ការជាប់គាំងខាងនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិ ដែលជាគណបក្សមានអាសនៈសភា ជាច្រើនខែមកហើយហាក់មានសភាពធូរស្រាលបន្តិចវិញ បន្ទាប់ពីគណបក្សទាំងពីរមានឆន្ទៈចរចាគ្នាលើបញ្ហាខ្លះៗ។
ក៏ប៉ុន្តែ នៅតាមខេត្ត ស្រុកខ្លះ គឺប្រធានក្រុមប្រឹក្សាខេត្ត ស្រុក មួយចំនួន ដែលជាមន្ត្រីគណបក្សប្រជាជនកម្ពុជា ហាក់នៅមានការរើសអើងទៅលើសមាជិកក្រុមប្រឹក្សា ដែលមកពីគណបក្សប្រឆាំងនៅឡើយ។
ការរើសអើងនោះ គឺប្រធានក្រុមប្រឹក្សាស្រុកខ្លះមិនបើកប្រាក់ខែឱ្យសមាជិកក្រុមប្រឹក្សាគណបក្សប្រឆាំងទេ នៅពេលដែលសមាជិកខ្លះបានប្ដូរបេក្ខភាពពីគណបក្ស សម រង្ស៊ី ទៅជាគណបក្សសង្គ្រោះជាតិ ឬក៏មិនដូរបេក្ខភាពក៏ដោយ។
អតីតសមាជិកក្រុមប្រឹក្សាស្រុកសូទ្រនិគម នៃគណបក្ស សម រង្ស៊ី មួយរូប ដែលទើបបញ្ចប់អាណត្តិ កំពុងទាមទារឱ្យប្រធានក្រុមប្រឹក្សាខេត្តសៀមរាប និងស្រុកសូទ្រនិគម ត្រូវតែបើកប្រាក់ខែចំនួន ១លានរៀល ដែលមន្ត្រីបានកាត់ដោយខុសច្បាប់ ត្រឡប់មកឱ្យរូបគាត់វិញ។
អតីតសមាជិកក្រុមប្រឹក្សាស្រុកសូទ្រនិគម គឺលោក គឹម ពិសិដ្ឋ។ លោកមានប្រសាសន៍កាលពីរសៀលថ្ងៃសៅរ៍ ទី១៤ ខែមិថុនា ថា ប្រាក់ខែរបស់គាត់ចំនួន ៥០ម៉ឺនរៀលក្នុង១ខែ ត្រូវបានគេកាត់ចាប់ពីខែមេសា និងខែឧសភា។ បុរសដដែលបញ្ជាក់ថា លោក គឺជាសមាជិកក្រុមប្រឹក្សាស្រុកសូទ្រនិគម របស់គណបក្ស សម រង្ស៊ី ហើយនៅអំឡុងពេលបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក ខណ្ឌ កាលពីខែឧសភា កន្លងទៅ រូបលោកមិនបានប្ដូរបេក្ខភាពចេញពីគណបក្ស សម រង្ស៊ី ទៅឈរឈ្មោះឱ្យគណបក្សសង្គ្រោះជាតិ ទេ ក៏ប៉ុន្តែប្រាក់ខែរបស់លោក ត្រូវគេកាត់ដូចជាអ្នកដែលប្ដូរបេក្ខភាពដែរ។
អតីតសមាជិកក្រុមប្រឹក្សាស្រុករូបនោះ ឱ្យដឹងថា លោកបានសួរដេញដោលបញ្ហានេះទៅមន្ត្រីគណនេយ្យស្រុកចំនួនពីរលើក ក៏ប៉ុន្តែមិនមានលទ្ធផលអ្វីទេ៖ «ខ្ញុំសួរថា ហេតុអ្វីបានជាអត់ប្រាក់ខែឱ្យខ្ញុំ? គាត់ថា ខ្ញុំហ្នឹងជាប់ពាក់ព័ន្ធចូលរួមហែគណបក្សសង្គ្រោះជាតិ ហើយបានពាក់អាវពាក់អី គាត់ថាខ្ញុំចូលជាសមាជិកសង្គ្រោះជាតិ។ ប៉ុន្តែខ្ញុំក៏បានតវ៉ាជាមួយគាត់ថា វាមិនត្រូវនឹងច្បាប់ទេ ព្រោះអីប្រជាពលរដ្ឋម្នាក់អាចមានសិទ្ធិទៅគាំទ្រគណបក្សដទៃបាន។ គ្មានលក្ខខណ្ឌណាដែលអាចបញ្ជាក់ថា ខ្ញុំហ្នឹងជាសមាជិក និងឈរជាបេក្ខជនឱ្យគណបក្សសង្គ្រោះជាតិ ទេ ហើយរហូតមកដល់ពេលនេះ ឥឡូវចាំមើលដំណឹងពីគាត់មិនទាន់បើកប្រាក់ខែឱ្យទៀត»។
ទាំងមន្ត្រីសាលាស្រុក និងក្រុមប្រឹក្សាស្រុកសូទ្រនិគម ដែលធ្លាប់ទទួលខុសត្រូវលើបញ្ហានេះ បានឆ្លើយដូចគ្នាថា គេមិនដឹងពីមូលហេតុច្បាស់លាស់ជុំវិញរឿងមិនបើកប្រាក់ខែឱ្យសមាជិកក្រុមប្រឹក្សាគណបក្សប្រឆាំងម្នាក់នោះទេ។
អតីតប្រធានក្រុមប្រឹក្សាស្រុកសូទ្រនិគម លោក យិន សង មានប្រសាសន៍ថា លោកមិនដឹងមូលហេតុច្បាស់លាស់ជុំវិញរឿងនោះទេ ពីព្រោះកាលណោះលោកជាប់រវល់ការងារ។ ក៏ប៉ុន្តែនៅពេលដឹងថា សមាជិករបស់លោកមិនបានប្រាក់ខែ គឺលោកធ្លាប់ជួយសម្របសម្រួលឱ្យសាមីខ្លួនសរសេរពាក្យស្នើសុំបើកប្រាក់ ដាក់ទៅសាលាខេត្តសៀមរាប ឡើងវិញដែរ៖ «គាត់ធ្វើសេចក្តីប្រកាសថា គាត់មិនបានចូលទទេ វាគ្មានស្អីជាសំអាង មានឯកសារយកទៅស្នើសុំទៅលើទៀត។ បានក្រោយមក ទៅប្រាប់ខ្ញុំៗថាធ្វើតាមគេទៅ ឱ្យគេដោះស្រាយតាមដំណើរនោះទៅ ប៉ុន្តែមិនដឹងថា គាត់បានធ្វើឬក៏អត់ ខ្ញុំក៏មិនដឹង»។
ចំណែកអភិបាលស្រុកសូទ្រនិគម លោក ឌិត ដន បានបដិសេធមិនពន្យល់រឿងនោះទេ ដោយលោកមានប្រសាសន៍ថា លោកបានចូលនិវត្តន៍ទៅហើយ។ លោក ឌិត ដន បានជំរុញឱ្យសួររឿងនេះទៅអភិបាលស្រុកដែលទើបតែឡើងកាន់តំណែងថ្មី។
ចាប់តាំងពីឆ្នាំ២០០៩ មក គណបក្ស សម រង្ស៊ី មានសមាជិកក្រុមប្រឹក្សាខេត្តសៀមរាប ៣រូប និងសមាជិកក្រុមប្រឹក្សាក្រុងស្រុកចំនួន ៣១រូប ហើយការបោះឆ្នោតជ្រើសរើសក្រុមប្រឹក្សារាជធានីខេត្តក្រុង ស្រុក ខណ្ឌ កាលពីអំឡុងខែឧសភា ឆ្នាំ២០១៤ គឺសមាជិកក្រុមប្រឹក្សាខេត្តស្រុកចំនួន ៣៣រូប បានប្ដូរបេក្ខភាពទៅឈរឈ្មោះជាបេក្ខជនគណបក្សសង្គ្រោះជាតិ លើកលែងតែសមាជិកក្រុមប្រឹក្សាស្រុកសូទ្រនិគម ម្នាក់នោះ។
មន្ត្រីស៊ើបអង្កេតជាន់ខ្ពស់របស់អង្គការសិទ្ធិមនុស្សលីកាដូ (Licadho) លោក អំ សំអាត បានហៅការមិនបើកប្រាក់ខែឱ្យសមាជិកក្រុមប្រឹក្សាស្រុក មកពីគណបក្សប្រឆាំងម្នាក់នោះ គឺជារឿងខុសច្បាប់។ អង្គការសិទ្ធិមនុស្សមើលឃើញថា ការមិនបើកប្រាក់ខែឱ្យសមាជិកក្រុមប្រឹក្សាម្នាក់នោះ គឺអាចជាការស្អប់ខាងនយោបាយច្រើនជាងការអនុវត្តច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។