នៅក្នុងសន្និសីទកាសែតកាលពីព្រឹកថ្ងៃទី១៣ ខែកញ្ញា ឆ្នាំ២០១៣ ក្នុងក្រុងភ្នំពេញ បណ្ដាញពហុវិស័យបានអំពាវនាវអោយមានការគោរពស្ថាប័នព្រះមហាក្សត្រ និងព្រះរាជតួនាទីរបស់ព្រះអង្គដែលមានចែងក្នុងច្បាប់រដ្ឋធម្មនុញ្ញនៃព្រះរាជាណាចក្រកម្ពុជា។
បណ្ដាញពហុវិស័យ គឺជាក្រុមចម្រុះដែលចូលរួមដោយបណ្ដាញសហគមន៍ និងសមាគមនានា រួមមានសហគមន៍សកម្មជនដីធ្លី សកម្មជនព្រៃឈើ សកម្មជនប្រឆាំងនឹងការបណ្ដេញចេញ សកម្មជនការងារ កសិករ យុវជន ជនជាតិដើមភាគតិច អ្នកនេសាទ អ្នកប្រកបរបរផ្លូវភេទ អ្នកស្រឡាញ់ភេទដូចគ្នា និងអ្នកសិល្បៈជាដើម។
នៅចំពោះមុខអ្នកចូលរួមប្រមាណជា ៤០នាក់ លោក ស៊ឹម សុបញ្ញា តំណាងបណ្ដាញសហគមន៍នេសាទបឹងទន្លេសាប និងជាសមាជិកបណ្ដាញពហុវិស័យផងដែរនោះ បានលើកឡើងថា ព្រះរាជតួនាទី និងអំណាចរបស់ព្រះមហាក្សត្រត្រូវបានចែងច្បាស់ក្នុងរដ្ឋធម្មនុញ្ញ ដែលជាច្បាប់កំពូលរបស់កម្ពុជា តែលោកបានចោទសួរថា កន្លងមក នៅពេលដែលមានបញ្ហាសង្គមផ្សេងៗ ពិសេសបញ្ហាដីធ្លី ដូចជានៅតំបន់បឹងកក់ បុរីកីឡា និងនៅតាមបណ្ដាខេត្តមួយចំនួនទៀត តើអំណាចព្រះមហាក្សត្រមានសម្ពាធ និងជួយជំរុញក្នុងការដោះស្រាយបញ្ហាទាំងនោះអោយមានប្រសិទ្ធភាពបានដែរឬទេ?
លោកបន្តថា បណ្ដាញពហុវិស័យគាំទ្រអោយព្រះមហាក្សត្រមានអំណាចពេញលេញ តាមផ្លូវច្បាប់ ដើម្បីអោយព្រះមហាក្សត្រអាចជួយប្រជារាស្ត្ររបស់ព្រះអង្គ។ លោកថា ប្រជារាស្ត្រខ្មែរនៅតែជឿជាក់លើអង្គព្រះមហាក្សត្រ៖ «យើងចង់អោយអំណាចព្រះមហាក្សត្រដែលបានចែងក្នុងច្បាប់មានពេញលេញ ដោយគោរពទៅតាមឆន្ទៈរបស់រាស្ត្រ ព្រោះក្នុងមាត្រា ៨ និងមាត្រា ៩ បានចែងច្បាស់ថា លោកមិនត្រឹមតែគោរព និងធានាសិទ្ធិរបស់ប្រជាពលរដ្ឋទេ សូម្បីតែសន្ធិសញ្ញាអន្តរជាតិ ក៏លោកត្រូវតែគោរពដែរ»។
មាត្រា ៨ និងមាត្រា ៩ នៃរដ្ឋធម្មនុញ្ញកម្ពុជា ចែងថា ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និងនិរន្តរភាពជាតិ។ ព្រះមហាក្សត្រទ្រង់ជាអ្នកធានាឯករាជ្យជាតិ អធិបតេយ្យ និងបូរណភាពទឹកដីនៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិ និងសេរីភាពរបស់ប្រជាពលរដ្ឋ និងការគោរពសន្ធិសញ្ញាអន្តរជាតិ។ ព្រះមហាក្សត្រទ្រង់មានតួនាទីខ្ពង់ខ្ពស់ជាអាជ្ញាកណ្ដាល ដើម្បីធានាការប្រព្រឹត្តទៅនៃអំណាចសាធារណៈអោយមានភាពទៀងទាត់។
ការអំពាវនាវរបស់បណ្ដាញពហុវិស័យធ្វើឡើងស្របពេលដែលកម្ពុជា កំពុងជាប់គាំងផ្នែកនយោបាយក្រោយការបោះឆ្នោតជាតិនីតិកាលទី៥ និងស្របពេលដែលប្រជាពលរដ្ឋខ្មែរទូទៅ កំពុងសម្លឹងទៅរកព្រះមហាក្សត្រអំពីព្រះរាជអន្តរាគមន៍របស់ព្រះអង្គក្នុងការដោះស្រាយបញ្ហានយោបាយនេះ។
ក្នុងព្រះរាជសារពីរដាច់ដោយឡែកពីគ្នា ចុះថ្ងៃទី១២ ខែកញ្ញា ឆ្នាំ២០១៣ ព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានអញ្ជើញ លោក ហ៊ុន សែន និង លោក សម រង្ស៊ី ចូលរួមប្រជុំក្រោមព្រះរាជាធិបតីភាពនៃព្រះអង្គ នៅថ្ងៃសៅរ៍ ទី១៤ ខែកញ្ញា ឆ្នាំ២០១៣ វេលាម៉ោង ៩ព្រឹក ក្នុងព្រះបរមរាជវាំង។ លោក ហ៊ុន សែន និង លោក សម រង្ស៊ី បានឆ្លើយតបហើយថា ពួកគេនឹងចូលរួមប្រជុំតាមការអញ្ជើញរបស់ព្រះមហាក្សត្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។