គណៈកម្មាធិការជាតិរៀបចំការបោះឆ្នោត (គ.ជ.ប)នឹងបើកវគ្គបណ្ដុះបណ្ដាលអ្នកសារព័ត៌មានពីការចុះឈ្មោះបោះឆ្នោត ដើម្បីរៀបចំបញ្ជីឈ្មោះបោះឆ្នោតថ្មីឆ្នាំ២០១៦។ អ្នកជំនាញផ្នែកប្រព័ន្ធផ្សព្វផ្សាយព័ត៌មាន និងអង្គការសង្គមស៊ីវិល ជំរុញឲ្យអ្នកសារព័ត៌មានពិនិត្យមើលពីបញ្ហាដែលអាចកើតមានក្នុងដំណើរការនេះ ដែលអាចជួយឲ្យដំណើរការនេះប្រព្រឹត្តដោយមានយុត្តិធម៌ និងតម្លាភាព។
គណៈកម្មាធិការជាតិរៀបចំការបោះឆ្នោត កំណត់យកថ្ងៃទី១២ ខែសីហា ខាងមុខជាថ្ងៃបណ្ដុះបណ្ដាលអ្នកសារព័ត៌មានអំពីការចុះឈ្មោះបោះឆ្នោត ដើម្បីរៀបចំបញ្ជីឈ្មោះបោះឆ្នោតថ្មីឆ្នាំ២០១៦។
សមាជិក និងជាអ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍តាមទូរស័ព្ទថា គោលបំណងនៃវគ្គបណ្ដុះបណ្ដាលនេះ គឺផ្ដល់ចំណេះដឹងចាំបាច់នានាដល់អ្នកសារព័ត៌មាន៖ « ដើម្បីឲ្យអ្នកសារព័ត៌មានបានយល់ច្បាស់ពីការចុះឈ្មោះបោះឆ្នោត ។ បើលោកយល់ច្បាស់ហើយ ការផ្សាយ ព័ត៌មាន ចេញក៏មិន ច្រឡំ គឺផ្ដល់ព័ត៌មានពិតដល់សាធារណជន »។
លោក ហង្ស ពុទ្ធា នៅមិនទាន់អាចបញ្ជាក់បានពីចំនួនអ្នកសារព័ត៌មានដែលនឹងចូលរួមវគ្គបណ្ដុះបណ្ដាលនៅឡើយ។
សេចក្ដីជូនដំណឹងរបស់ គ.ជ.ប បង្ហាញថា វគ្គបណ្ដុះបណ្ដាលរយៈពេលមួយថ្ងៃនោះ អ្នកសារព័ត៌មាននឹងបានស្វែងយល់ពីជំពូកមួយចំនួនក្នុងច្បាប់បោះឆ្នោត ដំណើរប្រព្រឹត្តទៅនៃការចុះឈ្មោះ អ្នកមានសិទ្ធិបោះឆ្នោត ជំហានទាំងឡាយនៃការចុះឈ្មោះ កម្មវិធីដែលប្រើប្រាស់សម្រាប់ចុះឈ្មោះ និងបណ្ដឹងនានាក្នុងដំណើរការចុះឈ្មោះ។
ចំពោះនាយកវិទ្យាស្ថានកម្ពុជា សម្រាប់ការសិក្សាផ្នែកសារព័ត៌មាន លោក មឿន ឈានណារិទ្ធ មានប្រសាសន៍ថា អ្នកសារព័ត៌មានគួរស្វែងយល់បន្ថែមលើអ្វីដែល គ.ជ.ប បានផ្ដល់ឲ្យទៅតាមបទពិសោធន៍ និងវិជ្ជាជីវៈក្នុងការស្វែងរក និងសរសេរព័ត៌មានពីការបោះឆ្នោត។ លោកបន្តថា អ្នកសារព័ត៌មានក៏ត្រូវពិនិត្យមើលពីបញ្ហា និងភាពមិនប្រក្រតីទាំងឡាយ៖ « គឺយើងត្រូវស្វែងយល់ខ្លួនឯងបន្ថែមលើសពីអ្វីដែល គ . ជ . ប បង្រៀនយើង។ ទី១ គឺត្រូវស្វែងយល់ដោយការសម្ភាសប្រភពឯករាជ្យផ្នែកបោះឆ្នោត ថាតើការចុះ ឈ្មោះ បោះឆ្នោតហ្នឹង វាទៅ តាមស្តង់ដារ ដែរ ឬអត់ ? ទី២ យើងត្រូវស្វែង យល់ ដោយប្រៀបធៀបនឹង ការចុះ ឈ្មោះបោះ ឆ្នោតពីអាណត្តិមុនៗ ដើម្បីរំឭកពីចំណុចល្អៗ និងភាពមិនប្រក្រតីដែលគួរចៀសវាង »។
ចំណែកនាយកប្រតិបត្តិនៃគណៈកម្មាធិការ ដើម្បី ការបោះឆ្នោត ដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) លោក គល់ បញ្ញា មានប្រសាសន៍ថា អ្នកសារព័ត៌មានគួរយកចិត្តទុកដាក់ចំពោះពលរដ្ឋដែលមិនសូវទទួលបានការយកចិត្តទុកដាក់ ដូចជាក្រុមជនជាតិដើមភាគតិច និងអ្នកធ្វើចំណាកស្រុក។ លោក គល់ បញ្ញា បន្តថា អ្នកសារព័ត៌មានក៏គួរស្វែងយល់បន្ថែមពីគ្រប់ដំណាក់កាលនៃការបោះឆ្នោត ឬអាចបង្កើតឲ្យមានក្រុមអ្នកជំនាញផ្នែកសរសេរព័ត៌មានបោះឆ្នោត៖ « ការចូល រួមនៅ ក្នុងការងារ សង្កេតការណ៍ចុះ ឈ្មោះបោះឆ្នោត ក៏ជាផ្នែកមានសារសំខាន់ដែរ ថាតើគណបក្សនយោបាយមានអ្នក សង្កេតការណ៍ ឬអត់ ? ខាងអង្គការសង្គមស៊ីវិលមានឬអត់ ? តើគេធ្វើយ៉ាងម៉េចខ្លះ ដើម្បីឲ្យ មានតម្លាភាព សុចរិតភាព នៅ ក្នុងការចុះ ឈ្មោះ ? កិច្ចការ បោះឆ្នោតហ្នឹង គឺជាកិច្ចការថ្មីដែរ ការប្រើប្រាស់ប្រព័ន្ធកុំព្យូទ័រ តើប្រតិបត្តិការទៅមាន បញ្ហាអ្វីខ្លះ ? »។
តាមគម្រោង គ.ជ.ប នឹងចាប់ផ្ដើមចុះបញ្ជីឈ្មោះអ្នកបោះឆ្នោតសម្រាប់ឆ្នាំ២០១៦ នេះនៅថ្ងៃទី១ ខែកញ្ញា និងបិទបញ្ចប់នៅខែវិច្ឆិកា។ គ.ជ.ប រំពឹងថា បញ្ជីឈ្មោះបោះឆ្នោតថ្មីដែលប្រើប្រាស់បច្ចេកវិទ្យាកុំព្យូទ័រនេះ នឹងរួចរាល់សម្រាប់ការបោះឆ្នោតក្រុមប្រឹក្សាឃុំ-សង្កាត់ក្នុងឆ្នាំ២០១៧ ខាងមុខ។
គណបក្សសង្គ្រោះជាតិគ្រោងសុំជួប គ.ជ.ប
ដោយ សេក បណ្ឌិត
គណបក្សសង្គ្រោះជាតិ មានគម្រោងស្នើសុំជួបមេដឹកនាំគណៈកម្មាធិការជាតិរៀបចំការបោះឆ្នោត (គ.ជ.ប) នៅពេលឆាប់ៗខាងមុខនេះ ដើម្បីពិភាក្សាទាក់ទងនឹងការងារបោះឆ្នោត។
មន្ត្រីជាន់ខ្ពស់ និងជាអ្នកតំណាងរាស្ត្រ លោក អេង ឆៃអ៊ាង បានថ្លែងទៅកាន់អ្នកគាំទ្រនៅខាងមុខទីស្នាក់ការកណ្ដាលគណបក្សសង្គ្រោះជាតិ កាលពីព្រឹកថ្ងៃអង្គារ ទី២ សីហា ថា ការស្នើជួបនោះ នឹងជជែកអំពីដំណើរការចុះឈ្មោះបោះឆ្នោតដែលមានរយៈពេល ៣ខែនោះ ធ្វើយ៉ាងណាឲ្យប្រព្រឹត្តទៅដោយរលូន និងផ្តល់លទ្ធភាពឲ្យប្រជាពលរដ្ឋដែលគ្រប់អាយុបោះឆ្នោត បានចុះឈ្មោះបោះឆ្នោតទាំងអស់គ្នា។
លោក អេង ឆៃអ៊ាង បានលើកឡើងទៀតថា ពីពេលនេះតទៅ គណបក្សសង្គ្រោះជាតិ នឹងផ្ដោតការយកចិត្តទុកដាក់លើការចុះឈ្មោះបោះឆ្នោតជារឿងសំខាន់ ដោយប្រើប្រាស់គ្រប់យន្តការដែលអាចធ្វើទៅបាន។ គណបក្សសង្គ្រោះជាតិ ក៏អំពាវនាវដល់ប្រជាពលរដ្ឋខ្មែរ សូមទៅចុះឈ្មោះបោះឆ្នោតឲ្យបានគ្រប់ៗគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។