលលើស្រែអ្នកស្រុកលើដីអ្នកស្រុក ហើយអ្នកស្រែកយំស្រែចម្ការ ម៉េចក៏មិនឆ្លើយមក។ ម៉េចក៏យករឿងអីផ្សេងវិញ។ លោក ហ៊ុន សែន ឆ្លើយអាហ្នឹងមក។ ខ្ញុំមិនឆ្លើយជាមួយ លោក កែវ រ៉េមី ទេ»។
លោក ឡៅ ម៉ុងហៃ អ្នកវិភាគឯករាជ្យយល់ឃើញថា ប្រសិនអ្នកនយោបាយនៅតែប្រើប្រវត្តិសាស្ត្រចាស់ ដើម្បីធ្វើជាដើមទុនទៀត វាពុំមែនជាមធ្យោបាយល្អឡើយ។ លោកឲ្យដឹងថា ដើម្បីធ្វើឲ្យផ្ទៃក្នុងកម្ពុជា រឹងមាំ អ្នកនយោបាយគួរលើករឿងនេះដោយស្ងៀមស្ងាត់ ហើយព្យាយាមរកដំណោះស្រាយរឿងនយោបាយ ដែលកំពុងជាប់គាំងឲ្យរួចសិន ទើបជាការប្រសើរនៅពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។