គ.ជ.ប.បំផ្លាញសន្លឹកឆ្នោតចាស់ៗលើកទី៣ដើម្បីសន្សំសំចៃការចំណាយ
2014.10.24
គណៈកម្មាធិការជាតិរៀបចំការបោះឆ្នោត (គ.ជ.ប) រៀបចំពិធីបំផ្លាញសន្លឹកឆ្នោតជាលើកទី៣ នៅព្រឹកថ្ងៃទី២៤ ខែតុលា។ ការបំផ្លាញនេះ មន្ត្រី គ.ជ.ប អះអាងថា ធ្វើឡើងស្របតាមច្បាប់កំណត់ និងដើម្បីសន្សំសំចៃការចំណាយសម្រាប់ការថែរក្សា ព្រោះថា គ.ជ.ប ត្រូវរក្សាទុកបន្តទៀតនូវសន្លឹកឆ្នោតដែលប្រើរួចកាលពីឆ្នាំ២០១៣។
សន្លឹកឆ្នោតចាស់ប្រមាណ ២១លានសន្លឹក (២០.៩៩២.៥០៤សន្លឹក) ក្នុងនោះរួមមានសន្លឹកឆ្នោតដែលបានប្រើប្រាស់ក្នុងការបោះឆ្នោតជ្រើសតាំងតំណាងរាស្ត្រឆ្នាំ២០០៨ និងសន្លឹកឆ្នោតដែលបានប្រើប្រាស់ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០១២ ត្រូវបានដឹកជញ្ជូនចេញពីឃ្លាំងគណៈកម្មាធិការជាតិរៀបចំការបោះឆ្នោត ទៅដាក់នៅឃ្លាំងមួយឋិតក្នុងសង្កាត់បឹងកក់១ ខណ្ឌទួលគោក។ នៅទីនោះ សន្លឹកឆ្នោតត្រូវបានគេរើសចេញពីស្បោងដែលមានទាំងអស់ប្រមាណ ៣ម៉ឺន ៥ពាន់កញ្ចប់ (៣៤.៩៨២កញ្ចប់) រួចដាក់ចូលក្នុងម៉ាស៊ីនកាត់ចិញ្ច្រាំជាបន្តបន្ទាប់។
ប្រធានគណៈកម្មាធិការជាតិរៀបចំការបោះឆ្នោត លោក អ៊ឹម សួស្តី ដែលបានចូលរួមក្នុងពិធីបំផ្លាញសន្លឹកឆ្នោតដែរនោះ ថ្លែងថា អនុវត្តតាមច្បាប់ស្ដីពីការជ្រើសតាំងតំណាងរាស្ត្រ និងច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់ តម្រូវឲ្យ គ.ជ.ប រៀបចំគណៈកម្មការមួយ ដើម្បីបំផ្លាញសន្លឹកឆ្នោតដែលបានប្រើប្រាស់ក្នុងការបោះឆ្នោតជ្រើសតាំងតំណាងរាស្ត្រ និងការបោះឆ្នោតជ្រើសរើសក្រុមប្រឹក្សាឃុំសង្កាត់តាមអាណត្តិនីមួយៗ បន្ទាប់ពីរក្សាទុកដោយសុវត្ថិភាពរយៈពេល ៤ឆ្នាំ សម្រាប់ការបោះឆ្នោតជ្រើសតាំងតំណាងរាស្ត្រ និងរយៈពេល ២ឆ្នាំ សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់។
លោក អ៊ឹម សួស្តី បញ្ជាក់បន្ថែមថា ដោយមើលឃើញនូវតម្រូវការផ្នែកច្បាប់ និងស្ថានភាពចាំបាច់របស់ឃ្លាំង ដែលនឹងត្រូវរក្សាទុកសន្លឹកឆ្នោត និងសម្ភារៈបម្រើឲ្យការបោះឆ្នោតខាងមុខៗទៀត គ.ជ.ប ក៏សម្រេចបង្កើតគណៈកម្មការមួយ ដើម្បីដឹកនាំចាត់ចែងការបំផ្លាញសន្លឹកឆ្នោតនៅពេលនេះ។
គ.ជ.ប ប្រកាសថា ការបំផ្លាញនេះ គឺធ្វើឡើងចាប់ពីថ្ងៃទី២៤ តុលា រហូតដល់ចុងសប្ដាហ៍នេះ។ ក្នុងដំណើរការប្រព្រឹត្តទៅនៃការងារបំផ្លាញនេះដែរ គ.ជ.ប ចាត់តាំងមន្ត្រីឲ្យតាមដាន និងត្រួតពិនិត្យជាប្រចាំ ហើយក្នុងរយៈពេលនេះ តំណាងគណបក្សនយោបាយ អ្នកសង្កេតការណ៍ និងអ្នកយកព័ត៌មាន ក៏អាចចូលរួមតាមដានសង្កេតមើលបានផងដែរ។
នាយកប្រតិបត្តិអង្គការខុមហ្វ្រែល (Comfrel) លោក គល់ បញ្ញា មានប្រសាសន៍ថា ការបំផ្លាញសន្លឹកឆ្នោតប្រើប្រាស់រួចដូចនេះ ជារឿងធម្មតាទេ ដើម្បីសម្រួលដល់បញ្ហាកង្វះឃ្លាំងស្តុកទុក។ ទោះជាយ៉ាងណា លោកថា មុនឯកសារទាំងអស់នេះត្រូវបានបំផ្លាញចោល គ.ជ.ប គួរតែបើកចំហឲ្យភាគីពាក់ព័ន្ធ ពិនិត្យមើលសន្លឹកឆ្នោតទាំងនេះជាថ្មី ដើម្បីអាចរៀនសូត្រ ឬធ្វើការប្រៀបធៀបទៅនឹងលទ្ធផលជាក់ស្តែងក្នុងការបោះឆ្នោតកន្លងមក។
លោក គល់ បញ្ញា៖ «យើងត្រូវឲ្យគេធ្វើសវនកម្មពិនិត្យមើល យើងដកពិសោធមើលថា តើកន្លងមកបោះលើសច្រើនហ្នឹង គេយកទៅប្រើប៉ុន្មាន សល់ប៉ុន្មាន។ ហេតុអ្វីលើកក្រោយយើងត្រូវធ្វើឲ្យលើសរហូតដល់ពីរបីលានសន្លឹកអ៊ីចឹង? យើងត្រូវធ្វើសវនកម្ម ពេលខ្លះការបោះឆ្នោតនៅ ៥ឆ្នាំមុនហ្នឹង មានកន្លែងខ្លះមានទំនាស់ អាចបើកឲ្យទូលាយ គេមកធ្វើសវនកម្ម តើសន្លឹកឆ្នោតហ្នឹង ហើយលទ្ធផលហ្នឹងវាដូចគ្នាអត់ ហើយយកជាមេរៀនទេ មិនមែនយកធ្វើជាផ្លាស់ប្ដូរអីទេ អាហ្នឹងឲ្យចឹងទៅ បន្ទាប់មកបំផ្លាញចោលទៅ»។
នេះជាលើកទី៣ហើយដែល គ.ជ.ប រៀបចំឲ្យមានការបំផ្លាញសន្លឹកឆ្នោតប្រើប្រាស់រួចបែបនេះ។ កាលពីឆ្នាំ២០០៥ សន្លឹកឆ្នោតដែលបានប្រើប្រាស់ក្នុងការបោះឆ្នោតឆ្នាំ១៩៩៨ និងឆ្នាំ២០០២ ត្រូវបានបំផ្លាញដោយការដុតកម្ទេច ហើយនៅឆ្នាំ២០០៩ សន្លឹកឆ្នោតដែលបានប្រើប្រាស់ក្នុងការបោះឆ្នោតឆ្នាំ២០០៣ និងឆ្នាំ២០០៧ ក៏ត្រូវបានបំផ្លាញ ប៉ុន្តែដោយការកាត់ចិញ្ច្រាំ។
លោក អ៊ឹម សួស្តី អះអាងថា ការជ្រើសរើសយកវិធីបំផ្លាញដោយការកាត់ចិញ្ច្រាំ គឺជាជម្រើសមួយដ៏ល្អបំផុត ពីព្រោះវាមិនបណ្ដាលឲ្យប៉ះពាល់បរិស្ថាន និងមានលក្ខណៈងាយស្រួលជាងការបំផ្លាញដោយការដុតកម្ទេច៕