មន្ត្រីជាន់ខ្ពស់ក្រសួងមហាផ្ទៃ អះអាងថា មន្ត្រីជំនាញកំពុងពិនិត្យមើលលិខិតរបស់គណបក្សហ្វ៊ុនស៊ិនប៉ិច (FUNCINPEC) ដែលទាមទារអោយមានវិធានការផ្លូវច្បាប់ចំពោះលោក ញឹក ប៊ុនឆៃ ដែលយករូបសញ្ញាគណបក្សចាស់វស្សាមួយនេះ ទៅប្រើប្រាស់សម្រាប់ផលប្រយោជន៍គណបក្សថ្មី។ យ៉ាងណាក្តី លោក ញឹក ប៊ុនឆៃ នៅតែប្រកាន់ជំហរប្រើស្លាកគណបក្សដែលមានរូបវិមានឯករាជ្យដដែល ហើយនឹងព្រមានប្ដឹងគ្រប់គ្រងគណបក្សហ្វ៊ុនស៊ុនប៉ិច វិញទៀតផង ប្រសិនបើសម្ដេចក្រុមព្រះនៅតែជំទាស់នោះ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ក្រសួងមហាផ្ទៃ បានទទួលលិខិតចំនួន ៣ នៅបន្ទាប់ពីអ្នកនយោបាយជើងចាស់គឺសម្តេចក្រុមព្រះ នរោត្តម រណឫទ្ធិ និងលោក ញឹក ប៊ុនឆៃ មានទំនាស់នយោបាយ រហូតមិនអាចបន្តរួមរស់ក្រោមដំបូលគណបក្សហ្វ៊ុនស៊ិចប៉ិច តែមួយ តទៅទៀត។
លោក ខៀវ សុភ័គ បញ្ជាក់ថា មន្ត្រីជំនាញក្រសួងមហាផ្ទៃ កំពុងពិនិត្យមើលលិខិតទាំងនោះ ហើយក្នុងរយៈពេលកន្លះខែ ទើបជូនដំណឹងតបវិញបាន ថាតើលោក ញឹក ប៊ុនឆៃ អតីតអនុប្រធាន នៃគណបក្សហ្វ៊ុនស៊ិចប៉ិច និងមានតំណែងជាទីប្រឹក្សារបស់រដ្ឋាភិបាល ឋានៈស្មើឧបនាយករដ្ឋមន្ត្រី អាចបើកគណបក្សថ្មីដែលប្រើរូបសញ្ញាគណបក្សហ្វ៊ុនស៊ិនប៉ិច ចាស់បាន ឬមិនបាន៖ «មន្ត្រីជំនាញរបស់ក្រសួងមហាផ្ទៃ កំពុងពិនិត្យលើលិខិតនោះ តាមផ្លូវច្បាប់រយៈពេល ១៥ថ្ងៃ ក្រោយទទួលបានលិខិតស្នើសុំរបស់គណបក្សឯកឧត្ដម ញឹក ប៊ុនឆៃ នេះ ថាបើកបាន ឬមិនបានយ៉ាងណាអាស្រ័យទៅលើមន្ត្រីជំនាញ ស្នើសុំយោបល់សម្រេចពីសម្ដេចក្រឡាហោមឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ»។
វិវាទរឿងស្លាកគណបក្សនេះ កើតឡើតនៅបន្ទាប់ពីលោក ញឹក ប៊ុនឆៃ ដើរចេញពីគណបក្សហ៊្វុស៊ិនប៉ិច ហើយស្នើសុំក្រសួងមហាផ្ទៃ បង្កើតគណបក្សថ្មីឈ្មោះថា គណបក្សខ្មែររួបរួមជាតិដែលប្រើស្លាកសញ្ញាគណបក្សហ្វ៊ុនស៊ិនប៉ិច ចាស់មានរូបវិមានឯករាជ្យ។ ភ្លាមៗនោះ សម្ដេចក្រុមព្រះព្រះប្រធានគណបក្សហ្វ៊ុនស៊ិនប៉ិច បានដាក់ពាក្យជំទាស់ ហើយសុំឲ្យក្រសួងមហាផ្ទៃ មានវិធានការផ្លូវច្បាប់ទៀតផង។
ថ្លែងក្នុងសន្និសីទសារព័ត៌មាននៅថ្ងៃទី៥ ខែកុម្ភៈ លោក ញឹក ប៊ុនឆៃ នៅតែប្រកាន់ជំហរមិនផ្លាស់ប្ដូររូបសញ្ញាគណបក្សរបស់លោក ព្រោះស្លាកសញ្ញានោះ គឺគណបក្សហ្វ៊ុនស៊ិនប៉ិច បានបោះបង់ចោលទៅហើយ។ លោកជឿជាក់ថា ក្រសួងមហាផ្ទៃ នឹងមិនជំទាស់ចំពោះបញ្ហានេះឡើយ៖ «ស្លាកឡូហ្គោ វិមានឯករាជ្យដែលជាស្នាព្រះហស្តសម្ដេចឪសម្ដេចតា ដែលសម្ដេចក្រុមព្រះបានបោះបង់ចោលទៅហើយនោះ គឺពួកយើងខ្ញុំដែលភាគច្រើនលើសលប់ជាអ្នកដង្ហែរតាមសម្ដេចព្រះ នរោត្តម សីហនុ ក្នុងទស្សវត្ស៨០ តស៊ូនោះ គឺថាចង់លើកជ្រោងយករូបវិមានឯករាជ្យជាស្នាប្រហស្ថឡើងវិញ»។
លោក ញឹក ប៊ុនឆៃ បញ្ជាក់ដែរថា ប្រសិនបើសម្ដេចក្រុមព្រះនៅតែជំទាស់មិនអនុញ្ញាតឲ្យលោកប្រើស្លាកសញ្ញាគណបក្សហ្វ៊ុនស៊ិនប៉ិច ចាស់ទេនោះ លោកនឹងប្តឹងបកដើម្បីគ្រប់គ្រងគណបក្សហ្វ៊ុនស៊ិនប៉ិចវិញ ព្រោះសមាជលើកដំបូងកាលពីថ្ងៃ១៩ ខែមករា ឆ្នាំ២០១៥ គឺខុសច្បាប់លក្ខន្តិកៈគណបក្ស។ លោករម្លឹករឿងនេះថា កាលណោះ សមាជិកចូលរួមសមាជភាគច្រើនលើសលប់គឺមកពីគណបក្សសង្គមរាស្ត្ររាជាធិបតេយ្យ ដែលលើកដៃអនុម័តជ្រើសរើសសម្ដេចក្រុមព្រះជាប្រធានគណបក្សហ្វ៊ុនស៊ិនប៉ិច។
ទាក់ទិនបញ្ហានេះ នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) លោក គល់ បញ្ញា លើកឡើងថា អ្នកនយោបាយដែលចេញពីសម្បុកតែមួយនេះ នៅតែស្រឡាញ់ប្រវត្តិ និងស្លាកសញ្ញាគណបក្ស និងឧត្តមគតិនៃគណបក្សហ្វ៊ុនស៊ិនប៉ិច នេះដូចគ្នា។
ទន្ទឹមគ្នានេះ លោក គល់ បញ្ញា ស្នើឲ្យអ្នកនយោបាយទាំងពីរនេះ គួរតែជជែកដោះស្រាយបញ្ហានេះដោយខ្លួនឯង ជាជាងយកបញ្ហានេះទៅរំខានដល់ស្ថាប័នរដ្ឋ៖ «ប្រព័ន្ធការពារឡូហ្គោនេះ គឺនៅក្នុងច្បាប់របស់យើង ភាគច្រើននិយាយថា កុំអោយមានត្រួតដូចគ្នា ប៉ុន្តែសួរថា តើការពារឡូហ្គោដែលជាប្រវត្តិគណបក្សនឹងមួយដែរ ឬអត់? ដូច្នេះវាមិនដឹងដោះស្រាយរបៀបម៉េចទេ ព្រោះថា គ្មាននីតិវិធីច្បាស់លាស់ ព្រោះវាជារឿងសីលធម៌ ការយល់យោគ មិនមែនជារឿងច្បាប់ទម្លាប់ដែលកាត់សេចក្តីរឿងហ្នឹងទេ»។
លោក គល់ បញ្ញា បញ្ជាក់ថា តាមបទពិសោធន៍ គឺគណបក្សដែលមាននិន្នាការរាជានិយមនេះ នឹងកាន់តែថយកម្លាំងគាំទ្រ ក្រោយបែកគ្នាជាពីរក្រុមនេះទៅ។
យ៉ាងណាក៏ដោយចុះ លោក ញឹក ប៊ុនឆៃ មានគម្រោងរៀបចំធ្វើសមាជនៅថ្ងៃទី២៧ ខែកុម្ភៈ ខាងមុខនេះ ប្រសិនបើក្រសួងមហាផ្ទៃ អនុញ្ញាត។ លោកអះអាងថា អតីតមន្ត្រី ឬសកម្មជនគណបក្សហ្វ៊ុនស៊ិនប៉ិច រួមមានគណៈកម្មាធិការអចិន្ត្រយ៍ គណៈកម្មការនាយក ក្រុមប្រឹក្សាជាតិតំណាងឲ្យភូមិ-ឃុំ អគ្គលេខាធិការរង និងគណៈកម្មការប្រតិបត្តិនៅតាមបណ្ដាខេត្តនានាជាច្រើនទៀត ដែលមានទាំងអស់ជាង ២សែន ៥ម៉ឺននាក់ បានចូលរួមជីវភាពជាមួយគណបក្សថ្មីរបស់លោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។