លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី១៩ ខែមីនា ថ្លែងជាថ្មីម្តងទៀតដោយចាត់ទុក លោក កឹម សុខា អនុប្រធានគណបក្សសង្គ្រោះជាតិ ថាកំពុងឋិតក្នុងពិរុទ្ធភាពជាមេដឹកនាំនៃការផ្ដួលរំលំរដ្ឋាភិបាលស្របច្បាប់របស់លោក។
លោក ហ៊ុន សែន ក៏បានបញ្ជាឲ្យកងកម្លាំងប្រដាប់អាវុធ ត្រៀមខ្លួន ត្រៀមខ្នោះ ដើម្បីទប់ទល់នឹង លោក កឹម សុខា ប្រសិនបើ លោក កឹម សុខា ហ៊ានចេញតវ៉ាឲ្យមានការដោះលែង លោក មាជ សុវណ្ណារ៉ា នៅក្រោយចូលឆ្នាំខ្មែរនោះ។
រីឯប្រធានគណបក្សសង្គ្រោះជាតិ លោក សម រង្ស៊ី វិញ ថ្លែងថា រដ្ឋាភិបាលមិនត្រូវប្រើវប្បធម៌គំរាមកំហែងនោះទេ។
បើទោះជា លោក កឹម សុខា និងអ្នកនាំពាក្យគណបក្សសង្គ្រោះជាតិ បានចេញមុខបកស្រាយរួចហើយថា ការថ្លែងរបស់ លោក កឹម សុខា ទៅកាន់អ្នកគាំទ្រគណបក្សសង្គ្រោះជាតិ នៅក្រៅប្រទេសកាលពីពេលថ្មីៗនេះ ថាការផ្លាស់ប្ដូររដ្ឋាភិបាលដែលគណបក្សប្រឆាំងបានទាមទារកន្លងមក គឺជាការទាមទារផ្លាស់ប្ដូរតាមរយៈការបោះឆ្នោត និងមិនមែនជាការផ្ដួលរំលំដោយហិង្សាក្តី ក៏មិនអាចធ្វើឲ្យ លោក ហ៊ុន សែន ស្ងប់ចិត្ត ឬថយកំហឹងឡើយ។
ថ្លែងក្នុងពិធីប្រគល់ប័ណ្ណជ័យលាភីអាហារូបករណ៍ដល់និស្សិតសាកលវិទ្យាល័យកម្ពុជា នៅវិទ្យាស្ថានជាតិអប់រំ មុនពេលដែលលោកត្រូវទៅចូលរួមប្រជុំសភា លោក ហ៊ុន សែន បញ្ជាក់ថា លោកមិនចង់ឆ្លើយឆ្លងទៅនឹងពាក្យសម្ដីរបស់អ្នកនាំពាក្យគណបក្សសង្គ្រោះជាតិ នោះឡើយ ប៉ុន្តែលោកថា ការស្រែកទាមទារឲ្យលោកចុះចេញពីតំណែងនៅក្រោយការបោះឆ្នោតឆ្នាំ២០១៣ ជាចេតនាផ្ដួលរំលំរដ្ឋាភិបាលរបស់លោក។ លោក ហ៊ុន សែន បានចោទសួរទៅវិញថា ប្រសិនបើវាជាការផ្លាស់ប្ដូរតាមរយៈការបោះឆ្នោតមែន ហេតុអ្វីចាំបាច់មានការតវ៉ានៅក្រោយការបោះឆ្នោត?
ពាក់ព័ន្ធនឹងរឿងនេះដែរ លោក ហ៊ុន សែន អះអាងថា សំណុំរឿងរបស់ លោក កឹម សុខា មាន ៨ចំណុច។ យ៉ាងណា លោក ហ៊ុន សែន មិនបានបញ្ជាក់ចំណុចទាំង៨នោះមានអ្វីខ្លះនោះទេ។ លោក ហ៊ុន សែន ក៏ឲ្យដឹងដែរថា លោក កឹម សុខា ប៊ិះត្រូវបានសមត្ថកិច្ចចាប់ខ្លួនតាំងពីថ្ងៃទី១៥ ខែកក្កដា ឆ្នាំ២០១៤ ប៉ុន្តែដោយសារលោកយល់ថា ប្រតិបត្តិការរបស់រដ្ឋាភិបាល គឺត្រូវធ្វើតែទៅលើអ្នកនៅលើសមរភូមិជាក់ស្តែង ដូច្នេះ ទើបសមត្ថកិច្ចមិនចាប់ខ្លួន លោក កឹម សុខា ហើយទុកឲ្យតុលាការកោះហៅលោកទៅសាកសួរវិញក្នុងនាមលោកជាប្រធានស្តីទីគណបក្សសង្គ្រោះជាតិ នៅពេលនោះ។ យ៉ាងណាក៏ដោយនៅពេលនេះ លោក ហ៊ុន សែន បញ្ជាក់ថា លោកទុកលទ្ធភាពឲ្យតុលាការជាអ្នកធ្វើការវិនិច្ឆ័យទៅលើ លោក កឹម សុខា។
លោក ហ៊ុន សែន ក៏សម្ដែងការខឹងសម្បារ និងហួសចិត្តចំពោះ លោក កឹម សុខា ដែលថ្លែងថាមិនពេញចិត្តនឹងកិច្ចព្រមព្រៀងបញ្ចប់វិបត្តិនយោបាយកាលពីថ្ងៃទី២២ ខែកក្កដា ឆ្នាំ២០១៤ និងពាក្យសម្ដីរបស់ លោក កឹម សុខា ដែលថ្លែងថាមិនអាចទទួលយកបានទេ ប្រសិនបើមិនមានការដោះលែង លោក មាជ សុវណ្ណារ៉ា នៅមុនពេលចូលឆ្នាំខ្មែរខាងមុខ។ លោក ហ៊ុន សែន ក៏បានផ្តែផ្តាំទៅពលរដ្ឋខ្មែរនៅសហរដ្ឋអាមេរិក ឲ្យសួរទៅ លោក កឹម សុខា ថា ប្រសិនបើមិនពេញចិត្តនឹងកិច្ចព្រមព្រៀង ២២ខែកក្កដា នោះទេ ហេតុអ្វីបានជា លោក កឹម សុខា ព្រមទទួលយកតំណែងអនុប្រធានទី១រដ្ឋសភា? ហេតុអ្វីមិនប្រគល់តំណែងនេះឲ្យសមាជិកណាមួយរបស់គណបក្សសង្គ្រោះជាតិ? លើសពីនេះ លោក ហ៊ុន សែន ក៏ចង់ដឹងដែរថា តើ លោក កឹម សុខា នឹងធ្វើអ្វីទៀតបើ លោក មាជ សុវណ្ណារ៉ា មិនអាចចេញពីគុកនោះ?
លោក ហ៊ុន សែន បន្តថា៖ «ធាតុផ្សំកំពុងរង់ចាំ លោក កឹម សុខា កងរាជអាវុធហត្ថ នគរបាល ត្រៀមខ្លួន ត្រៀមខ្នោះ រឿងច្បាប់នៅសភាមិនពាក់ព័ន្ធនឹងរឿងដំណើរការក្តីនៅតុលាការនោះទេ កុំថានាយករដ្ឋមន្ត្រីត្រួតត្រាកម្លាំងប្រដាប់អាវុធ ចុះបើធ្វើនាយករដ្ឋមន្ត្រីមិនអាចគ្រប់គ្រងកម្លាំងប្រដាប់អាវុធបាន មិនបាច់ធ្វើនាយករដ្ឋមន្ត្រីនោះទេ»។
លោក ហ៊ុន សែន អះអាងថា បើសិនជាលោកមិនបកស្រាយអំពីរឿង លោក កឹម សុខា ឲ្យពលរដ្ឋបានដឹងនោះទេ វានឹងធ្វើឲ្យមានការភ័ន្តច្រឡំមិនត្រឹមតែទៅលើរដ្ឋសភាដែលមានសមាជិកមកពីគណបក្សទាំងពីរនោះទេ ប៉ុន្តែវាក៏ធ្វើឲ្យមានការភ័ន្តច្រឡំនៅក្នុងគណបក្សសង្គ្រោះជាតិ ផងដែរ។ លោក ហ៊ុន សែន ក៏មិនភ្លេចព្រមានជាថ្មីថា លោក កឹម សុខា អាចនឹងត្រូវប្រឈមនឹងការបោះឆ្នោតទម្លាក់ពីអនុប្រធានទី១សភាដដែល ប្រសិនបើ លោក កឹម សុខា នៅតែរំលោភលើបទឈប់បាញ់ និងនៅបន្តដើរនិយាយប៉ប៉ាច់ប៉ប៉ោចតាមទីសាធារណៈម្តងហើយម្តងទៀត។
ទោះជាយ៉ាងណា សង្គ្រាមពាក្យសម្ដីរវាង លោក ហ៊ុន សែន និងលោក កឹម សុខា កើតឡើងស្របពេលដែលគណបក្សប្រជាជនកម្ពុជា និងគណបក្សសង្គ្រោះជាតិ កំពុងតែត្រូវរ៉ូវគ្នាទៅលើការអនុម័តច្បាប់បោះឆ្នោតថ្មី។
ប្រធានគណបក្សសង្គ្រោះជាតិ លោក សម រង្ស៊ី ដែលបានចូលរួមប្រជុំសភាជាមួយ លោក ហ៊ុន សែន នៅថ្ងៃទី១៩ មីនា បានបដិសេធមិនឆ្លើយតបទៅនឹងសំណួរដែលសួរថា តើលោកគិតយ៉ាងម៉េច បើរដ្ឋាភិបាលចាប់ខ្លួន លោក កឹម សុខា ដាក់គុកនោះ? ប៉ុន្តែលោកបញ្ជាក់យ៉ាងខ្លីថា គ្រប់ភាគីគួរតែយោគយល់គ្នាដោះស្រាយបញ្ហាជាតិ ហើយរដ្ឋាភិបាលមិនត្រូវប្រើវប្បធម៌គំរាមកំហែងនោះឡើយ។
លោក សម រង្ស៊ី បន្តថា៖ «បញ្ហាដែលពាក់ព័ន្ធទាំងប៉ុន្មាន ត្រូវដោះស្រាយឲ្យត្រឹមត្រូវទាន់ពេលវេលា។ យើងត្រូវតែរកវិធីធ្វើឲ្យរឿងនេះឲ្យវាចប់ កុំឲ្យចេះតែអូសបន្លាយទៀត»។
ចំណែកអ្នកវិភាគនយោបាយឯករាជ្យ លោកបណ្ឌិត សុខ ទូច វិញយល់ឃើញថា វាគ្រាន់តែជាល្បែងនយោបាយដែលមេដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ រួមគ្នាសម្ដែង ដើម្បីទាក់ទាញការចាប់អារម្មណ៍ពីអ្នកគាំទ្ររៀងៗខ្លួនប៉ុណ្ណោះ។ លោកបណ្ឌិត សុខ ទូច ថ្លែងថា ការដែល លោក កឹម សុខា ទៅក្រៅប្រទេសនិយាយពីការផ្លាស់ប្ដូររដ្ឋាភិបាល ដោយសារគណបក្សសង្គ្រោះជាតិ ព្រួយបារម្ភពីការបាត់បង់ការគាំទ្ររបស់ពលរដ្ឋនៅក្រៅប្រទេសចំពោះគណបក្សរបស់ខ្លួន។ មួយវិញទៀត គណបក្សប្រឆាំងមួយនេះ ក៏ខ្លាចពលរដ្ឋនៅក្រៅប្រទេសងាកទៅគាំទ្រគណបក្សថ្មី ដូចជាក្រុមបណ្ដាញសង្គម ជាដើម។
ទាក់ទងការគំរាមកំហែងចាប់ខ្លួនរបស់ លោក ហ៊ុន សែន លើ លោក កឹម សុខា មែន លោកបណ្ឌិត សុខ ទូច មានប្រសាសន៍ថា វាមិនអាចទៅរួចនោះទេ ព្រោះ លោក កឹម សុខា មានអភ័យឯកសិទ្ធិសភាដែលតុលាការមិនអាចធ្វើអ្វីបានឡើយ ប៉ុន្តែលោកថា លោក កឹម សុខា អាចប្រឈមនឹងការបាត់បង់តំណែងអនុប្រធានទី១រដ្ឋសភា ប្រសិនបើគណបក្សប្រជាជនកម្ពុជា ចង់ទម្លាក់លោកមែននោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។