អ្នកដឹកនាំអង្គការមិនមែនរដ្ឋាភិបាល ស្វាគមន៍ការជួបជជែកគ្នារបស់អ្នកនយោបាយ ដែលមានអាសនៈនៅក្នុងរដ្ឋសភា ដើម្បីដោះស្រាយការជាប់គាំងនយោបាយ ប៉ុន្តែទាមទារឲ្យអ្នកនយោបាយទាំងនោះ បើកចំហខ្លឹមសារព្រមព្រៀងគ្នាឲ្យបានច្រើនឲ្យប្រជាពលរដ្ឋម្ចាស់ឆ្នោតបានដឹង។
អ្នកដឹកនាំអង្គការមិនមែនរដ្ឋាភិបាលមួយចំនួន លើកទឹកចិត្តឲ្យអ្នកដឹកនាំគណបក្សនយោបាយ បន្តជួបចរចាគ្នា ដើម្បីដោះស្រាយបញ្ហាមិនចុះសម្រុងគ្នា និងអបអរចំពោះដំណឹងស្ដីពីការជួបចរចាគ្នាមិនផ្លូវការរបស់មេដឹកនាំគណបក្សនយោបាយ ដែលឈ្នះនៅក្នុងការបោះឆ្នោត។
អ្នកស្រី ធីតា ឃិះ ប្រធានអង្គការសីលការ (SILAKA) មានប្រសាសន៍នៅថ្ងៃទី១០ មេសា ថា ការជួបគ្នាជជែកគ្នាជារឿងល្អ ប៉ុន្តែអ្នកស្រីសុំឲ្យមានការផ្តល់ព័ត៌មានឲ្យបានច្រើនថែមទៀត ដល់ប្រជាពលរដ្ឋម្ចាស់ឆ្នោត ដើម្បីបានដឹងថា តើអ្នកនយោបាយជជែករឿងអី និងការជជែកនោះមានប្រយោជន៍អ្វីខ្លះដល់ប្រជាពលរដ្ឋ?
អ្នកស្រី ធីតា ឃិះ៖ «ខ្ញុំមានចម្ងល់ច្រើនទាក់ទងជាមួយការងារនោះ។ តើការព្រមព្រៀងនោះវាអាចច្បាស់លាស់ដោយរបៀបណា? ពីព្រោះយើងជាប្រជាពលរដ្ឋធ្លាប់ឃើញកលល្បិចច្រើន ឬខ្លឹមសារមិនច្បាស់លាស់ ហើយដល់ពេលយកទៅអនុវត្តទៅ វាមានបញ្ហា។ បើសិនមានការស្រុះស្រួលគ្នាដោះស្រាយបញ្ហា គឺសប្បាយ។ តែឥឡូវមានការអល់អែកបន្តិច ពីព្រោះមិនដឹងខ្លឹមសារគេនោះវាយ៉ាងម៉េច»។
អ្នកស្រីបន្ថែមទៀតថា ការជាប់គាំងនយោបាយមិនមែនជារឿងល្អនោះទេ វាប៉ះពាល់ដល់គ្រប់សកម្មភាពនៅក្នុងសង្គម៖ «បើគេដោះស្រាយបានវាជារឿងមួយល្អសម្រាប់យើងទាំងអស់គ្នា។ ឥឡូវនេះយើងឃើញក្នុងនាមយើងជាប្រជាពលរដ្ឋ យើងមានការលំបាកច្រើន។ ការរាំងស្ទះនេះ យើងឃើញមានការលំបាកទាំងសេដ្ឋកិច្ច ទាំងនយោបាយ ទាំងសភាពការណ៍ទូទៅ។ យើងជាសង្គមស៊ីវិល ឃើញមានការលំបាកច្រើនដែរ ក្នុងការអនុវត្តសកម្មភាពយើងក្នុងពេលជាប់គាំងនេះ»។
ចំណែក លោក អ៊ូ វីរៈ ប្រធានក្រុមប្រឹក្សាភិបាលមជ្ឈមណ្ឌលសិទ្ធិមនុស្សកម្ពុជា មានយោបល់ថា បើមានការជួបគ្នា វានឹងមានការដោះស្រាយ ប៉ុន្តែអ្នកនយោបាយគួរនិយាយខ្លឹមសារការប្រជុំគ្នានោះឲ្យបានទូលាយបន្តិច អំពីការព្រមព្រៀងដើម្បីដោះស្រាយការជាប់គាំងនយោបាយនេះ៖ «ខ្ញុំស្វាគមន៍ការជួបចរចាគ្នា ពីព្រោះក្នុងលទ្ធិប្រជាធិបតេយ្យ ការជួបចរចាគ្នា គឺវាល្អ។ ប៉ុន្តែ បើយើងបានដឹងខ្លឹមសារលម្អិត វាជាការល្អ។ តើការកែទម្រង់បែបម៉េច រូបមន្តបែបម៉េច? នេះជារឿងគន្លឹះដែលខ្ញុំចង់ឃើញ។ រឿងនេះល្អ ដើម្បីដំណើរទៅមុខ ចៀសវាងការជាប់គាំង»។
លោក អ៊ូ វីរៈ បានចាត់ទុកថា ការជាប់គាំងនយោបាយ និងការតវ៉ាក្រោយការបោះឆ្នោត គឺជារឿងធម្មតានៅក្នុងសង្គមកាន់លទ្ធិប្រជាធិបតេយ្យ ប៉ុន្តែគេត្រូវចៀសវាងប្រើអំពើហិង្សាក្នុងការដោះស្រាយទំនាស់ ឬការទាស់ទស្សនៈគ្នា។
ចំពោះ លោក សុក សំអឿន ប្រធានអង្គការមិនមែនរដ្ឋាភិបាលឈ្មោះ ក្រុមអ្នកច្បាប់ការពារសិទ្ធិកម្ពុជា មានប្រសាសន៍ថា ការជួបគ្នាវាមានប្រយោជន៍ជាងការមិនជួបគ្នា បើទោះបីជាបានលទ្ធផលខ្លះ ឬមិនបានលទ្ធផលខ្លះក៏ដោយ។
រីឯអ្នកវិភាគឯករាជ្យលើបញ្ហានយោបាយ និងសង្គម លោកបណ្ឌិត ឡៅ ម៉ុងហៃ លើកឡើងថា ការជាប់គាំងនយោបាយ វាកើតមានមិនមែនតែនៅប្រទេសកម្ពុជា នោះទេ វាជាដំណើរធម្មតានៅក្នុងប្រទេសកាន់លទ្ធិប្រជាធិបតេយ្យ ហើយមានប្រទេសខ្លះ ការជាប់គាំងរបៀបនេះ មានរយៈពេលរហូតដល់ជាងមួយឆ្នាំឯណោះ៖ «មានការឈោងដៃដាក់គ្នា មិនមែនតែម្ខាងទេ។ អាចមានការសម្របសម្រួលគ្នា មានសម្បទានពីគណបក្សប្រជាជន ឲ្យទៅគណបក្សសង្គ្រោះជាតិ ហើយគណបក្សសង្គ្រោះជាតិ ក៏បានបើកទ្វារសម្របសម្រួលតបទៅវិញ»។
កាលពីថ្ងៃទី៩ មេសា លោកនាយករដ្ឋមន្ត្រី ហ៊ុន សែន អនុប្រធានគណបក្សប្រជាជនកម្ពុជា បានជួបសន្ទនាតាមទូរស័ព្ទមានរយៈពេលជាង ៤០នាទី ជាមួយ លោក សម រង្ស៊ី ប្រធានគណបក្សសង្គ្រោះជាតិ។
គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសលទ្ធផលការបោះឆ្នោត ធ្វើឡើងកាលពីថ្ងៃទី២៨ កក្កដា ថា គណបក្សប្រជាជនកម្ពុជា បានទទួល ៦៨អាសនៈ និងគណបក្សសង្គ្រោះជាតិ បានទទួល ៥៥អាសនៈក្នុងចំណោមអាសនៈទាំងអស់ ១២៣ នៅរដ្ឋសភា។ ប៉ុន្តែ គណបក្សសង្គ្រោះជាតិ មិនទទួលស្គាល់លទ្ធផលនោះទេ ហើយមានការតវ៉ា និងមិនព្រមបញ្ជូនសមាជិកសភាទៅចូលរួមប្រជុំសភាទេ។ គណបក្សសង្គ្រោះជាតិ បានហៅសភាដែលមានតែគណបក្សប្រជាជនកម្ពុជា តែមួយនោះថា ជាសភាឯកបក្ស និងរដ្ឋាភិបាលកើតចេញពីសម័យប្រជុំសភានោះ ជារដ្ឋាភិបាលមិនស្របច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។