លោកនាយករដ្ឋមន្ត្រី ហ៊ុន សែន នឹងដឹកនាំគណៈប្រតិភូកម្ពុជា ទៅបំពេញទស្សនកិច្ចផ្លូវការជាបន្តបន្ទាប់នៅប្រទេស២ដោយឡែកពីគ្នា គឺនៅសាធារណរដ្ឋអាហ្សែរបៃហ្សាន (Republic of Azerbaijan) នៅថ្ងៃទី២១ ដល់ថ្ងៃទី២៣ ខែមេសា ឆ្នាំ២០១៤ និងនៅសាធារណរដ្ឋបេឡារុស្ស (Republic of Belarus) ចាប់ពីថ្ងៃទី២៣ ដល់ថ្ងៃទី២៥ ខែមេសា ឆ្នាំ២០១៤។
សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី១១ ខែមេសា ឆ្នាំ២០១៤ បានឲ្យដឹងថា ក្នុងដំណើរទស្សនកិច្ចនៅសាធារណរដ្ឋអាហ្សែរបៃហ្សាន លោកនាយករដ្ឋមន្ត្រី ហ៊ុន សែន នឹងជួបជាមួយប្រធានាធិបតីអាហ្សែរបៃហ្សាន លោក អ៊ីលហាម អាលីយេវ (Ilham Aliyev) និងប្រធានសភា លោក អុកតៃ អាសាដូវ (Oktay Asadov)។ ក្រៅពីនេះ លោកនាយករដ្ឋមន្ត្រី ហ៊ុន សែន ក៏នឹងជួបពិភាក្សាការងារទ្វេភាគីជាមួយនាយករដ្ឋមន្ត្រី លោក អាធួ រ៉ាស៊ី-ហ្សាដ (Artur Rasi-Zade)។ ក្នុងដំណើរទស្សនកិច្ចនេះ ក៏នឹងមានការចុះហត្ថលេខាលើអនុស្សរណៈនៃការយោគយល់គ្នា ស្ដីពីការបង្កើតកិច្ចពិគ្រោះយោបល់ទ្វេភាគីផងដែរ។
ចំណែកនៅសាធារណរដ្ឋបេឡារុស្ស វិញ ប្រមុខរដ្ឋាភិបាលកម្ពុជា នឹងជួបជាមួយប្រធានាធិបតីបេឡារុស្ស លោក អាឡិចសាន់ដឺរ ឡូកាសីនកូ (Aleksandr Lukashenko) និងប្រធានក្រុមប្រឹក្សារដ្ឋសភាជាតិ លោក អាន់ណាតូលី រូប៊ីននូវ (Anatoly Rubinov) ហើយនឹងជួបពិភាក្សាការងារទ្វេភាគីជាមួយនាយករដ្ឋមន្ត្រី លោក មីខាយ មីយ៉ាសនីកូវិច (Mikhai Myasnikovich)។
ប្រមុខរដ្ឋាភិបាលនៃប្រទេសទាំងពីរ ក៏នឹងធ្វើជាសាក្សីក្នុងពិធីចុះហត្ថលេខាលើឯកសារចំនួន៩ រួមមាន កិច្ចព្រមព្រៀងស្ដីពីកិច្ចសហប្រតិបត្តិការលើវិស័យសុខភាពសាធារណៈ កិច្ចព្រមព្រៀងសហប្រតិបត្តិការរវាងក្រសួងឧស្សាហកម្ម និងសិប្បកម្មកម្ពុជា និងក្រសួងឧស្សាហកម្មបេឡារុស្ស កិច្ចព្រមព្រៀងសហប្រតិបត្តិការរវាងក្រសួងរ៉ែ និងថាមពលកម្ពុជា និងក្រសួងឧស្សាហកម្មបេឡារុស្ស កិច្ចព្រមព្រៀងស្ដីពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ច កិច្ចព្រមព្រៀងស្ដីពីការជំរុញ និងការការពារការវិនិយោគទៅវិញទៅមក កិច្ចព្រមព្រៀងស្ដីពីសហប្រតិបត្តិការបច្ចេកទេសយោធា អនុស្សរណៈនៃការយោគយល់គ្នា ស្ដីពីការបង្កើតទំនាក់ទំនងមិត្តភាព និងកិច្ចសហប្រតិបត្តិការរវាងកម្ពុជា និងបេឡារុស្ស អនុស្សរណៈនៃការយោគយល់គ្នារវាងធនាគារជាតិកម្ពុជា និងបេឡារុស្ស និងអនុស្សរណៈនៃការយោគយល់គ្នា ស្ដីពីកិច្ចសហប្រតិបត្តិការលើវិស័យកសិកម្ម។
អមដំណើរលោកនាយករដ្ឋមន្ត្រី ហ៊ុន សែន ក្នុងដំណើរបំពេញទស្សនកិច្ចទៅកាន់ប្រទេសទាំង ២នេះ រួមមាន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា លោក ហោ ណាំហុង រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល និងសមាជិករដ្ឋាភិបាលកម្ពុជា មួយចំនួនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។