ជាក់ស្ដែង នៅខេត្តបាត់ដំបង មន្ត្រីគណបក្សហ៊្វុនស៊ិនប៉ិច ឲ្យដឹងថា មានប្រជាពលរដ្ឋច្រើននាក់ខកខានពុំបានចុះឈ្មោះបោះឆ្នោត។
គណបក្សហ៊្វុនស៊ិនប៉ិច ចោទថា អាជ្ញាធរមូលដ្ឋានឃុំព្រៃចាស់ ស្រុកឯកភ្នំ ខេត្តបាត់ដំបង មានការរើសអើងប្រកាន់និន្នាការគណបក្សនយោបាយ បណ្ដាលឲ្យអ្នកភូមិជាច្រើននាក់ ពុំមានឈ្មោះបោះឆ្នោតនៅឆ្នាំ២០១៣។
មន្ត្រីគណបក្សហ៊្វុនស៊ិនប៉ិច ប្រចាំឃុំព្រៃចាស់ លោក អ៊ឹម កេង ថ្លែងនៅថ្ងៃទី២១ ខែមិថុនា ថា ប្រជាពលរដ្ឋនៅក្នុងមូលដ្ឋានបាននាំគ្នាយកឯកសារប្រគល់ជូនអាជ្ញាធរភូមិកោះជីវាំង ឃុំព្រៃចាស់ ដើម្បីចុះឈ្មោះបោះឆ្នោត ប៉ុន្តែមន្ត្រីមូលដ្ឋានភូមិឃុំនោះពុំបានចុះឈ្មោះឲ្យពួកគាត់នោះឡើយ។ បញ្ហានេះ បានធ្វើឲ្យអ្នកភូមិច្រើននាក់ប្រឈមនឹងការខកខានពុំបានបោះឆ្នោត៖ «ប្រជាពលរដ្ឋសុំចុះឈ្មោះបោះឆ្នោតបីនាក់ គេអត់ចុះឲ្យផង ឈ្មោះ រ៉ើន វីរៈ កើតនៅថ្ងៃទី៦ ខែកញ្ញា ឆ្នាំ១៩៩៥ ឈ្មោះ ឈឿន នេតា ថ្ងៃទី១០ ខែកញ្ញា ឆ្នាំ១៩៩៦ និងឈ្មោះ លី ឡុង កើតឆ្នាំ១៩៨១ សុំចុះពីខែកញ្ញា ឆ្នាំ២០១២ ហើយសួរទៅស្មៀន គេថាមេភូមិរាយការណ៍ប៉ុនណា គេចុះប៉ុណ្ណឹង។ ដូច្នេះ វានៅក្នុងការប្រកាន់បក្ខពួក»។
លោកអះអាងថា នៅមានប្រជាពលរដ្ឋជាច្រើនទៀតនៅឃុំព្រៃចាស់ ស្រុកឯកភ្នំ ខេត្តបាត់ដំបង ពុំទាន់បានចុះឈ្មោះបោះឆ្នោត។
ទាក់ទិនការចោទប្រកាន់របស់មន្ត្រីគណបក្សហ៊្វុនស៊ិនប៉ិច នេះ មេភូមិកោះជីវាំង លោក សេក ស៊ិន បញ្ជាក់ថា ប្រជាពលរដ្ឋទាំងបីនាក់ដែលពុំទាន់បានចុះឈ្មោះ ដោយសារពួកគេពុំទាន់គ្រប់អាយុ ១៨ឆ្នាំ។
ស្មៀនឃុំព្រៃចាស់ លោក ឆាយ សុផាត ថ្លែងថា រាល់ឆ្នាំអាជ្ញាធរភូមិឃុំបានដើរស្រង់ឈ្មោះប្រជាពលរដ្ឋដែលគ្រប់អាយុ ១៨ឆ្នាំ ដើម្បីយកពួកគាត់ទៅចុះឈ្មោះ ប៉ុន្តែករណីខាងលើដោយសារអ្នកភូមិពីរនាក់មិនទាន់គ្រប់អាយុ និងម្នាក់ទៀតដែលលើសអាយុហើយនោះ ពុំបានទៅបង្ហាញខ្លួន ហើយពួកគេបានពឹងពាក់ឲ្យសាច់ញាតិយកឯកសារទៅចុះឈ្មោះជំនួសនោះ មិនអាចធ្វើទៅបានទេ៖ «ធម្មតាដូចរៀងរាល់ឆ្នាំអ៊ីចឹង ឈ្មោះណាដែលមានអាយុ ១៨ឆ្នាំ អ៊ីចឹងគឺខ្ញុំឲ្យមេភូមិចុះបានប៉ុន្មានភូមិ។ អ៊ីចឹងនៅក្នុងបញ្ជី ខ្ញុំអាចចុះឲ្យអ្នកណាស្លាប់ ប៉ុន្តែអ្នកមិនទាន់គ្រប់អាយុ មិនអាចចុះបានទេ អោយតែគ្រប់ថ្ងៃខែឆ្នាំកំណើត គឺចុះហើយអត់មាន»។
លោកបញ្ជាក់ថា ប្រជាពលរដ្ឋដែលគ្រប់អាយុ ១៨ឆ្នាំ គឺអាចចុះឈ្មោះបានទាំងអស់ លើកលែងតែប្រជាពលរដ្ឋដែលជាអ្នកធ្វើចំណាកស្រុកទៅរកការងារនៅក្រៅប្រទេស។
ប្រជាពលរដ្ឋនៅឃុំព្រៃចាស់ ដែលមានឈ្មោះបោះឆ្នោតមានចំនួនជាង ២ពាន់នាក់។
ប្រធានគណៈកម្មការរៀបចំការបោះឆ្នោតខេត្តបាត់ដំបង លោក វន ពន ពន្យល់ថា តាមច្បាប់បោះឆ្នោត ប្រជាពលរដ្ឋដែលគ្រប់អាយុ ១៨ឆ្នាំ អាចចុះឈ្មោះបោះឆ្នោតបាន ប៉ុន្តែសាមីខ្លួនត្រូវទៅបង្ហាញខ្លួនជូនស្មៀនឃុំសង្កាត់នៅពេលចុះឈ្មោះ៖ «តាមមាត្រា ៥៤ថ្មី ដើម្បីចុះឈ្មោះ អត់មានស្នើអ៊ីចឹងបានទេ គឺត្រូវតែបង្ហាញខ្លួននៅមុខស្មៀនឃុំសង្កាត់ ទើបអាចចុះឈ្មោះបាន ហើយការផ្ញើអ៊ីចឹងអត់បានទេ។ សាមីខ្លួនត្រូវតែបង្ហាញមុខ ដើម្បីស្មៀនគេសួរនាំថា យើងធ្លាប់ចុះឈ្មោះហើយឬនៅ»។
គណៈកម្មការរៀបចំការបោះឆ្នោតខេត្តបាត់ដំបង ឲ្យដឹងថា ចំនួនប្រជាពលរដ្ឋដែលមានឈ្មោះបោះឆ្នោតនៅក្នុងខេត្តបាត់ដំបង សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៥ ឆ្នាំ២០១៣ នេះ មានចំនួនជាង ៧០ម៉ឺននាក់។ ចំនួននេះមានការកើនឡើងច្រើនជាងការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់ឆ្នាំ២០១២ កន្លងទៅ ដែលមានចំនួនត្រឹមតែជាង ៦៩ម៉ឺននាក់ប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។