កាសែតភ្នំពេញប៉ុស្តិ៍ ផ្សាយកាលពីថ្ងៃសុក្រ ម្សិលមិញ បានឲ្យដឹងថា លោករដ្ឋមន្ត្រីក្រសួងការពារជាតិ ទៀ បាញ់ បានថ្លែងបញ្ជាក់ថា កងទ័ពកម្ពុជា បានត្រៀមខ្លួនរួចជាស្រេច ដើម្បីការពាររដ្ឋធម្មនុញ្ញ ប្រសិនបើគណបក្សសង្គ្រោះជាតិ គំរាមធ្វើបាតុកម្មដែលខុសនឹងច្បាប់។
លោក ទៀ បាញ់ ដែលកាន់តំណែងជារដ្ឋមន្ត្រីការពារជាតិ អស់រយៈកាលជាង ២០ឆ្នាំមកហើយនេះ បានបញ្ជាក់ច្បាស់ថា៖ «ការប្រមូលផ្តុំគ្នាតវ៉ានៅទូទាំងប្រទេស ឬការធ្វើមហាបាតុកម្ម ត្រូវរៀបចំធ្វើឡើងតាមច្បាប់កំណត់។ ខ្ញុំពុំមែនគំរាមទេ តែយើងត្រូវពិនិត្យមើល ថាតើគណបក្សសង្គ្រោះជាតិ មានគោលបំណងបំផ្លាញរដ្ឋធម្មនុញ្ញ ឬយ៉ាងណា? ខ្ញុំនិយាយនេះដោយសុទ្ធចិត្ត គ្មាននរណាម្នាក់អាចបំផ្លាញរដ្ឋធម្មនុញ្ញបានទេ កងទ័ពបានត្រៀមខ្លួនរួចហើយ នៅក្រុងភ្នំពេញ»។
ការប្រកាសរបស់ លោក ទៀ បាញ់ នេះ ធ្វើឡើងនៅបន្ទាប់ពីមេដឹកនាំគណបក្សសង្គ្រោះជាតិ បានព្រមានថា នឹងកៀងគរប្រជាពលរដ្ឋធ្វើមហាបាតុកម្មអហិង្សានៅទូទាំងប្រទេស តវ៉ាប្រឆាំងដោយចោទប្រកាន់ថា រដ្ឋសភា និងរដ្ឋាភិបាលអាណត្តិថ្មី ដែលទើបបង្កើតឡើងនេះ មិនស្របច្បាប់ ហើយផ្ទុយពីរដ្ឋធម្មនុញ្ញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។