លោក កឹម សុខា ព្រមាន​បក្ស​កាន់​អំណាច​ឲ្យ​ត្រៀម​ខ្លួន​ធ្វើ​ជា​បក្ស​ប្រឆាំង

ដោយ វណ្ណ វិចារ
2014.10.23
កឹម សុខា ៦២០ អនុប្រធាន​គណបក្ស​សង្គ្រោះ​ជាតិ លោក កឹម សុខា ថ្លែង​សារ​ទៅ​កាន់​អ្នក​គាំទ្រ​នា​ខេត្ត​សៀមរាប នៅ​ថ្ងៃ​ទី​៦ ខែ​កញ្ញា ឆ្នាំ​២០១៤។
RFA/Hang Savyouth

មេ​ដឹក​នាំ​គណបក្ស​សង្គ្រោះ​ជាតិ ព្រមាន​គណបក្ស​កាន់​អំណាច ឲ្យ​ត្រៀម​ខ្លួន​ធ្វើ​ជា​បក្ស​ប្រឆាំង។ ការ​អះអាង​នេះ ធ្វើ​ឡើង​ដោយ​អនុប្រធាន​ទី​១​រដ្ឋសភា និង​ជា​ប្រធាន​ស្តីទី​គណបក្ស​សង្គ្រោះ​ជាតិ លោក កឹម សុខា នៅ​ព្រឹក​ថ្ងៃ​ទី​២៣ តុលា ក្នុង​ថ្ងៃ​ប្រារព្ធ​ខួប​លើក​ទី​២៣​ ​នៃ​កិច្ច​ព្រមព្រៀង​ទីក្រុង​ប៉ារីស ស្ដីពី​កម្ពុជា ក្នុង​បរិវេណ​ទីស្នាក់ការ​គណបក្ស​សង្គ្រោះ​ជាតិ។

គណបក្ស​សង្គ្រោះ​ជាតិ ជា​បក្ស​នយោបាយ​តែ​មួយ​គត់​នៅ​កម្ពុជា ដែល​រៀបចំ​រំឭក​ខួប​លើក​ទី​២៣ នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស ២៣ តុលា ឆ្នាំ​១៩៩១។

ខណៈ​ដែល​គណបក្ស​ហ៊្វុនស៊ិនប៉ិច ចេញ​សេចក្តី​ថ្លែងការណ៍​រំឭក​ប្រវត្តិសាស្ត្រ និង​វីរភាព​អតីត​ព្រះ​មហា​វីរក្សត្រ។ រីឯ​គណបក្ស​ប្រជាជន​កម្ពុជា បាន​ត្រឹម​អនុញ្ញាត​ឲ្យ​មន្ត្រី​របស់​ខ្លួន​ឈប់​សម្រាក​តាម​ប្រតិទិន​ឈប់​សម្រាក​ប្រចាំ​ឆ្នាំ។

ខួប​នៃ​សន្និសីទ​ទីក្រុង​ប៉ារីស ត្រូវ​បាន​រាជ​រដ្ឋាភិបាល​ដែល​ដឹក​នាំ​ដោយ លោក ហ៊ុន សែន លុប​ចោល​ពី​ក្នុង​ប្រតិទិន​ឈប់​សម្រាក​របស់​ជាតិ ចាប់​តាំង​ពី​ឆ្នាំ​២០០៧ គឺ​ពីរ​ឆ្នាំ​បន្ទាប់​ពី​រដ្ឋាភិបាល​បាន​ចុះ​សន្ធិសញ្ញា​បំពេញ​បន្ថែម​ជាមួយ​ប្រទេស​វៀតណាម។រហូត​មក​ដល់​ខែ​តុលា ឆ្នាំ​២០១២ គឺ​បន្ទាប់​ពី​អតីត​ព្រះ​មហា​វីរក្សត្រ ព្រះបាទ​សម្ដេច​ព្រះ នរោត្តម សីហនុ សោយ​ទិវង្គត លោក ហ៊ុន សែន ក៏​បាន​ប្រោស​កិច្ច​ព្រមព្រៀង​នេះ​ឲ្យ​រស់​ឡើង​វិញ។

ប្រធាន​ស្តីទី​គណបក្ស​សង្គ្រោះ​ជាតិ លោក កឹម សុខា មាន​ប្រសាសន៍​ថា គណបក្ស​ប្រជាជន​កម្ពុជា បាន​ព្យាយាម​ម្តង​ជា​ពីរ​ដង ដើម្បី​លុប​បំបាត់​ស្មារតី​បង្រួប​បង្រួម​ជាតិ​កិច្ច​ព្រមព្រៀង​សន្តិភាព​ទីក្រុង​ប៉ារីស។ លោក​បន្ត​ថា បក្ស​កាន់​អំណាច​ព្យាយាម​លើក​ស្ទួយ​ថ្ងៃ​៧ មករា ជា​ថ្ងៃ​ជ័យ​ជម្នះ​លើ​របប ប៉ុល ពត និង​ជា​ថ្ងៃ​ដែល​វៀតណាម វាយ​ទន្ទ្រាន​កាន់​កាប់​ប្រទេស​កម្ពុជា ប៉ុន្តែ​តាំង​ពី​ឆ្នាំ​១៩៩១ មក ពលរដ្ឋ​ខ្មែរ​មិន​ដែល​រស់នៅ​ដោយ​សុខសាន្ត និង​ដោយ​សន្តិភាព​នោះ​ទេ។ លោក​បញ្ជាក់​ថា គណបក្ស​កាន់​អំណាច​ប្រុង​ខ្លួន​ធ្វើ​ជា​បក្ស​ប្រឆាំង​ឲ្យ​ហើយ​ទៅ ព្រោះ​ថា នៅ​អាណត្តិ​ក្រោយ ពលរដ្ឋ​ភាគ​ច្រើន​លើសលប់ នឹង​បោះ​ឆ្នោត​ឲ្យ​គណបក្ស​សង្គ្រោះ​ជាតិ៖ «សំឡេង»។

ទោះ​ជា​បែប​ណា​ក្តី លោក​នាយក​រដ្ឋមន្ត្រី ហ៊ុន សែន ធ្លាប់​មាន​ប្រសាសន៍​ជាច្រើន​ដង​ច្រើន​សា​ថា កិច្ច​ព្រមព្រៀង​ទីក្រុង​ប៉ារីស នេះ ក៏​ជា​សមិទ្ធផល​នៃ​ថ្ងៃ​រំដោះ ៧ មករា ដែរ ហើយ​ស្ថាបនិក​នៃ​កិច្ច​ព្រមព្រៀង​ទីក្រុង​ប៉ារីស គឺ​លោក​ខ្លួន​ឯង​តែ​ម្តង។

នៅ​ក្នុង​សន្ទរកថា​ថ្នាក់​ដឹក​នាំ​ក្នុង​គោល​នយោបាយ​អភិវឌ្ឍន៍​ជាតិ រាជ​រដ្ឋាភិបាល​កម្ពុជា សុទ្ធតែ​បញ្ជាក់​ថា កម្ពុជា មាន​សន្តិភាព​ពេញ​បរិបូរណ៍​កំណើន​សេដ្ឋកិច្ច​ល្អ​ប្រសើរ និង​មាន​ជំនឿ​ដែរ​ថា ពលរដ្ឋ​នឹង​នៅ​តែ​បោះ​ឆ្នោត​ឲ្យ​កាន់​អំណាច។ យ៉ាង​ណា​ក៏ដោយ គណបក្ស​ប្រជាជន​កម្ពុជា បាន​បាត់​បង់​កៅអី​តំណាង​រាស្ត្រ​អស់ ២២​អាសនៈ​រួច​មក​ហើយ​នៅ​អាណត្តិ​ទី​៥​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
សង្គម​ស៊ីវិល​រំពឹង​ថា​ ឯកអគ្គរដ្ឋទូត​អាមេរិក​ប្រចាំ​កម្ពុជា​ថ្មី​នឹង​បន្ត​ចូល​រួម​លើក​ស្ទួយ​ប្រជាធិបតេយ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។