នៅថ្ងៃទី ៩ វិច្ឆិកា នេះប្រជាពលរដ្ឋដែលជាបណ្ដាញសង្គម ប្រមាណជាង២រយនាក់ (២០០) បានជួបជុំគ្នាដើម្បីរិះរកវិធីសាស្ត្រតាមបែបលទ្ធិប្រជាធិបតេយ្យ ដើម្បីរៀបចំឲ្យទៅជាគោលនយោបាយមួយ មុននឹងដាក់ជូនគណបក្សនយោបាយ និងរដ្ឋាភិបាល។
មូលហេតុដែលជំរុញឲ្យក្រុមការងារឃ្លាំមើលសង្គម ពង្រឹងគោលការណ៍ដើម្បីសង្កេតពីអ្នកនយោបាយវិញនៅពេលនេះ បន្ទាប់ពីពិនិត្យឃើញថា អ្នកនយោបាយតែងមិនអនុវត្តដូចការសន្យា ច្រើនអាណត្តិណាស់មកហើយ។
អ្នកចាត់ការទូទៅនៃបណ្ដាញសង្គមនេះ ចាត់ទុកថា ចំណុចសំខាន់នៅពេលនេះ គឺធ្វើយ៉ាងណា រៀបចំ និងប្រមូលព័ត៌មានឲ្យបានគ្រប់ជ្រុងជ្រោយជាមុនសិន មុននឹងចេញគោលការណ៍រួមមួយ ដើម្បីដាក់ជូនគ្រប់គណបក្សនយោបាយ ព្រមទាំងរដ្ឋាភិបាលផង ដែលគោលនយោបាយ ត្រូវបានតាក់តែងឡើងនេះ គឺជាគោលការណ៍ដឹកនាំតាមបែបប្រជាធិបតេយ្យមួយដ៏ជាក់លាក់។
លោក កែម ឡី អ្នកស្រាវជ្រាវការអភិវឌ្ឍន៍សង្គម និងជាផ្នែកមួយនៃក្រុមបណ្ដាញសង្គម ឲ្យដឹងនៅថ្ងៃទី ៩ វិច្ឆិកា ថា ការបង្កើតឲ្យមានកិច្ចពិគ្រោះយោបល់នៅពេលនេះ គឺជាការឆ្លើយតបមួយដ៏មានប្រសិទ្ធភាព នៅក្នុងសង្គមប្រជាធិបតេយ្យ។ លោកចាត់ទុកថាមានតែការចូលរួមពីប្រជាពលរដ្ឋទេ ទើបអាចជំរុញឲ្យសង្គមមួយ ធ្វើដំណើរលើមាគ៌ានៃលទ្ធិប្រជាធិបតេយ្យ ឬថាផ្លាស់ប្ដូរទម្លាប់របស់អ្នកនយោបាយបាន៖ «ប្រសិនបើសមាជិកបណ្ដាញទាំងមូលគាត់ចង់ពេញចិត្តថា ហេ ! កុំបង្កើតគណបក្សប៉ុន្តែនៅក្នុងបណ្ដាញអ៊ីចឹងល្អជាង។ អ៊ីចឹងយើងក៏តាមសមាជិក ប៉ុន្តែបើសមាជិកបណ្ដាញទាំងមូលភាគច្រើន គាត់ថា ហេ ! បើបង្កើតគណបក្សទៅវាជាការល្អប្រសើរព្រោះគណបក្សនេះ គឺមានឱកាសច្រើនដើម្បីអប់រំទៅដល់ប្រជាពលរដ្ឋ តាមគោលការណ៍ប្រជាធិបតេយ្យត្រឹមត្រូវ។ អាហ្នឹងខ្ញុំគិតថា អាស្រ័យទៅលើសេចក្ដីចិត្តរបស់សមាជិក»។
ឆ្លើយតបនឹងសំណួរថាតើបណ្ដាញសង្គមនេះ អាចនឹងបង្កើតជាគណបក្សនយោបាយមួយដែរទេនៅថ្ងៃខាងមុខ។ លោក កែវ ឡី ឆ្លើយបដិសេធវិញភ្លាមថា ចរន្តដែលធ្វើនេះគឺមិនមែនដើម្បីបម្លែងខ្លួនទៅជាបក្សនយោបាយទេ។ ក៏ប៉ុន្តែគឺជាការជួយជ្រោមជ្រែង ផ្នែកកម្មវិធីនយោបាយតាមបែបលទ្ធិប្រជាធិបតេយ្យ ឲ្យគណបក្សនយោបាយទៅវិញ។ បន្ថែមពីលើនេះលោកព្រមានថា តែបើគណបក្សនយោបាយណាមួយ ដែលទទួលបានគោលការណ៍ហើយ មិនអាចអនុវត្តតាមទេ ជម្រើសបន្ទាប់បណ្ដាញសង្គម អាចនឹងបង្កើតជាបក្សនយោបាយដែរ ដើម្បីប្រកួតប្រជែងដោយយុត្តិធម៌។
ការចូលរួមកាលពីព្រឹកថ្ងៃទី ៩ ខែ វិច្ឆិកា នៅការិយាល័យនៃមជ្ឈមណ្ឌលអប់រំច្បាប់សម្រាប់សហគមន៍ ជាទីដែលមានរៀបចំពិធី មានមនុស្សជាង២រយនាក់។ ភាគច្រើននៃពួកគេគឺជាគ្រូបង្រៀន អង្គការមិនមែនរដ្ឋាភិបាលខ្លះ កសិករ សកម្មជនគណបក្សសង្គ្រោះជាតិ ព្រះសង្ឃ គណបក្សហ្វុនស៊ិនប៉ិច និងសមាជិកនៃសមាគមអ្នកប្រជាធិបតេយ្យ។
ជាសាស្ត្រាចារ្យនៅសាកលវិទ្យាល័យភូមិន្ទភ្នំពេញ និង ជាអ្នកសារព័ត៌មានជិត ៣០ឆ្នាំមកនេះ លោក ហែង កូយ ដែលបានចូលរួមផងដែរនោះ យល់ឃើញថា ការបង្កើតបណ្ដាញនៅពេលនេះ គឺពិតជាមានសារសំខាន់ខ្លាំងណាស់ ចំពោះបរិបទនយោបាយនៅកម្ពុជាបច្ចុប្បន្ន។ ក្រៅពីនេះលោក ពុំមានជំនឿទាល់តែសោះថាបក្សនយោបាយសព្វថ្ងៃ អាចកែប្រែចរិតនយោបាយ ដោយអនុវត្តតាមគោលការណ៍ដែលបណ្ដាញសង្គម នឹងដាក់ជូននៅពេលខាងមុខនេះ ដើម្បីជំរុញឲ្យធ្វើដំណើរលើមាគ៌ានៃលទ្ធិប្រជាធិបតេយ្យបាន៖ «ខ្ញុំជឿថាទោះបីបណ្ដាញរីកធំយ៉ាងក៏ដោយ ក៏មិនអាចកែប្រែមេដឹកនាំគណបក្សទាំងពីរមួយជាអ្នកប្រឆាំង មួយជាអ្នកកាន់អំណាច ឲ្យទៅជាអ្នកប្រជាធិបតេយ្យបានដែរ»។
សង្កេតឃើញថា សមាសភាពសំខាន់ៗនៃថ្នាក់ដឹកនាំនៃបណ្តាញសង្គមនៅពេលនេះ ក្រៅពីគ្រប់ភាគីពាក់ព័ន្ធចូលរួមហើយ ក្នុងនោះមានលោក យ៉េង វីរៈ ប្រធានមជ្ឈមណ្ឌលអប់រំច្បាប់សម្រាប់សហគន៍ លោក ប៉ា ងួនទៀង នាយកប្រតិបត្តិនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក កែម ឡី លោក យ៉ង់ សាំងកុមារ ប្រធានអង្គការសេដាក និង លោក សាម អ៊ីន អតីតនាយកប្រតបត្តិនៃអង្គការជីវិតថ្លៃថ្នូរ។
វិទ្យុអាស៊ីសេរី ពុំអាចស្នើសុំការបំភ្លឺបាន ពីគណបក្សនយោបាយទាំងពីរ គឺគណបក្សប្រជាជនកម្ពុជា និង គណបក្សសង្គ្រោះជាតិ។ ក៏ប៉ុន្តែក្នុងពេលកន្លងទៅនេះ គណបក្សសង្គ្រោះជាតិ បានប្រតិកម្មម្ដងជាពីរដងមកហើយ ប្រឆាំងចលនានៃបណ្ដាញសង្គមនេះ។ រហូតធ្វើឲ្យគណបក្សសង្គ្រោះជាតិ សម្រេចសេចក្ដីអំពាវនាវ មិនអនុញ្ញាតឲ្យសកម្មជនរបស់ខ្លួនចូលរួមស្ដាប់ឡើយ។
បណ្ដាញសង្គមនេះដែលមានឈ្មោះជាផ្លូវការនៅក្រសួងមហាផ្ទៃ ថា បណ្ដាញពលរដ្ឋសកម្មបណ្ដាញនេះ បានកើតឡើងតាំងពីមុនបោះឆ្នោតឆ្នាំ២០១២។ បន្ទាប់មកបានវិវត្តន៍ តាមរយៈការជួបជុំទ្រង់ទ្រាយតូច និងធំរហូតមកដល់បច្ចុប្បន្ន។ តាមគម្រោងនៅចុងខែធ្នូឆ្នាំនេះ បណ្ដាញដែលមានឈ្មោះថា បណ្ដាញពលរដ្ឋសកម្ម នឹងរៀបចំឲ្យមានស្ថាបនិកពិតប្រាក់ចំនួន ១៥០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។