សាលារាជធានីភ្នំពេញ នឹងមិនអនុញ្ញាតឲ្យអង្គការសមាគមខ្មែរកម្ពុជាក្រោម និងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យ ជួបជុំគ្នានៅទីលានប្រជាធិបតេយ្យគ្រប់ចំនួន ៥ថ្ងៃ ដើម្បីទាមទារឲ្យរដ្ឋាភិបាលវៀតណាម សុំទោសចំពោះការបំភ្លៃប្រវត្តិសាស្ត្រទឹកដីកម្ពុជាក្រោម តាមការគ្រោងទុកឡើយ ដោយសាលារាជធានីបញ្ជាក់ថា ទីលានប្រជាធិបតេយ្យជាប់រវល់។
សាលារាជធានីភ្នំពេញ អនុញ្ញាតឲ្យបាតុករជួបជុំនៅទីលានប្រជាធិបតេយ្យបានចំនួន ១ថ្ងៃប៉ុណ្ណោះ គឺថ្ងៃទី៧ ខែតុលា ប៉ុន្តែមិនអនុញ្ញាតឲ្យដើរហែក្បួន ឬចូលផ្សារបិទខិត្តប័ណ្ណ ឬទៅជួបជុំនៅមុខស្ថានទូតវៀតណាម នោះឡើយ។
គម្រោងជួបជុំរបស់អង្គការសមាគមខ្មែរកម្ពុជាក្រោម និងយុវជនរៀងរាល់ព្រឹក ចាប់ពីថ្ងៃទី៤ ដល់ថ្ងៃទី៨ តុលា នៅទីលានប្រជាធិបតេយ្យ រួចដង្ហែក្បួនទៅកាន់ទីផ្សារនានា ដើម្បីបិទខិត្តប័ណ្ណ ដើម្បីដាក់ញត្តិទៅកាន់រដ្ឋសភា ទៅកាន់វិមានសន្តិភាព ទៅកាន់ឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ទៅកាន់ស្ថានទូតបារាំង ព្រមទាំងជួបជុំគ្នានៅមុខស្ថានទូតវៀតណាម ប្រចាំកម្ពុជា មុននឹងរំសាយនោះ មិនត្រូវបានសាលារាជធានីភ្នំពេញអនុញ្ញាតឡើយ។
ការសម្រេចនេះ ធ្វើឡើងបន្ទាប់ពីមន្ត្រីសាលារាជធានីភ្នំពេញ បានជួបប្រជុំជាមួយតំណាងអង្គការសមាគមខ្មែរកម្ពុជាក្រោម នៅព្រឹកថ្ងៃទី២ ខែតុលា។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ឲ្យដឹងតាមទូរស័ព្ទនៅថ្ងៃទី២ តុលា ថា សាលារាជធានីភ្នំពេញ មិនអាចអនុញ្ញាតឲ្យក្រុមបាតុករខ្មែរក្រោម ជួបជុំគ្នានៅទីលានប្រជាធិបតេយ្យគ្រប់ចំនួន ៥ថ្ងៃបានទេ ដោយសារនៅថ្ងៃទី៤ តុលា សាខាកាកបាទក្រហមរាជធានីភ្នំពេញ នឹងធ្វើកម្មវិធីមនុស្សធម៌។ ចំណែកថ្ងៃទី៥ តុលា សមាគមគ្រូបង្រៀនកម្ពុជាឯករាជ្យរបស់ លោក រ៉ុង ឈុន ប្រារព្ធទិវាគ្រូបង្រៀនអន្តរជាតិ។ រីឯថ្ងៃទី៦ តុលា វិញ ទុកសម្រាប់ឲ្យក្រុមសិទ្ធិលំនៅឋាន ប្រារព្ធទិវាសិទ្ធិលំនៅឋានពិភពលោក។ លោក ឡុង ឌីម៉ង់ បន្តថា សាលារាជធានីភ្នំពេញ អនុញ្ញាតឲ្យខ្មែរក្រោម និងយុវជន ជួបជុំគ្នានៅថ្ងៃទី៧ តុលា ប៉ុន្តែពួកគេមិនត្រូវបានអនុញ្ញាតឲ្យដើរដង្ហែក្បួនទៅតាមផ្សារ ឬដាក់ញត្តិ ឬជួបជុំនៅមុខស្ថានទូតវៀតណាម ប្រចាំកម្ពុជា នោះឡើយ។ សម្រាប់ថ្ងៃទី៨ តុលា វិញ លោក ឡុង ឌីម៉ង់ អះអាងថា សាលារាជធានីភ្នំពេញ ត្រូវរង់ចាំមើលការរៀបចំនៅថ្ងៃទី៧ តុលា របស់បាតុករជាមុនសិន មុននឹងសម្រេចថាតើត្រូវអនុញ្ញាតឲ្យជួបជុំនៅថ្ងៃទី៨ ឬក៏យ៉ាងណា?
លោក ឡុង ឌីម៉ង់៖ «សុំនៅមុខស្ថានទូតវៀតណាម នោះ គឺយើងមិនអនុញ្ញាតជូនទេ ដើម្បីការពារសណ្ដាប់ធ្នាប់ របៀបរៀបរយ ជាពិសេសសន្តិសុខរបស់ស្ថានទូតតែម្តង។ អ៊ីចឹងទេ យើងមិនអនុញ្ញាតជូនទេ ហើយការស្នើសុំរបស់គាត់មួយទៀត ដែលគាត់ចង់ធ្វើការហែក្បួន ក៏យើងមិនអនុញ្ញាតជូនគាត់ធ្វើការចែកខិត្តប័ណ្ណ ឬបិទខិត្តប័ណ្ណនានានៅតាមទីផ្សារនានា នៅរាជធានីភ្នំពេញ ក៏យើងមិនអនុញ្ញាតជូនទេ។ យើងមិនអាចឲ្យមានការចែកបិទខិត្តប័ណ្ណនៅក្នុងផ្សារបានទេ។ ដូច្នេះ យើងអត់មានច្បាប់អនុញ្ញាតណាឲ្យមានការចែក ឬបិទស្ទីកឃ័រ ដូចគាត់និយាយថា គាត់ធ្វើស្ទីកឃ័រដើរបិទតាមនេះ គឺយើងមិនអនុញ្ញាតជូន មិនអាចធ្វើបាន»។
លោក ឡុង ឌីម៉ង់ អះអាងបន្តថា សាលារាជធានីភ្នំពេញ អាចអនុញ្ញាតឲ្យបាតុករបញ្ជូនតំណាងរបស់ខ្លួនប្រហែល ១០នាក់ ដើម្បីដាក់ញត្តិជូនស្ថាប័ននានាដែលពួកគេចង់។
ទោះយ៉ាងណា ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា ថ្លែងថា ខ្មែរក្រោម និងយុវជន នឹងជួបជុំនៅទីលានប្រជាធិបតេយ្យនៅថ្ងៃទី៧ រួចដើរដាក់ញត្តិទៅកាន់រដ្ឋសភា និងឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា រួចទៅជួបគ្នានៅមុខស្ថានទូតវៀតណាម ហើយនៅថ្ងៃទី៨ តុលា គឺជួបជុំនៅទីលានប្រជាធិបតេយ្យដូចគ្នា រួចដើរដាក់ញត្តិទៅកាន់វិមានសន្តិភាព និងស្ថានទូតបារាំង រួចទៅជួបគ្នានៅមុខស្ថានទូតវៀតណាម មុននឹងរំសាយបញ្ចប់។
លោក ថាច់ សេដ្ឋា អះអាងដែរថា បាតុករនឹងមិនដង្ហែក្បួនចូលតាមផ្សារនានានោះទេ ប៉ុន្តែពួកគេនឹងដើរផ្សព្វផ្សាយ និងបិទខិត្តប័ណ្ណ អំពាវនាវឲ្យពលរដ្ឋខ្មែរឈប់ប្រើប្រាស់ទំនិញ និងសេវាកម្មវៀតណាម នៅតាមទីសាធារណៈវិញ។ លោក ថាច់ សេដ្ឋា ថ្លែងបន្តថា ដោយសារទីលានប្រជាធិបតេយ្យជាប់រវល់ពីថ្ងៃទី៤ ដល់ថ្ងៃទី៦ តុលា លោកក៏បានស្នើសុំទៅប្រមូលផ្តុំនៅមុខស្ថានទូតវៀតណាម តែម្តង ហើយថា សាលារាជធានីភ្នំពេញនឹងជូនដំណឹងនេះដល់ក្រសួងមហាផ្ទៃ ដើម្បីសម្រេច។ លោក ថាច់ សេដ្ឋា ថ្លែងថា ក្រុមបាតុករត្រៀមលក្ខណៈជាស្រេច ដើម្បីទៅជួបជុំនៅមុខស្ថានទូតវៀតណាម ហើយថា ប្រសិនបើក្រសួងមហាផ្ទៃ មិនមានការឆ្លើយតប ឬក៏យ៉ាងណានោះ វាជារឿងរបស់ក្រសួងមហាផ្ទៃ។
លោក ថាច់ សេដ្ឋា៖ «យើងមិនអាចនៅស្ងៀមទេ ទន្ទឹមនឹងរង់ចាំ ក៏យើងអំពាវនាវបងប្អូនយើងឲ្យទៅជួបជុំនៅហ្នឹងដែរ ពីព្រោះនៅទីលានប្រជាធិបតេយ្យ ខាងអាជ្ញាធរប្រាប់ថាជាប់រវល់ហើយ អ៊ីចឹងយើងនាំគ្នាទៅហ្នឹង ព្រោះគោលដៅរបស់យើងទៅហ្នឹងដែរ អ៊ីចឹងមិនបាច់ចាំហែទេ នាំឲ្យស្ទះចរាចរណ៍ ទៅមុខស្ថានទូតយួន ហ្មង ព្រោះបើថា ដោយសារការយឺតយ៉ាវរបស់ក្រសួងមហាផ្ទៃ អាហ្នឹងជាកំហុសរបស់ក្រសួងមហាផ្ទៃ ព្រោះយើងបានប្រកាសរួចហើយៗ»។
កាលពីពេលកន្លងទៅ សាលារាជធានីភ្នំពេញ ក៏ធ្លាប់ប្រកាសមិនអនុញ្ញាតឲ្យបាតុករដើរដង្ហែក្បួនដាក់ញត្តិ ទាមទារឲ្យវៀតណាម ទទួលស្គាល់ប្រវត្តិសាស្ត្រទឹកដីកម្ពុជាក្រោមដែរ ប៉ុន្តែក្រុមបាតុករនៅតែអាចដើរហែក្បួនដាក់ញត្តិ និងទៅប្រមូលផ្តុំនៅមុខស្ថានទូតវៀតណាម តាមការគ្រោងទុកដដែល។ មួយវិញទៀត នៅពេលឆ្លើយតបចំពោះការស្នើសុំរបស់រដ្ឋាភិបាលវៀតណាម ដែលឲ្យកម្ពុជា ចាត់វិធានការមិនឲ្យមានបាតុកម្មប្រឆាំងពួកគេនោះ រដ្ឋាភិបាលកម្ពុជា ថែមទាំងអះអាងថា កម្ពុជា ជាប្រទេសប្រជាធិបតេយ្យ។ ដូច្នេះ ពលរដ្ឋមានសិទ្ធិធ្វើបាតុកម្ម ឲ្យតែបាតុកម្មនោះអហិង្សា និងស្របច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។