ព្រះមហាក្សត្រកម្ពុជា ព្រះបាទសម្ដេចព្រះបរមនាថ នរោត្តម សីហមុនី បានចេញព្រះរាជក្រឹត្យតែងតាំងលោក កើត សុធា ជាអភិបាលនៃគណៈអភិបាលខេត្តប៉ៃលិន ជំនួសលោក អ៊ី ឈាន។
ព្រះរាជក្រឹត្យរបស់ព្រះមហាក្សត្របានសរសេរថា លោក អ៊ី ឈាន ត្រូវឲ្យមកបម្រើការនៅក្រសួងមហាផ្ទៃ វិញ។
លោកឧត្ដមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ នៅថ្ងៃទី២៩ ឧសភា បញ្ជាក់ឲ្យដឹងអំពីការផ្លាស់ប្ដូរតំណែងនេះ ហើយលោកបានឲ្យដឹងបន្ថែមថា លោក អ៊ី ឈាន បានជាប់ឆ្នោតជាប្រធានក្រុមប្រឹក្សាខេត្តប៉ៃលិន កូតាមកពីគណបក្សប្រជាជនកម្ពុជា។
លោក ខៀវ សុភ័គ បានឲ្យដឹងទៀតថា នៅថ្ងៃទី៣១ ឧសភា លោក ស ខេង ឧបនាយករដ្ឋមន្រ្តី និងជារដ្ឋមន្ត្រីក្រសួងមហាផ្ទៃ មានគម្រោងធ្វើដំណើរទៅខេត្តប៉ៃលិន ដើម្បីចូលរួមជាអធិបតីក្នុងពិធីប្រកាសក្រុមប្រឹក្សាខេត្តប៉ៃលិន ចូលកាន់មុខតំណែង។
នៅកម្ពុជា ក្នុងរចនាសម្ព័ន្ធការងារ តំណែងប្រធានក្រុមប្រឹក្សាខេត្ត មិនកាន់អំណាចបញ្ជាការងារប្រចាំថ្ងៃដូចគណៈអភិបាលខេត្តទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។