អង្គការជនពិការកម្ពុជា ហៅកាត់ថា (អពក) ស្នើឲ្យគណៈកម្មាធិការជាតិរៀបចំការបោះឆ្នោត បញ្ចូលគោលនយោបាយបញ្ជ្រាបបញ្ហាជនពិការទៅក្នុងច្បាប់បោះឆ្នោតថ្មី ដើម្បីផ្តល់សិទ្ធិអំណាចឲ្យជនពិការចូលរួមក្នុងឆាកនយោបាយដោយស្មើភាព។ ជាការឆ្លើយតប គ.ជ.ប នឹងពិនិត្យមើលសេចក្តីព្រាងគោលនយោបាយមួយនេះ។
ការចូលរួមក្នុងជីវភាពនយោបាយ និងជីវភាពសាធារណៈរបស់ជនពិការនៅកម្ពុជា នៅពើបប្រទះបញ្ហាប្រឈមជាច្រើន។
នាយកប្រតិបត្តិអង្គការជនពិការកម្ពុជា លោក ងិន សៅរ័ត្ន មានប្រសាសន៍ក្នុងសន្និសីទសារព័ត៌មាននៅទីស្នាក់ការក្នុងក្រុងភ្នំពេញ កាលពីថ្ងៃទី២៨ ឧសភា ថា ជនពិការមានបញ្ហាប្រឈមជាច្រើននៅក្នុងដំណើរការបោះឆ្នោតម្តងៗ។ ដូច្នេះ លោកទទូចសុំឲ្យគណៈកម្មាធិការជាតិរៀបចំការបោះឆ្នោតថ្មី បញ្ចូលសេចក្តីព្រាងគោលនយោបាយបញ្ជ្រាបបញ្ហាពិការភាព ក្នុងច្បាប់ស្ដីពីការបោះឆ្នោតជ្រើសតាំងតំណាងរាស្ត្រ៖ «សេចក្តីព្រាងគោលនយោបាយនេះ ជាគោលការណ៍មួយដែលតម្រូវឲ្យ គ.ជ.ប គិតគូរថា តើនៅពេលបងប្អូនជនពិការចូលរួមការបោះឆ្នោត? តើគាត់គិតគូរយ៉ាងដូចម្តេច ដើម្បីធានាថា គ្រប់ប្រជាជនទាំងអស់បូកបញ្ចូលបងប្អូនជនពិការ ត្រូវបានគេយកចិត្តទុកដាក់ខ្ពស់ ដែលអាចមានលទ្ធភាពជ្រើសរើសថ្នាក់ដឹកនាំដែលខ្លួនស្រឡាញ់? សំឡេងឆ្នោតរបស់ជនពិការមួយសន្លឹក ស្មើនឹងគុណតម្លៃអ្នកមិនពិការមួយសន្លឹកដូចគ្នា»។
សេចក្តីព្រាងគោលនយោបាយរបស់អង្គការជនពិការកម្ពុជា នេះ គឺទាមទារឲ្យ គ.ជ.ប មានបទប្បញ្ញត្តិលើកទឹកចិត្តដល់ជនពិការ ជាអ្នកអង្កេតការណ៍បោះឆ្នោត និងឈរឈ្មោះជ្រើសតាំងជាតំណាងរាស្ត្រ។ ការិយាល័យបោះឆ្នោតនីមួយៗ ត្រូវបង្កលក្ខណៈងាយស្រួលដល់ជនពិការគ្រប់ប្រភេទ។ រាល់ការផ្សព្វផ្សាយដែលទាក់ទងការបោះឆ្នោតទាំងនៅមុន អំឡុងពេល និងបន្ទាប់ពីការបោះឆ្នោត ត្រូវធានាថា ជនពិការគ្រប់ប្រភេទអាចទទួលយកបានទាំងអស់ ពោលគឺត្រូវប្រើភាសាសញ្ញា និងអក្សរស្ទាបសម្រាប់ជនពិការគថ្លង់ និងភ្នែក។
មន្ត្រីនាំពាក្យនៃគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា អះអាងថា គ.ជ.ប នឹងពិនិត្យមើលចំពោះសេចក្តីព្រាងគោលនយោបាយស្ដីពីបញ្ហាជនពិការនេះ។ លោកបន្តថា គ.ជ.ប បានយកចិត្តទុកដាក់ខ្ពស់ចំពោះបញ្ហាជនពិការ ក្នុងន័យគាំទ្រឲ្យមានការចូលរួមសកម្មភាពនយោបាយ៖ «គ.ជ.ប នឹងបង្កើតគណៈកម្មាធិការចំពោះកិច្ច ដើម្បីទទួលបន្ទុកបញ្ហាស្ត្រី ជនជាតិដើមភាគតិច និងជនពិការ។ ដូច្នេះ គោលនយោបាយផ្សេងៗទៀត គ.ជ.ប កំពុងពិនិត្យពិចារណាដើម្បីដាក់បញ្ចូលក្នុងច្បាប់បោះឆ្នោតថ្មី ក្នុងន័យលើកស្ទួយបងប្អូនស្រីជនជាតិដើមភាគតិច និងជនពិការ»។
ធនាគារពិភពលោក (World Bank) និងធនាគារអភិវឌ្ឍន៍អាស៊ី (ADB) បង្ហាញថា ទិន្នន័យជនពិការនៅកម្ពុជាបច្ចុប្បន្នមាន ១០ ទៅ ១៥ភាគរយនៃប្រជាជនសរុប ប៉ុន្តែរដ្ឋាភិបាលអះអាងថា តួលេខជនពិការបច្ចុប្បន្នមាន ២,១ភាគរយ ស្មើប្រមាណជាង ៣៣ម៉ឺននាក់នៃប្រជាជនសរុប។
ការបោះឆ្នោតជ្រើសតាំងតំណាងរាស្ត្រអាណត្តិទី៥ កន្លងទៅ ពុំមានទិន្នន័យណាមួយបញ្ជាក់បានទេថា តើមានជនពិការប៉ុន្មាននាក់បានបោះឆ្នោត? ប៉ុន្តែអង្គការជនពិការកម្ពុជា អះអាងថា មានជនពិការជាង ២ពាន់នាក់ដែលបានចូលរួមបោះឆ្នោត ហើយនៅអាណត្តិទី៦ ក្រោយនេះ អង្គការជនពិការកម្ពុជា នឹងជំរុញឲ្យជនពិការចូលរួមបោះឆ្នោតឲ្យបាន ៣ម៉ឺននាក់។
ក្នុងច្បាប់ស្ដីពីកិច្ចការពារ និងលើកកម្ពស់សិទ្ធិជនពិការចែងថា ជនពិការទាំងអស់ត្រូវបានធានាការចូលរួមក្នុងវិស័យនយោបាយ ប៉ុន្តែក្នុងមាត្រាខ្លះនៃច្បាប់បោះឆ្នោតថ្មី មានការរើសអើងចំពោះជនពិការ ដូចជាប្រើពាក្យជនវិកលចរិត មិនអាចបោះឆ្នោតបាន ដែលមិនបញ្ជាក់ថា តើជនពិការវិកលចរិតនោះស្ថិតក្នុងកម្រិតណា? ដោយឡែកអនុសញ្ញាស្ដីពីសិទ្ធិជនពិការមាត្រាទី២៩ បានចែងថា ការចូលរួមរបស់ជនពិការ ត្រូវតែធានាថា គ្មានការរើសអើង។ ទោះបីជាបែបនេះក្តី ជនពិការនៅកម្ពុជា នៅតែរងការរើសអើងដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។