អ្នកនាំពាក្យនៃគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប លោកបណ្ឌិត ហង្ស ពុទ្ធា ឲ្យដឹងនៅថ្ងៃទី២០ ឧសភាថា គ.ជ.ប មិនទាន់ជ្រើសរើសអគ្គលេខាធិការថ្មីនៅឡើយទេ នៅក្នុងដំណាក់កាលនេះ លោក ទេព នីថា នៅតែជាអគ្គលេខាធិការដដែល។
លោក ហង្ស ពុទ្ធា បន្ថែមថា គ.ជ.ប មិនទាន់ជ្រើសអគ្គលេខាធិការថ្មីនេះ ដោយសារតែគ.ជ.បរង់ចាំព្រះរាជក្រឹត្យរបស់ព្រះមហាក្សត្រ ស្ដីពីការបញ្ចូលមន្ត្រីគ.ជ.ប ជាមន្ត្រីរាជការជាមុនសិន។ តែលោកមិនអាចបញ្ជាក់ថា តើពេលណាទើបគ.ជ.បនឹងជ្រើសរើស អគ្គលេខាធិការថ្មីនៅឡើយទេ។
ទាក់ទងនិងបញ្ហានេះ អ្នកឃ្លាំមើលការបោះឆ្នោតលើកឡើងថា អគ្គលេខាធិការនេះ គ.ជ.ប ប្រហែលជារក្សាទុក លោក ទេព នីថា កាន់តួនាទីជាអគ្គលេខាធិការរបស់គ.ជ.បដដែល។ ការរក្សាទុកលោក ទេព នីថា នេះទៅតាមការចង់បានរបស់គណបក្សប្រជាជនកម្ពុជា។
ច្បាប់ស្ដីពីការរៀបចំនិងការប្រព្រឹត្តិទៅនៃគណៈកម្មាធិការជាតិរៀបចំការបោះឆ្នោតចែងថា អគ្គលេខាធិការ អគ្គលេខាធិការរង ត្រូវតែងតាំងដោយព្រះរាជក្រឹត្យ តាមសំណើរបស់ប្រធាន គណៈកម្មាធិការជាតិរៀបចំការបោះឆ្នោត បន្ទាប់ពីសមាជិកគ.ជ.បទាំង៩រូបបានបោះឆ្នោតជ្រើសរើសដោយសំឡេងភាគច្រើនដាច់ខាត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។