លោកនាយករដ្ឋមន្រ្តី ហ៊ុន សែន ចាត់ទុកសាលដីកាតុលាការ ក្រុងឡាអេ ប្រកាសកាលពីថ្ងៃទី១១ វិចិ្ឆកា ថា ជាជំហានមួយទៅមុខ ដ៏មានសារសំខាន់ និងមានអត្ថន័យជាប្រវត្តិសាស្ត្រ សំដៅដោះស្រាយដោយសន្តិវិធី និងផ្អែកលើច្បាប់អន្តរជាតិ នូវបញ្ហាវិវាទរវាងកម្ពុជា និងថៃ លើបញ្ហាប្រាសាទព្រះវិហារ និងតំបន់ជុំវិញប្រាសាទខ្មែរដ៏ចំណាស់មួយនេះ។ ចំណែកនាយករដ្ឋមន្រ្តីថៃ អ្នកស្រី យីងឡាក់ ស៊ីណាវ៉ាត់ (Yingluck Shinawatra) ក៏ប្រកាសថា រដ្ឋាភិបាលថៃ និងកម្ពុជា នឹងធ្វើការរួមគ្នា ដើម្បីស្វែងរកដំណោះស្រាយជាប្រយោជន៍ប្រទេសទាំងពីរ។ អ្នកស្រីបន្តថា កម្ពុជា និងថៃ មានព្រំដែនជាប់គ្នាមានបណ្តោយប្រវែងប្រមាណ ៨០០គីឡូម៉ែត្រ។ ប្រទេសទាំងពីរពឹងផ្អែកគ្នាទៅវិញទៅមកដើម្បីការរីកចំរើនរុងរឿងទៅថ្ងៃអនាគត។
កាលពីថ្ងៃច័ន្ទ ទី១១ វិច្ឆិកា ប្រធានតុលាការអន្តរជាតិក្រុងឡាអេ លោក ភីធើ ថមកា (Peter Tomka) បានប្រកាសសាលដីកា សម្រេចជាឯកច្ឆន្ទថា ប្រទេសកម្ពុជាមានអធិបតេយ្យភាពលើដែនដីទាំងមូលនៃតំបន់ប្រាសាទព្រះវិហារ។ ទន្ទឹមគ្នានោះ លោក ភីធើ ថមកា ក៏បញ្ជាឲ្យប្រទេសថៃ ត្រូវដកកងកម្លាំងប្រដាប់អាវុធមានទាហាន ប៉ូលិស និងឆ្មាំប្រាសាទទាំងអស់ចេញពីបរិវេណជុំវិញប្រាសាទព្រះវិហារ៖ «តុលាការសម្រេចថា ក្នុងក្របខ័ណ្ឌនៃការបកស្រាយ សាលដីកាចុះថ្ងៃទី១៥ ខែ មិថុនា ឆ្នាំ១៩៦២ ព្រះរាជាណាចក្រកម្ពុជា មានអធិបតេយ្យពេញលេញលើបូរណភាពទឹកដី លើតំបន់ពយភ្នំ នៃប្រាសាទព្រះវិហារ ដូចដែលមានកំណត់ក្នុងកថាខ័ណ្ឌទី ៩៨ នៃសាលដីកានេះ ហើយជាបច្ច័យ តុលាការប្រកាសថា ព្រះរាជាណាចក្រថៃ មានកាតព្វកិច្ចដកចេញពីទឹកដីនេះ នូវគ្រប់កងកម្លាំងប្រដាប់អាវុធ ឬកងនគរបាល ឬអ្នកថែរក្សា ឬឆ្មាំយាម ផ្សេងទៀត ដែលបោះទីតាំងនៅក្នុងទឹកដីនោះ»។
លោក ហោ ណាំងហុង រដ្ឋមន្រ្តីការបរទេសដឹកនាំប្រតិភូទៅស្តាប់សាលដីកា មានប្រសាសន៍ថា សាលដីកានេះ ជាសេចក្តីសម្រេចចិត្តបិទផ្លូវតវ៉ា ដូច្នោះភាគីថៃត្រូវតែគោរព៖ «ពិតមែនហើយ យើងមិនអាចនិយាយថា សាលក្រមតុលាការថ្ងៃនេះ បំពេញបំណងរបស់យើងបាន ១០០ភាគរយនោះទេ។ ប៉ុន្តែ យើងមានការរីករាយ សាលដីកានេះ បានសម្រេចអ្វីដែលចង់បានយ៉ាងច្រើនបំផុត»។
លោក ហ៊ុន សែន ក៏បានអំពាវនាវជាថ្មីម្តងទៀត ដល់កងកម្លាំងប្រដាប់អាវុធដែលកំពុងបំពេញភារកិច្ចការពារព្រំដែន ត្រូវរក្សាការអត់ធ្មត់ រក្សាស្ថានភាពឈរជើងដដែល និងចៀសវាងសកម្មភាពទាំងឡាយណាដែលអាចបង្កភាពតានតឹង ឬការប៉ះទង្គិចគ្នា ដើម្បីទុកលទ្ធភាពឲ្យរដ្ឋាភិបាល បន្តការពិភាក្សាគ្នា ដើម្បីជំរុញការអនុវត្តសាលដីកាតុលាការ។
ចំណែកអ្នកស្រី យីងឡាក់ ស៊ីណាវ៉ាត់ ក៏បានអះអាងថា រដ្ឋាភិបាលថៃ បានប្រាប់ទៅទាហានថៃ ឲ្យរក្សាសន្តិភាពតាមព្រំដែន។
គណបក្សសង្គ្រោះជាតិ កាលពីថ្ងៃច័ន្ទ ក៏បានសំដែងការអបអរសាទរចំពោះសាលដីកាតុលាការដែរ។ គណបក្សបានសំដែងការដឹងគុណូបការៈ របស់ព្រះមហាវីរក្សត្រ នរោត្តម សីហនុ ដែលមានស្នាព្រះហស្ដ ក្នុងការការពារប្រាសាទព្រះវិហារ ក្នុងអំឡុងឆ្នាំ១៩៦២។
គណបក្សសង្គ្រោះជាតិ ក៏អំពាវនាវឲ្យរដ្ឋាភិបាលកម្ពុជា អនុវត្តតាមគំរូវីរភាពរបស់អតីតព្រះមហាក្សត្រ ក្នុងការគ្រប់គ្រង និងការពារទឹកដីទាំងព្រំដែនខាងលិច និងព្រំដែនខាងកើតឲ្យបានគង់វង្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕