បញ្ហានេះ ត្រូវបានសង្គមស៊ីវិល និងមន្ត្រីបក្សប្រឆាំង លើកឡើងថា សាររបស់លោក ហ៊ុន សែន ដែលភ្ជាប់បក្សប្រឆាំងក្នុងកិច្ចការអន្តរាគមន៍នេះ ធ្វើឡើងដើម្បីបំបែកសំឡេងអ្នកប្រជាធិបតេយ្យចំពោះការជឿទុកចិត្តរបស់ពលរដ្ឋ ស្របពេលដែលដំណើរការនៃការបោះឆ្នោតសកលនឹងឈានមកដល់ក្នុងពេលខាងមុខនេះ។
លោកនាយករដ្ឋមន្ត្រី ហ៊ុន សែន បានហៅវប្បធម៌នៃកិច្ចអន្តរាគមន៍ជួយមន្ត្រីថ្នាក់ក្រោមបង្គាប់ ដើម្បីមុខមាត់ តួនាទី នៅក្នុងសង្គម និងដើម្បីគេចចេញពីការចោទប្រកាន់របស់តុលាការ ថាគឺជាទម្លាប់មិនគួរឲ្យកើតមានទៀតនោះទេ ហើយគេគួរពង្រឹងការអនុវត្តច្បាប់ជាជាងវៃអែបស៊ីអប។
លោកនាយករដ្ឋមន្ត្រី ហ៊ុន សែន មានប្រសាសន៍នៅថ្ងៃទី៧ មីនា ថា លោកមិនគាំទ្រឡើយចំពោះវប្បធម៌អន្តរាគមន៍នេះ។ លោកបានឲ្យដឹងថា ទង្វើបែបនេះពុំមែនកើតមានទៅលើតែមន្ត្រីក្នុងរដ្ឋាភិបាលប៉ុណ្ណោះទេ ប៉ុន្តែបញ្ហានេះ ក៏កំពុងកើតឡើងទៅលើទាំងមន្ត្រីក្នុងគណបក្សមិនទាន់បានកាន់អំណាចថែមទៀត។
លោកនាយករដ្ឋមន្ត្រី ហ៊ុន សែន៖ «ប្រធានមន្ទីរសាធារណការមិនចូលនិវត្ត។ ម៉ៅ មុនីវណ្ណ ដែលជាតំណាងរាស្ត្ររបស់គណបក្ស សម រង្ស៊ី ឥឡូវទៅធ្វើអនុប្រធានគណបក្ស សិទ្ធិមនុស្ស កាន់មកថា សុំឲ្យសម្ដេចជួយឲ្យបងប្អូនខ្ញុំម្នាក់នៅក្រសួងសេដ្ឋកិច្ច ហិរញ្ញវត្ថុ ឥឡូវនេះទៅធ្វើប្រធានមន្ទីរសាធារណការក្រុងភ្នំពេញ។ ហ្នឹង ក្នុងបក្សប្រឆាំង គេជាបក្សប្រឆាំង ប៉ុន្តែគេចូលបក្សយើងអ៊ីចេះ ហើយយើងឲ្យជួបពេលហ្នឹងរៀបចំឲ្យទៅធ្វើណោះ។ ហើយទៅណោះទៀត ទិញតំណែងបានធ្វើអនុប្រធានបក្ស សិទ្ធិមនុស្ស ទិញតំណែង ឡាន របស់ប្រធានជិះហ្នឹង លុយខ្ញុំតើ។ អ៊ីចឹងបានថា អាហ្នឹងមែនថាកុំថាក្នុងគណបក្សក្នុងពួកអ្នកកាន់រដ្ឋបាល សូម្បីតែបក្សមិនទាន់បានកាន់ក៏មានរឿងនេះដែរ»។
ក្រុមមន្ត្រីអង្គការសង្គមស៊ីវិល និងបក្សប្រឆាំង ហៅសាររបស់លោក ហ៊ុន សែន នេះថាជាយុទ្ធនាការវាយប្រហារដៃគូប្រកួតប្រជែងរបស់ខ្លួន គឺគណបក្សប្រឆាំង ដើម្បីកេងចំណេញនយោបាយនៅគ្រាដំណើរការនៃការបោះឆ្នោតសកលនៅសល់ប្រហែល ៥ខែទៀត ដែលនឹងចូលមកដល់ក្នុងពេលខាងមុខ។
លោក ម៉ៅ មុនីវណ្ណ អតីតតំណាងរាស្ត្រគណបក្ស សម រង្ស៊ី មណ្ឌលកំពង់ចាម និងបច្ចុប្បន្នជាអនុប្រធានគណៈកម្មការប្រតិបត្តិនៃគណបក្ស សិទ្ធិមនុស្ស ដែលត្រូវលោកនាយករដ្ឋមន្ត្រី ហ៊ុន សែន ចាត់ទុកជាអ្នកដែលធ្លាប់ស្នើឲ្យមានកិច្ចអន្តរាគមន៍ដោយផ្ទាល់ពីលោកនោះ បានថ្លែងថា អ្វីដែលលោក ហ៊ុន សែន លើកឡើងនេះ គឺជាការលាបពណ៌ដើម្បីបំបែកសំឡេងអ្នកប្រជាធិបតេយ្យ និងការជឿទុកចិត្តក្នុងបក្សប៉ុណ្ណោះ។
លោក ម៉ៅ មុនីវណ្ណ មានជំនឿថា បើទោះជាលោក ហ៊ុន សែន ប្រឹងប្រែងបន្ថែមទៀតក្នុងការបញ្ចប់សម្ព័ន្ធភាពអ្នកប្រជាធិបតេយ្យ ដោយមធ្យោបាយនេះក៏ដោយ គឺពុំមានហេតុផលណាមួយទៅរួចទៀតនោះឡើយ៖ «ជាវប្បធម៌ដដែលៗតាំងពីដើមរហូតមកទល់ពេលនេះ ហើយអស់លោកឃើញហើយ រឿងរលកនយោបាយ ជិតដល់ពេលបោះឆ្នោត គេតែងតែរកគ្រប់មធ្យោបាយដើម្បីញុះញង់ធ្វើយ៉ាងណា អ្នកប្រជាធិបតេយ្យបែកបាក់គ្នាប៉ុណ្ណឹងឯងបាទ»។
លោកបណ្ឌិត ឡៅ ម៉ុងហៃ អ្នកវិភាគឯករាជ្យ មានប្រសាសន៍ថា នេះជាទម្លាប់របស់អ្នកនយោបាយ ធ្វើយ៉ាងណាដើម្បីឲ្យកម្មវិធីនយោបាយបក្សដទៃ ដែលជាដៃគូប្រកួតប្រជែង ចុះខ្សោយជាងគោលនយោបាយរបស់ខ្លួន៖ «ចេះតែមានអាដែងព័ត៌មាន ឬការផ្សព្វផ្សាយព័ត៌មានថាអ្នកនេះជាចារបុរសរបស់គណបក្សនេះ នៅក្នុងជួរគណបក្សនោះទៅអ៊ីចឹងបាទអ៊ីចេះ។ អាហ្នឹង ឮជារឿយៗបាទ ដូច្នេះគឺអានេះគឺជាការយកផលប្រយោជន៍នយោបាយ និងការបង្កនូវការមិនទុកចិត្តគ្នានៅក្នុងជួរបក្សដែលពាក់ព័ន្ធនឹងបាទ»។
មជ្ឈដ្ឋាននានាកត់សម្គាល់ថា សាររបស់លោកនាយករដ្ឋមន្ត្រី ហ៊ុន សែន ហាក់ពុំមានឥទ្ធិពល ឬប្រសិទ្ធភាពទៅលើការអនុវត្តរបស់មន្ត្រីក្រោមបង្គាប់នោះទេ ដូចជាកន្លងទៅ ប្រមុខរដ្ឋាភិបាលធ្លាប់ព្រមានលប់បំបាត់ឡានពាក់ស្លាកលេខ ខ.ម ឬ ន.ប តែករណីនេះនៅតែកើតមាននៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។