ការចុះឈ្មោះបោះឆ្នោតសកលសម្រាប់អាណត្តិទី៦ នេះ គ្រោងនឹងចាប់ផ្ដើមនៅក្នុងខែមីនា ឆ្នាំ២០១៦ ខាងមុខ ក៏ប៉ុន្តែមន្ត្រីនាំពាក្យនៃគណៈកម្មាធិការជាតិរៀបចំការបោះឆ្នោត អះអាងថា ការចុះឈ្មោះនេះអាចនឹងត្រូវរំកិល ២ខែទៅមុខទៀត ប្រសិនបើឧបករណ៍ប្រើប្រាស់មិនទាន់អាចបំពេញតាមតម្រូវការបានទេ។
ការប្រកាសពន្យារពេលរបស់ គ.ជ.ប នេះ ស្របពេលភាគីជប៉ុន បន្តរារែកក្នុងការផ្ដល់ឧបករណ៍បច្ចេកទេស សម្រាប់ប្រតិបត្តិការនៅក្នុងមជ្ឈមណ្ឌលកុំព្យូទ័រនៃការិយាល័យកណ្ដាលរបស់ គ.ជ.ប។
ការអះអាងដូចនេះរបស់មន្ត្រីជាន់ខ្ពស់ គ.ជ.ប ធ្វើឡើងក្នុងជំនួបទ្វេភាគីជាមួយអគ្គលេខាធិការរង ទទួលបន្ទុកការងារនយោបាយ ក្រសួងការបរទេសជប៉ុន នៅទីស្ដីការ គ.ជ.ប កាលពីថ្ងៃទី១១ សីហា។ តាមការគ្រោងទុក គណៈកម្មាធិការជាតិរៀបចំការបោះឆ្នោត ត្រូវការម៉ាស៊ីនកុំព្យូទ័រប្រមាណ ២.៤០០គ្រឿង សម្រាប់ប្រតិការចុះឈ្មោះបោះឆ្នោតនាពេលខាងមុខនេះ នៅតាមការិយាល័យបោះឆ្នោតទូទាំងប្រទេស។
លោក ហង្ស ពុទ្ធា មន្ត្រីនាំពាក្យគណៈកម្មាធិការជាតិរៀបចំការបោះឆ្នោត ប្រាប់អ្នកកាសែតក្រោយកិច្ចប្រជុំថា កាលបរិច្ឆេទនៃការបោះឆ្នោតអាចនឹងត្រូវលើកពេលប្រហែល ២ខែទៅមុខទៀត ប្រសិនបើឧបករណ៍បម្រើឲ្យការប្រើប្រាស់សម្រាប់ប្រតិបត្តិការចុះឈ្មោះបោះឆ្នោតនាពេលខាងមុខ ត្រូវយឺតយ៉ាវ។ លោកបន្តថា រហូតមកដល់ពេលនេះ ទាំងភាគីជប៉ុន ដែលសន្យាថានឹងផ្ដល់បរិក្ខារប្រើប្រាស់ ដូចជាម៉ាស៊ីនកុំព្យូទ័រ និងឧបករណ៍បច្ចេកទេសផ្សេងទៀតសម្រាប់ចុះឈ្មោះបោះឆ្នោតនោះ គឺស្ថិតនៅក្នុងគម្រោងនៅឡើយទេ។ ក្រៅពីនេះ ភាគីសហគមន៍អឺរ៉ុប វិញ ក៏មិនខុសពីភាគីជប៉ុន ប៉ុណ្ណានោះដែរ គឺកំពុងស្ថិតក្នុងប្រព័ន្ធរង់ចាំនៅឡើយ។ លោកបន្តថា «យើងកំពុងតែរង់ចាំការសម្រេចចិត្តពីរភាគី គឺជប៉ុន និងខាងសហគមន៍អឺរ៉ុប ដែរ។ បើសិនជាគាត់សម្រេចហើយ យើងប្រហែលជាអាចកំណត់ច្បាស់បាន ប៉ុន្តែឥឡូវហ្នឹងគឺមិនអាចឆ្លើយសំណួរបានទេ»។
ពាក់ព័ន្ធនឹងកាលបរិច្ឆេទនៃការបោះឆ្នោតនេះ តាមការគ្រោងទុក គឺ គ.ជ.ប នឹងត្រូវចាប់អនុវត្តក្នុងខែមីនា ក៏ប៉ុន្តែមន្ត្រី គ.ជ.ប បានបញ្ជាក់ហើយថា ពេលវេលានេះអាចនឹងរំកិលទៅខែឧសភា បន្តទៀត ប្រសិនបើឧបករណ៍ប្រើប្រាស់មិនគ្រប់តាមតម្រូវការទេ។ យោងតាមច្បាប់ស្ដីពីការបោះឆ្នោតជ្រើសតាំងតំណាងរាស្ត្រ មាត្រា៣ វិញចែងថា កាលបរិច្ឆេទនៃការបោះឆ្នោតត្រូវកំណត់ និងប្រកាសដោយនាយករដ្ឋមន្ត្រី តាមសំណើរបស់រដ្ឋមន្ត្រីក្រសួងមហាផ្ទៃ។ បើទោះជាបែបណា កាលពីថ្ងៃទី១០ សីហា តំណាងគណបក្សនយោបាយទាំងពីរបានសន្យាថា នឹងបន្តពិគ្រោះយោបល់អំពីកាលបរិច្ឆេទនៃការបោះឆ្នោតនេះបន្ថែមទៀត។
ជុំវិញការបោះឆ្នោតនេះ លោកនាយករដ្ឋមន្ត្រី ហ៊ុន សែន បានប្ដេជ្ញាកាលពីព្រឹកថ្ងៃទី៣ ខែសីហា ថា លោកនឹងមិនព្រមដាច់ខាតថានឹងឲ្យមានការបោះឆ្នោតមុនអាណត្តិ ជាពិសេសគណបក្សប្រជាជនកម្ពុជា នឹងមិនធ្វើវិសោធនកម្មរដ្ឋធម្មនុញ្ញថែមទៀតផង។ ប្រធានគណបក្សប្រជាជនកម្ពុជា និងជានាយករដ្ឋមន្ត្រីផងនោះ គឺលោក ហ៊ុន សែន រិះគន់ថា គណបក្សសង្គ្រោះជាតិ តែងប្រើប្រាស់ការចូលសភា និងវប្បធម៌សន្ទនា ធ្វើជាដើមទុនក្នុងរឿងនយោបាយរបស់ខ្លួន។ ហេតុនេះ លោកចាត់ទុកថា ដើម្បីបញ្ចប់ការចំណេញនយោបាយដោយឆៅៗបែបនេះ គឺលោកនឹងមិនយល់ព្រមឲ្យមានការបោះឆ្នោតមុនអាណត្តិ ដូចការចង់បានរបស់គណបក្សប្រឆាំងទៀតឡើយ។
លោក សំ គន្ធាមី នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិច (NICFEC) យល់ឃើញថា ប្រសិនបើការចុះឈ្មោះបោះឆ្នោតនេះពិតជាត្រូវពន្យារពេលមែន វានឹងធ្វើឲ្យមានផលប៉ះពាល់ដល់ដំណើរការបោះឆ្នោតសម្រាប់អាណត្តិទី៦ នេះហើយ។ លោកបន្តថា «កាលណាពន្យារពេល ព្រោះអីនីតិវិធីហ្នឹង ខ្ញុំមើលនីតិវិធីវាមានជាង ១០០ថ្ងៃណោះ ទាំងបិទផ្សាយ ហើយផ្ដល់សុពលភាពអីទាំងអស់ ហើយបើគាត់ពន្យារទៅដល់ខែ៥ បានដំណើរការចុះឈ្មោះបោះឆ្នោត គឺចាប់អាចពាក់ព័ន្ធនឹងដំណើរបោះឆ្នោតឆ្នាំ២០១៧ ហើយបាទ»។
នេះជាលើកទីមួយហើយចាប់តាំងពីបោះឆ្នោតក្រោយឆ្នាំ១៩៩៣ ដែលប្រទេសកម្ពុជា ចាប់ផ្ដើមចុះឈ្មោះបោះឆ្នោតតាមប្រព័ន្ធកុំព្យូទ័រនោះ។ តាមការគ្រោងទុក ការចុះឈ្មោះសម្រាប់ការបោះឆ្នោតឃុំ-សង្កាត់ គ.ជ.ប នឹងត្រូវរៀបចំសាកល្បងជាលើកដំបូងរបស់ខ្លួនក្នុងខែកញ្ញា ខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។