អនុប្រធានគណបក្សសង្គ្រោះជាតិ លោក កឹម សុខា នៅព្រឹកថ្ងៃទី១៨ កញ្ញា ថ្លែងថា ការមិនចង់ផ្លាស់ប្ដូរ គឺប្រឆាំងនឹងគំនិតរបស់យុវជន។ តំណាងគណបក្សប្រជាជនកម្ពុជា មិនប្រតិកម្មលើសេចក្ដីថ្លែងនេះទេ ប៉ុន្តែរង់ចាំមើលសកម្មភាពរបស់រចនាសម្ព័ន្ធយុវជនសង្គ្រោះជាតិ។
សេចក្ដីថ្លែងការណ៍របស់លោក កឹម សុខា អំពីការលើកស្ទួយយុវជន គឺធ្វើឡើងនៅក្នុងពិធីជួបសំណេះសំណាលគ្នាមួយជាមួយមេដឹកនាំចលនាយុវជនសង្គ្រោះជាតិ មកពីខេត្តព្រះសីហនុ កោះកុង កំពង់ឆ្នាំង និងខេត្តកែប នៅព្រឹកថ្ងៃទី១៨ កញ្ញា៖ « យុវជន គឺជាកម្លាំងថ្មី ។ យុវជន គឺជាគំនិតថ្មី។ យុវជនជាអ្នកនាំមកនូវការផ្លាស់ប្ដូរពិតប្រាកដ ។ អ្នកទាំងឡាយណាដែលមិនចង់ឲ្យមានការផ្លាស់ប្ដូរ គឺប្រឆាំងនឹងគំនិតរបស់យុវជន ហើយ»។
មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន មិនបានចាត់ទុកសេចក្ដីថ្លែងការណ៍របស់លោក កឹម សុខា ជាបញ្ហានាំឲ្យឈឺក្បាលវិលមុខអ្វីទេដល់គណបក្សប្រជាជនកម្ពុជា ព្រោះនេះជាសេចក្ដីថ្លែងអំពីគោលនយោបាយរបស់គណបក្សសង្គ្រោះជាតិ៖ « អាហ្នឹងជាគោលនយោបាយរបស់គាត់ ។ យើងចាំមើល បើគោលនយោបាយហ្នឹងល្អ អាហ្នឹងវាមានប្រសិទ្ធភាព ហើយបើគោលនយោបាយមិនល្អទេ អាហ្នឹងវាគ្មានការគាំទ្រទេ » ។
លោក កឹម សុខា ថ្លែងឲ្យដឹងដែរថា ដោយសារតែការឲ្យតម្លៃដល់យុវជន គណៈកម្មាធិការអចិន្ត្រៃយ៍នៃគណបក្សសង្គ្រោះជាតិ បានសម្រេចថា នឹងបង្កើតក្រុមប្រឹក្សាយុវជនថ្នាក់ជាតិមួយសម្រាប់គណបក្សនេះនៅពេលខាងមុខនេះ៖ « គណបក្សសង្គ្រោះជាតិ មិនត្រឹមតែបង្កើតចលនា យុវជនសង្គ្រោះ ជាតិ នៅតាមបណ្ដាខេត្ត នានាទេ។ យើងនឹងបង្កើតក្រុមប្រឹក្សាយុវជនគណបក្ស សង្គ្រោះជាតិ ទាំងមូលតែម្ដង ពីព្រោះយើងចង់ ឲ្ យក្រុមប្រឹក្សាសង្គ្រោះជាតិ នេះ ចូលរួមដោយផ្ទាល់ ហើយយ៉ាង ពេញទំហឹងក្នុងការកំណត់គោលនយោបាយគណបក្ស ដើម្បីយុវជនដោយខ្លួនឯង » ។
ពាក់ព័ន្ធនឹងបញ្ហានេះ លោក សុខ ឥសាន មានប្រសាសន៍បន្ថែមថា លោកមិនមានប្រតិកម្មអ្វីចំពោះការបង្កើតអង្គការចាត់តាំងយុវជនរបស់គណបក្សសង្គ្រោះជាតិ ទេ ដោយលោកចាត់ទុកថា វាអាស្រ័យលើតម្រូវការរបស់មហាជននៃគណបក្សនីមួយៗ។ លោកបញ្ជាក់បន្ថែមថា រចនាសម្ព័ន្ធយុវជននេះមិនមានអ្វីប្លែកថ្មីទេ ព្រោះរចនាសម្ព័ន្ធនៅក្នុងគណៈកម្មាធិការកណ្ដាលរបស់គណបក្សប្រជាជនកម្ពុជា ត្រូវបានរៀបចំបែងចែករួចហើយអំពីការលើកស្ទួយតួនាទីយុវជនរបស់ខ្លួន។
រហូតមកដល់ពេលនេះ ពាក្យថាផ្លាស់ប្ដូរនៅតែជាពាក្យមួយពេញនិយមរបស់គណបក្សប្រឆាំង។ ដោយឡែករដ្ឋាភិបាលដែលដឹកនាំដោយគណបក្សប្រជាជនកម្ពុជា តែងរសើបនឹងការផ្លាស់ប្ដូរ ជាពិសេសទម្រង់ផ្លាស់ប្ដូរដោយបដិវត្តន៍។ លើសពីនេះទៀត ទាំងប្រមុខដឹកនាំរដ្ឋាភិបាល និងកងកម្លាំងប្រដាប់អាវុធ តែងចេញសេចក្ដីថ្លែងការណ៍គំរាមជាមុនថា នឹងកម្ចាត់រាល់បាតុកម្មរបស់គណបក្សសង្គ្រោះជាតិ។
ទោះបីជាលោក សុខ ឥសាន មិនចាប់អារម្មណ៍នឹងការបង្កើតអង្គការចាត់តាំងលើកស្ទួយយុវជនរបស់គណបក្សសង្គ្រោះជាតិ ដើម្បីឲ្យមានការផ្លាស់ប្ដូរការដឹកនាំប្រទេសក្ដី ក៏លោកនឹងពិនិត្យមើលសកម្មភាពយុវជនរបស់គណបក្សសង្គ្រោះជាតិ៖ « បើសកម្មភាពណាឆ្លុះបញ្ចាំងពីការ ធ្វើសកម្មភាព ចង់ផ្ដួលរំលំរាជរដ្ឋាភិបាលស្របច្បាប់ អាហ្នឹងបានយើងមានហេតុផលគ្រប់គ្រាន់ ដើម្បីចោទ គេ។ បើគ្រាន់តែគេបង្កើតប្រមូលផ្ដុំជាយុវជន អាហ្នឹងវាធម្មតាទេ វាមានយុវជន វាមាន មនុស្សចាស់ វាមានបុរសវ័យកណ្ដាលអី អាហ្នឹងវារចនាសម្ព័ន្ធនៅក្នុងគណបក្សគេ។ អាហ្នឹងអាស្រ័យ លើការ ច្នៃ ប្រឌិតរបស់មេបក្សនីមួយៗ ដើម្បីធ្វើម៉េចឲ្យវាមានការប្រមូលផ្ដុំទៅតាមមជ្ឈដ្ឋានមហាជននីមួយៗ ដើម្បីងាយស្រួលក្នុង ការ បំពាក់បំប៉ន អប់រំ ឬមួយក៏ធ្វើសកម្មភាពអីមួយបម្រើឲ្យនយោបាយរបស់គណបក្ស » ។
ពេលនេះជាសប្ដាហ៍លើកទីពីរហើយ ដែលគណបក្សសង្គ្រោះជាតិ ចាប់ផ្ដើមបង្កើតកម្មវិធីជួបសំណេះសំណាលរាល់ថ្ងៃអាទិត្យរវាងអ្នកដឹកនាំយុវជនតាមខេត្ត និងថ្នាក់ដឹកនាំគណបក្សនេះនៅឯទីស្នាក់ការកណ្ដាលរបស់ខ្លួន ដែលមានលោក កឹម សុខា ចេញមកថ្លែងសារនយោបាយទៅថ្នាក់ដឹកនាំយុវជនទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។