រដ្ឋសភាគ្រោងរៀបចំសិក្ខាសាលាមួយអំពីការកសាងក្របខណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈសម្រាប់ការគ្រប់គ្រងថវិកាជាតិ ឆ្នាំ២០១៦ នៅសប្ដាហ៍ក្រោយ ។
អង្គការមិនមែនរដ្ឋាភិបាលដែលឃ្លាំមើលដំណើរការ និងការប្រព្រឹត្តទៅរបស់រដ្ឋសភាយល់ឃើញថា លទ្ធផលដែលទទួលបានពីការចាយនៃកញ្ចប់ថវិកាជាតិរាល់ដង គឺមិនស៊ីគ្នាទៅនឹងសកម្មភាពជាក់ស្ដែងម្ដងណានោះទេ។
អ្នកសម្របសម្រួលបណ្ដាញរួបរួមគណនេយ្យភាពសង្គមប្រចាំអាស៊ីបូព៌ា និងប៉ាស៊ីហ្វិក នៅតែបង្ហាញក្តីកង្វល់អំពីការអនុម័តថវិកាជាតិនេះ ដោយចាត់ទុកថា ច្បាប់នេះអាចនឹងនៅតែបញ្ហាដូចមុន។
ការរិះគន់របស់អង្គការមិនមែនរដ្ឋាភិបាលទៅលើសេចក្ដីព្រាងច្បាប់ដែលគ្រោងនឹងរៀបចំសិក្ខាសាលានៅថ្ងៃទី១៩ ខែឧសភា ស្តីពីការចាយវាយថវិកាជាតិសម្រាប់ឆ្នាំ២០១៦ នៅពេលនេះ ធ្វើឡើង ២ថ្ងៃបន្ទាប់ពីរដ្ឋសភាចេញសេចក្តីប្រកាសព័ត៌មានកាលពីថ្ងៃទី១១ ខែឧសភា កន្លងទៅ។
លោក សន ជ័យ អ្នកសម្របសម្រួលបណ្តាញរួបរួមគណនេយ្យភាពសង្គមប្រចាំអាស៊ីបូព៌ា និង ប៉ាស៊ីហ្វិក ឲ្យដឹងនៅថ្ងៃទី១៣ ខែឧសភា ថា លោកមិនសង្ឃឹមទាល់តែសោះ ទាក់ទិនសេចក្តីព្រាងច្បាប់ថវិកាជាតិសម្រាប់ឆ្នាំថ្មីនេះ ថាអាចបានល្អជាងច្បាប់មុនៗនោះ។ លោកបន្តថា ក្នុងពេលកន្លងទៅ ក្រោយពីរដ្ឋសភាអនុម័តរួច គឺផ្ទុយគ្នាស្រឡះ ពាក់ព័ន្ធការចំណាយ បើធៀបទៅនឹងសកម្មភាពវិញនោះ។
ភាពខ្វះចន្លោះនេះ លោក សន ជ័យ អះអាងថា ដោយសាររាល់សេចក្តីព្រាងច្បាប់ មុនប្រគល់ឲ្យរដ្ឋសភាអនុម័ត គឺមិនដែលឆ្លងកាត់ការពិគ្រោះយោបល់ពីអង្គការដៃគូឲ្យបានស៊ីជម្រៅម្តងណាឡើយ៖ «ច្បាប់ហ្នឹងមុនពេលដែលយកទៅសភា ឥតដែលបានចែកជូនអង្គការសង្គមស៊ីវិល ដើម្បីផ្តល់ជាយោបល់ឲ្យបានច្រើនដែរទេ។ ច្បាប់នេះគឺមិនមានតម្លាភាព តាំងពីផ្តល់អនុសាសន៍ពីសង្គមស៊ីវិលមកម៉្លេះ។ អ៊ីចឹងធ្វើឲ្យយើងបារម្ភ ទាំងការឆ្លើយតបនៃការចំណាយទៅនឹងតម្រូវការរបស់សហគមន៍ របស់ប្រជាពលរដ្ឋ»។
បើទោះជាបែបណា សម្រាប់សេចក្តីព្រាងច្បាប់នៃការចាយវាយសម្រាប់ឆ្នាំ២០១៦ នេះ គឺគេនៅមិនទាន់ទម្លាយឲ្យដឹងនៅឡើយទេ ថាតើទំហំនៃការចំណាយសម្រាប់ឆ្នាំថ្មីនេះ អាចមានកំណើនជាងមុន ឬថយចុះនោះ។
វិទ្យុអាស៊ីសេរី បានព្យាយាមសុំការបំភ្លឺជាច្រើនដងតាមទូរស័ព្ទពីលោក ឈាន វុន មន្រ្តីនាំពាក្យនៃរដ្ឋសភា ក៏ប៉ុន្តែទូរស័ព្ទរបស់លោកពុំមានអ្នកទទួលនៅថ្ងៃទី១៣ ខែឧសភា។
យ៉ាងណាក៏ដោយ លោក សន ជ័យ អះអាងថា តួនាទីរបស់គណបក្សដែលមានសំឡេងភាគតិចនៅក្នុងរដ្ឋសភា ហាក់ប្រើប្រាស់ភារកិច្ចរបស់ខ្លួនបានតិចតួចនៅឡើយ ប្រឆាំងនឹងការអនុម័តជុំវិញការចំណាយថវិកាជាតិម្តងៗនោះ។
ឆ្លើយតបរឿងនេះ លោក យ៉ែម បុញ្ញឫទ្ធិ មន្រ្តីនាំពាក្យគណបក្សសង្រ្គោះជាតិ ថ្លែងថា ការពិតគណបក្សដែលមានសំឡេងភាគតិចនៅក្នុងរដ្ឋសភា ប្រឹងប្រែងសម្បើមណាស់ហើយ ក្នុងការតស៊ូមតិជុំវិញរឿងនេះ។ ក៏ប៉ុន្តែដោយសារពេលវេលាតិចតួចសម្រាប់ការតតាំងនៅក្នុងរដ្ឋសភាដែលជាហេតុធ្វើឲ្យការអនុម័តច្បាប់ នៅតែមិនមានភាពល្អប្រសើរទៅបាន។
លោក យ៉ែម បុញ្ញឫទ្ធិ៖ «មុននឹងចូលទៅដល់គណៈកម្មការជំនាញសេដ្ឋកិច្ច និងហិរញ្ញវត្ថុ មុននឹងដាក់មកសិក្ខាសាលាមុននឹងដាក់ចូលសភាពេញអង្គជាដើម យើងសង្កេតឃើញថា ប្រើពេវេលាខ្លី ហើយពុំសូវបានជជែកលម្អិតឲ្យបានស៊ីជម្រៅ។ ក្រៅពីនេះយើងសង្កេតឃើញថា រាល់ការចំណាយ ឬក៏ការបែងចែកថវិកាជាតិទៅតាមក្រសួងនីមួយៗ ហាក់ដូចជាពុំមានលក្ខណៈសមស្របទៅលើក្រសួងដែលយើងយល់ឃើញថា ជាក្រសួងអាទិភាពនៅឡើយ»។
ជាងនេះទៀត លោក យ៉ែម បុញ្ញឫទ្ធិ ទទួលស្គាល់ថា បញ្ហាកើតឡើងក្រោយការអនុម័តច្បាប់ ដូចជាការចាយវាយមិនត្រឹមត្រូវ ខ្វះតម្លាភាព និងអំពើពុករលួយ គឺពិតជាបន្ទុកដ៏ធ្ងន់ធ្ងរ និងជាជំងឺដ៏រ៉ាំរ៉ៃនៅឡើយពិតមែន។
សម្រាប់សេចក្ដីព្រាងច្បាប់ស្តីពីគ្រប់គ្រងថវិកាជាតិសម្រាប់ឆ្នាំ២០១៥ ដែលរដ្ឋសភាបានអនុម័តដ៏ចម្រូងចម្រាសកាលពីចុងខែវិច្ឆិកា ឆ្នាំ២០១៤ កន្លងទៅវិញ បានកំណត់ការចំណាយថវិការដ្ឋប្រមាណជិត ៤ពាន់លានដុល្លារសហរដ្ឋអាមេរិក។ ការចំណាយនេះ មានកំណើនជិត ១១ភាគរយ បើប្រៀបធៀបទៅនឹងច្បាប់ស្ដីពីហិរញ្ញវត្ថុ ឆ្នាំ២០១៤ ដែលកាលណោះរដ្ឋត្រូវចាយប្រាក់ប្រមាណតែជាង ៣ពាន់លានដុល្លារសហរដ្ឋអាមេរិកប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។