អ្នកនាំពាក្យគណបក្សប្រជាជនកម្ពុជា ចាត់ទុកការរិះគន់របស់លោក កឹម សុខា នៅប្រទេសនូវែលហ្សេឡង់ (New Zealand)លើបក្សកាន់អំណាច ថាយកក្បួនចាស់របស់លោក សម រង្ស៊ី ដើម្បីរកលុយជួយបក្សប្រឆាំងក្នុងដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់។ អ្នកវិភាគនយោបាយយល់ថា នេះគឺជាយុទ្ធសាស្ត្រម្នាក់មួយបែបជាមួយបក្សកាន់អំណាច ដើម្បីរកថវិកាទ្រទ្រង់បក្សក្នុងដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់។
ប្រធានគណបក្សសង្គ្រោះជាតិ មានជំនឿថា គណបក្សនេះបានដើរតាមផ្លូវត្រូវ ហើយការស្ទង់មតិវិញ ទាំងផ្លូវការ និងមិនផ្លូវការ បង្ហាញថាគណបក្សនឹងទទួលជ័យជម្នះសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤។
ថ្លែងនៅចំពោះមុខអ្នកគាំទ្រនៅទីក្រុងអកឡែន (Auckland) ប្រទេសនូវែលហ្សេឡង់ កាលពីថ្ងៃទី៧ ខែមេសា លោក កឹម សុខា ប្រធានគណបក្សសង្គ្រោះជាតិ បានបង្អួតពីកម្លាំងបេក្ខជនមេឃុំរបស់គណបក្សដែលដណ្ដើមគ្នាឈរឈ្មោះ។ លោក កឹម សុខា លើកឡើងថា គឺជាប្រវត្តិសាស្ត្ររបស់គណបក្សប្រឆាំងដែលបានដាក់បេក្ខជនបានគ្រប់ទាំង ១.៦៤៦ឃុំ-សង្កាត់ទូទាំងប្រទេស។
ក្រៅពីបង្អួតកម្លាំង និងឆន្ទៈរបស់គណបក្សប្រឆាំង លោក កឹម សុខា បានរិះគន់ភាពអវិជ្ជមានរបស់គណបក្សកាន់អំណាចទាំងនៅតាមឃុំ-សង្កាត់ និងនៅថ្នាក់ជាតិ៖ « ហើយកន្លងមកនេះ បងប្អូនឃើញហើយ ម៉ាឃុំមានតែ ២ម៉ឺន ៣ម៉ឺន ហើយទៅអភិវឌ្ឍភូមិ - ឃុំយ៉ាងម៉េចកើត ? ប្រជាពលរដ្ឋជនបទនៅតែក្រីក្រ ... ។ យើងអត់ចង់ឲ្យដឹកនាំជាបុគ្គលទេ យើងអត់គិតថាមានតែបុគ្គលណាម្នាក់ទេ ដែលអាចរៀបចំប្រទេសឲ្យមានសន្តិភាព យើងអត់ចង់ត្រូវការចឹងទេ។ យើងចង់ថាអ្នកណាក៏មេដឹកនាំបានដែរ ដោយយើងរៀបចំដឹកនាំជាប្រព័ន្ធ »។
លោក កឹម សុខា បានដឹកនាំអនុប្រធាន និងមន្ត្រីរបស់ខ្លួនដើម្បីទៅជួបជាមួយក្រុមសមាជិកសភា និងមន្ត្រីរដ្ឋាភិបាលនៃប្រទេសនូវែលហ្សេឡង់ និងអូស្ត្រាលី កាលពីថ្ងៃទី៥ ខែមេសា។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ហៅការស្ទង់មតិដែលលើកឡើងដោយលោក កឹម សុខា ថាជាគំនិតគ្រូទាយ។ លោក សុខ ឥសាន មើលឃើញការរិះគន់របស់លោក កឹម សុខា ថាជាយុទ្ធសាស្ត្រចាស់ដែលលោក សម រង្ស៊ី ធ្លាប់បោកប្រាស់ និងអង្គាសលុយអ្នកគាំទ្រមកជួយគណបក្ស៖ « ដូចខ្ញុំថាចឹង គណបក្សប្រឆាំងកាលណាគាត់មិនថាមាន អត់មានអភិវឌ្ឍហើយ បានសេចក្តីថាវាមានហើយ មិនអាចគេចរួចទេ បើគាត់និយាយថាមានការអភិវឌ្ឍនៅតាមភូមិ ឃុំ សង្កាត់ ឃុំហ្នឹង បានសេចក្តីថាគាត់លើកទឹកចិត្ត គាត់លើកគុណសម្បត្តិគណបក្សកាន់អំណាច ចឹងមានថាអត់ បើអត់វាផ្ទុយពីការពិត »។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ នឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២០១៧។ សង្គ្រាមសម្ដីវាយប្រហារគ្នាបានចាប់ផ្ដើមតាំងពីមុនរដូវឃោសនា។
ប្រធានក្រុមអ្នកវិភាគវ័យក្មេង លោក ហង្ស វិទូ ចាត់ទុកយុទ្ធសាស្ត្រលោក កឹម សុខា ជាការដើរផ្លូវត្រូវ។ លោកយល់ដូចលោក សុខ ឥសាន ថាលោក កឹម សុខា ទៅជួបអ្នកគាំទ្រដើម្បីរកលុយ តែលោក ហង្ស វិទូ មើលឃើញថា វិធីរបស់បក្សកាន់អំណាចមានវិធីជាច្រើន ពោលគឺច្រើនជាងគណបក្សប្រឆាំង ដើម្បីប្រមូលធនធានទ្រទ្រង់គណបក្ស៖ « ទោះបីជាគេប្រើវិធីសាស្ត្រណាមួយក្នុងការប្រមូលនូវធនធានសម្រាប់បក្ស អាហ្នឹងគឺជារឿងរបស់គេទេ »។
ការបោះឆ្នោតក្រុមប្រឹក្សាឃុំ-សង្កាត់អាណត្តិទី៤ មានគណបក្សចំនួន១២ បានចុះបញ្ជីនៅគណៈកម្មាធិការជាតិរៀបចំការបោះឆ្នោត (គ.ជ.ប)។ បើទោះបីជារដូវកាលឃោសនាបោះឆ្នោតក្រុមប្រឹក្សាឃុំ-សង្កាត់មិនទាន់ចូលដល់ ក៏គណបក្សនយោបាយធំៗបានបង្ហាញសាច់ដុំរៀងៗខ្លួនបណ្ដើរៗហើយដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។