គណៈកម្មាធិការជាតិរៀបចំការបោះឆ្នោត (គ.ជ.ប) នឹងពិនិត្យលទ្ធភាពផ្លូវច្បាប់ ដើម្បីបំពេញបំណងលោក នី ចរិយា ដែលចង់នៅក្រៅឃុំ ដើម្បីជួយរៀបចំកិច្ចការបោះឆ្នោត។ នេះបើតាមអនុប្រធាន គ.ជ.ប លោក គួយ ប៊ុនរឿន ដែលបានចុះទៅសួរសុខទុក្ខលោក នី ចរិយា នៅព្រឹកថ្ងៃទី២ ខែមិថុនា។ ករណីចង់នៅក្រៅឃុំរបស់មន្ត្រី គ.ជ.ប រូបនេះ សាលាឧទ្ធរណ៍ក៏គ្រោងនឹងបើកសវនាការនៅថ្ងៃទី១៣ ខែមិថុនា ខាងមុខនេះដែរ។
ការវិវឌ្ឍន៍សំណុំរឿងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត លោក នី ចរិយា ដែលកំពុងជាប់ឃុំ កំពុងស្ថិតក្រោមការឃ្លាំមើលយ៉ាងដិតដល់ពីស្ថាប័នរៀបចំការបោះឆ្នោត។
ក្រោយជួបសួរសុខទុក្ខលោក នី ចរិយា នៅមន្ទីរឃុំឃាំងនៃស្នងការដ្ឋាននគរបាលរាជធានីភ្នំពេញនោះ អនុប្រធានគណៈកម្មាធិការជាតិរៀបចំការបោះឆ្នោត លោក គួយ ប៊ុនរឿន ប្រាប់វិទ្យុអាស៊ីសេរី ថា លោក នី ចរិយា បានស្នើឲ្យ គ.ជ.ប ជួយរកលទ្ធភាពឲ្យលោកបាននៅក្រៅឃុំ ដើម្បីបន្តការងាររៀបចំការបោះឆ្នោតឲ្យបានត្រឹមត្រូវ។
ឆ្លើយតបនឹងក្តីប្រាថ្នានេះ លោក គួយ ប៊ុនរឿន ឲ្យដឹងថា ប្រតិភូដែលចុះសួរសុខទុក្ខនោះ នឹងពិភាក្សាជាមួយថ្នាក់ដឹកនាំ គ.ជ.ប ហើយនឹងពិនិត្យលទ្ធភាពផ្លូវច្បាប់៖ « ទៅជួបនោះ គឺមានក្រុមអ្នកច្បាប់។ អ៊ីចឹងគាត់បានពិនិត្យលទ្ធភាពទៅតាមផ្លូវច្បាប់ ព្រោះ គ . ជ . ប ជាស្ថាប័នមួយឯករាជ្យ ដែលត្រូវតែអនុវត្តច្បាប់។ អ៊ីចឹងបានយើងនឹងត្រួតពិនិត្យឡើងវិញអំពីទិដ្ឋភាពច្បាប់ ព្រមទាំងតាមដានការវិវឌ្ឍន៍ដំណើរការសំណុំរឿងរបស់គាត់ ហើយមានការថ្លឹងថ្លែងថា ធ្វើម៉េចកុំឲ្យរំលោភទៅលើស្ថាប័នដែលមានសមត្ថកិច្ច កំពុងអនុវត្តនូវការងារសំណុំរឿងរបស់ឯកឧត្តម នី ចរិយា »។
លោក គួយ ប៊ុនរឿន ឲ្យដឹងដែរថា លោក នី ចរិយា កំពុងមានបញ្ហាសុខភាព ដូចជាសម្ពាធឈាមឡើង ជំងឺក្រពះ និងផ្លូវដង្ហើម ជាពិសេសជំងឺថប់អារម្មណ៍ ឬស្ត្រេសដោយសារមិនបានបំពេញការងារតាមទម្លាប់។
ចំពោះការចង់នៅក្រៅឃុំនេះ មេធាវីការពារក្តី គឺលោក សំ សុគង់ មានប្រសាសន៍ថា សាលាឧទ្ធរណ៍នឹងបើកសវនាការនៅថ្ងៃទី១៣ ខែមិថុនា ខាងមុខតាមបណ្ដឹងរបស់លោក ក្រោយពីសាលាដំបូងរាជធានីភ្នំពេញ បដិសេធក្រោមហេតុផលថា បារម្ភពីសុវត្ថិភាព និងមិនបង្ហាញខ្លួននៅតុលាការ។
ទោះបីជាយ៉ាងណាក្តី លោកមេធាវី សំ សុគង់ បញ្ជាក់ថា កូនក្តីរបស់លោកមានលក្ខខណ្ឌគ្រប់គ្រាន់តាមផ្លូវច្បាប់ ដើម្បីបាននៅក្រៅឃុំ ដោយសន្យាថាមិនគេចវេះបង្កការលំបាកដល់តុលាការឡើយ ដោយយកតួនាទីជាអគ្គលេខាធិការរង គ.ជ.ប និងទីលំនៅច្បាស់លាស់ជាសំអាង៖ « សង្ឃឹមថាសភាស៊ើបសួរ និងសាលាឧទ្ធរណ៍ នឹងពិចារណាលើលក្ខខណ្ឌនេះ ហើយនឹងប្រៀបធៀបទៅនឹងច្បាប់ ហើយសម្រេចឲ្យមានលក្ខណៈមួយសមស្រប និងត្រឹមត្រូវតាមច្បាប់ ដើម្បីផ្តល់យុត្តិធម៌ជូនគាត់ »។
ចំពោះអវត្តមានអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត ជាអតីតមន្ត្រីសិទ្ធិមនុស្សនៃសមាគមអាដហុក (ADHOC) នៅពេលនេះ លោក គួយ ប៊ុនរឿន បង្ហាញការសោកស្ដាយថា បានបាត់បង់គំនិតយោបល់ល្អៗមួយចំនួន ដើម្បីចូលរួមរៀបចំការបោះឆ្នោតឲ្យបានល្អប្រសើរ និងតម្លាភាព៖ « វាជាធម្មតា សហការីដែលធ្វើការងារ យើងធ្លាប់មានការជជែកគ្នាអំពីការរៀបចំបទបញ្ជា និងនីតិវិធីក្តី ក៏ដូចជារៀបចំចងក្រងនូវលិខិតបទដ្ឋាននានាហ្នឹង ក៏មានការចូលរួមចំណែកជាយោបល់ ពិគ្រោះពិភាក្សាគ្នាវាមានលក្ខណៈទូលំទូលាយជាង ហើយនៅពេលបាត់មួយអ៊ីចឹងទៅ គឺមតិនោះក៏បាត់បង់ទៅតាមហ្នឹងដែរ »។
លោក នី ចរិយា ត្រូវបានតុលាការបញ្ជូនខ្លួនទៅឃុំនៅមន្ទីរឃុំឃាំងរបស់ស្នងការដ្ឋាននគរបាលរាជធានីភ្នំពេញ កាលពីថ្ងៃទី២ ខែឧសភា ក្រោមបទចោទសមគំនិតក្នុងអំពើសូកប៉ាន់សាក្សី ក្នុងសំណុំរឿងខ្សែអាត់សំឡេងសាសងតាមទូរស័ព្ទរវាងនាង ខុម ចាន់តារាទី ហៅ ស្រីមុំ និងលោក កឹម សុខា។ សង្គមស៊ីវិលជាតិ និងអន្តរជាតិ ចាត់ទុកសំណុំរឿងនេះថាជាសំណុំរឿងនយោបាយ ដែលអាចធ្វើឲ្យស្ថាប័នរៀបចំការបោះឆ្នោតខ្វះតុល្យភាពក្នុងការបំពេញការងារ ឬឯករាជភាពរបស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។