ប្រធានក្រុមតំណាងរាស្ត្រនៃគណបក្សជាប់ឆ្នោតទាំងពីរ ជួបគ្នានៅព្រឹកថ្ងៃទី២៩ ខែមករា នាវិមានរដ្ឋសភា ដើម្បីពង្រឹងវប្បធម៌សន្ទនា និងជជែកពីដំណើរការនៃកំណែទម្រង់ការបោះឆ្នោត បន្ទាប់ពីខកខានមិនជួបគ្នាកាលពីថ្ងៃទី២៧ ខែមករា។
នេះជាជំនួបលើកទី១ បន្ទាប់ពីរដ្ឋសភាទើបតែបង្កើតឲ្យមានក្រុមតំណាងរាស្ត្រភាគតិច ខណៈដែលប្រធានក្រុមតំណាងរាស្ត្រទាំងពីរ បានអះអាងពីការប្រើប្រាស់វប្បធម៌ចរចា ដើម្បីដោះស្រាយវិបត្តិនយោបាយដែលកើតមាន បើទោះបីជាលោកនាយករដ្ឋមន្ត្រី ហ៊ុន សែន បានប្រកាសថា វប្បធម៌នេះ គ្មានប្រសិទ្ធភាពយ៉ាងណាក្ដី។
យោងតាមសេចក្ដីប្រកាសព័ត៌មានរបស់អគ្គលេខាធិការដ្ឋានរដ្ឋសភា គណបក្សប្រជាជនកម្ពុជា មាន លោក ស ខេង ជាប្រធានក្រុមតំណាងរាស្ត្រ លោក គាត ឈន់ និងអ្នកស្រី ម៉ែន សំអន ជាអនុប្រធាន។ គណបក្សសង្គ្រោះជាតិ មានលោក សម រង្ស៊ី ជាប្រធានក្រុមតំណាងរាស្ត្រ លោក កឹម សុខា ជាអនុប្រធាន និងលោក យឹម សុវណ្ណ ជាលេខាធិការ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា ជំនួបនេះជាការចាប់ផ្ដើមដំបូងនៃការជជែកគ្នារបស់គណបក្សទាំង២ បន្ទាប់ពីបង្កើតប្រធានក្រុមភាគតិចនៅក្នុងរដ្ឋសភា។
លោកបន្តថា គណបក្សសង្គ្រោះជាតិ ស្នើឲ្យមានវប្បធម៌ជជែកគ្នារវាងថ្នាក់ដឹកនាំគណបក្សនៅមូលដ្ឋាន បន្ទាប់ពីថ្នាក់ដឹកនាំថ្នាក់ជាតិបានបង្កើតវប្បធម៌នេះរួចហើយ៖ «យើងចង់ឲ្យថ្នាក់ដឹកនាំទាំងពីរបក្សនៅថ្នាក់មូលដ្ឋានធ្វើម៉េច បង្កើតវប្បធម៌ជជែកគ្នាដើម្បីផលប្រយោជន៍ជាតិ និងផលប្រយោជន៍ប្រជាពលរដ្ឋនៅមូលដ្ឋាន»។
ក្រៅពីនេះ លោក យឹម សុវណ្ណ ថា ក្រុមការងារទាំងពីរគណបក្សក៏នឹងជជែកគ្នាអំពីប្រធានក្រុមភាគតិចក្នុងសភាដែរ។ លោករំពឹងថា ក្រោយការជជែកគ្នានោះ ថ្នាក់ដឹកនាំគណបក្សនៅមូលដ្ឋាននឹងមានទំនាក់ទំនងល្អនឹងគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។