ពលរដ្ឋខ្មែរ-អាមេរិកាំង នៅតែរក្សាឆន្ទៈរារាំងមិនឲ្យ លោក ហ៊ុន ម៉ាណែត កូនប្រុសរបស់លោកនាយករដ្ឋមន្ត្រី ហ៊ុន សែន និងមនុស្សមួយចំនួនទៀត ចូលរួមកម្មវិធីវប្បធម៌ខ្មែរនៅក្នុងទីក្រុងឡុងប៊ិច នៅខែមេសា ខាងមុខនោះទេ។ ពួកគេអះអាងថា លោក ហ៊ុន ម៉ាណែត និងមនុស្សដទៃទៀត អាចជាប់ពាក់ព័ន្ធនឹងការរំលោភសិទ្ធិមនុស្ស។
ពលរដ្ឋខ្មែរ-អាមេរិកាំង ប្រមាណ ៧០០នាក់ បានមកជួបជុំគ្នានៅសាលាក្រុងឡុងប៊ិច កាលពីល្ងាចថ្ងៃអង្គារ ទី២២ មីនា ដើម្បីស្នើដល់អភិបាលក្រុងនេះ ហាមឃាត់ឧត្តមសេនីយ៍ ហ៊ុន ម៉ាណែត និងលោក គិត ម៉េង ប្រធានសភាពាណិជ្ជកម្មកម្ពុជា ចូលរួមក្នុងក្បួនដង្ហែកម្មវិធីប្រពៃណីក្នុងឱកាសបុណ្យចូលឆ្នាំប្រពៃណីជាតិ។
តំណាងសមាគមអតីតយុទ្ធជននៃកងយោធពលខេមរជាតិ អ្នកស្រី ប៉ៃ សុផានី ជាអ្នកចូលរួមកិច្ចប្រជុំក្រុមអភិបាលក្រុងឡុងប៊ិច នោះ សម្ដែងការមិនពេញចិត្តចំពោះអ្នករៀបចំកម្មវិធីបុណ្យចូលឆ្នាំខ្មែរដែលអញ្ជើញ លោក ហ៊ុន ម៉ាណែត ដែលអ្នកស្រីអះអាងថា ជាជនផ្ដាច់ការ និងលោក គិត ម៉េង ដែលជាអ្នកជំនួញមានឈ្មោះមិនល្អ៖ «នាងខ្ញុំ ប៉ៃ សុផានី ជាអតីតតំណាងអតីតយុទ្ធជននៃកងយោធពលខេមរជាតិ រួមនឹងបងប្អូនខ្មែរដែលរស់នៅទីក្រុងឡុងប៊ិច មានការមិនពេញចិត្តនឹងការអញ្ជើញរបស់គណៈកម្មការរៀបចំពិធីបុណ្យចូលឆ្នាំខ្មែរ ដែលនឹងប្រព្រឹត្តទៅនៅខែខាងមុខនេះ ដែលអញ្ជើញឧត្ដមសេនីយ៍ ហ៊ុន ម៉ាណែត ដែលជាមេបញ្ជាការរងកងទ័ពនៃគណបក្សប្រជាជនកម្ពុជា សព្វថ្ងៃ និងជាកូននាយករដ្ឋមន្ត្រី ហ៊ុន សែន ដែលជាជនផ្ដាច់ការនៅប្រទេសកម្ពុជា ព្រមទាំងឧកញ៉ា គិត ម៉េង ដែលជានាយឈ្មួញមានឈ្មោះមិនល្អនៅក្នុងប្រទេសកម្ពុជា»។
លោក មណ្ឌល គីរី ជាអ្នកចូលរួមការតវ៉ាមតិម្នាក់ទៀត ថ្លែងប្រាប់វិទ្យុអាស៊ីសេរី កាលពីថ្ងៃពុធ ទី២៣ មីនា ថា ក្រុមរបស់លោកដែលជាពលរដ្ឋខ្មែរ-អាមេរិកាំង កើតទុក្ខមិនសុខចិត្តចំពោះវត្តមានរបស់ លោក ហ៊ុន ម៉ាណែត និងលោក គិត ម៉េង ដែលនឹងចូលរួមក្នុងពិធីបុណ្យចូលឆ្នាំនៅក្នុងទីក្រុងឡុងប៊ិច នាពេលខាងមុខនេះទេ។
លោក មណ្ឌល គីរី បន្តថា ក្រុមរបស់លោកជាពលរដ្ឋខ្មែរ-អាមេរិកាំង ដែលមិនមាននិន្នាការបម្រើឲ្យផលប្រយោជន៍របស់គណបក្សនយោបាយណាមួយឡើយ ហើយលោកសម្ដែងនូវសុទិដ្ឋិនិយមថា ចៅហ្វាយក្រុងនឹងចេញលិខិតជាផ្លូវការ រារាំងមិនឲ្យលោកទាំងពីរមកកាន់ទីក្រុងឡុងប៊ិច តាមការចង់បានរបស់មតិភាគច្រើនរបស់ពលរដ្ឋនៅទីនោះ៖ «ខ្ញុំឈ្មោះ មណ្ឌល គីរី ហៅ វណ្ណ ដេត។ ក្នុងជំនួបពីថ្ងៃអង្គារ ទី២២ យើងខ្ញុំជាខ្មែរ-អាមេរិកាំង នៅទីក្រុងឡុងប៊ិច មិនសុខចិត្តចំពោះវត្តមានរបស់លោក ហ៊ុន ម៉ាណែត និងលោក គិត ម៉េង»។
វិទ្យុអាស៊ីសេរី កាលពីថ្ងៃពុធ ទី២៣ មីនា ព្យាយាមសុំការបកស្រាយជាច្រើនដងពី លោក សាន រីច្ឆឺ (Richer San)ជាអ្នករៀបចំកម្មវិធីបុណ្យចូលឆ្នាំនៅទីក្រុងឡុងប៊ិច តែទូរស័ព្ទរបស់លោកពុំមានអ្នកទទួលឡើយ។
ពលរដ្ឋខ្មែរ-អាមេរិកាំង នឹងត្រៀមធ្វើបាតុកម្មប្រឆាំងនឹងវត្តមានរបស់ លោក ហ៊ុន ម៉ាណែត នៅទីតាំងចំនួន ៤កន្លែងផ្សេងៗពីគ្នា គឺទីមួយនៅទីក្រុងឡុងប៊ិច (Long Beach) រដ្ឋកាលីហ្វ័រញ៉ា (California) នៅថ្ងៃទី១០ មេសា។ ទីពីរ នៅទីក្រុងហ្វលរីវឺ (Fall River) រដ្ឋម៉ាស្សាឈូសេត (Massachusetts) នៅថ្ងៃទី១៥ មេសា។ ទីបី នៅទីក្រុងឡូវែល (Lowell) នៅថ្ងៃទី១៦ មេសា និងទីបួន នៅទីក្រុងតាកូម៉ា (Tacoma) រដ្ឋវ៉ាស៊ីនតុន (Washington State)។ គម្រោងនេះពុំទាន់មានកាលបរិច្ឆេទច្បាស់លាស់នៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។