សាលារាជធានីភ្នំពេញ បានចេញលិខិតជាផ្លូវការប្រឆាំងនឹងសកម្មភាពប្រមូលស្នាមមេដៃរបស់គណបក្សសង្គ្រោះជាតិ ថាមិនបានសុំការអនុញ្ញាតជាមុន។
នាយកទីចាត់ការនៃសាលារាជធានីភ្នំពេញ លោក ឡុង ឌីម៉ង់ បានថ្លែងនៅថ្ងៃទី៩ ខែតុលា ថា ការប្រមូលស្នាមមេដៃគាំទ្រពីពលរដ្ឋនៅតាមផ្សារទីសាធារណៈ និងគេហដ្ឋាននោះ បានបង្កឲ្យប៉ះពាល់ដល់ការរស់នៅប្រចាំថ្ងៃ រំខានដល់ការប្រកបអាជីវកម្ម ព្រមទាំងប៉ះពាល់ដល់សតិអារម្មណ៍ពលរដ្ឋ បាត់បង់សណ្ដាប់ធ្នាប់សាធារណៈ។ ជាងនេះទៅទៀត គណបក្សនេះមិនបានសុំការអនុញ្ញាតពីអាជ្ញាធរមានសមត្ថកិច្ចនោះទេ។
លោក ឡុង ឌីម៉ង់៖ «គាត់អាចធ្វើបានប្រមូលបាន គឺគាត់ប្រមូលតែគ្នាគាត់តាមស្នាក់ការបក្សតាមអីទៅ វាត្រឹមត្រូវជាង មិនអាចឲ្យគាត់ធ្វើការប្រមូលតាមទីសាធារណៈ ដែលគាត់អត់បានសុំច្បាប់អ៊ីចឹងទេ តាមបណ្ដាផ្សារអីហ្នឹងណា អាហ្នឹងគឺយើងមិនអាចឲ្យគាត់ធ្វើអ៊ីចឹងបានទេ។ កុំថាឡើយតែគណបក្សនយោបាយ សូម្បីតែក្រុមហ៊ុនឯកជននានា ដែលចង់ធ្វើការចែកលិខិតប័ណ្ណ ឬចង់ធ្វើអ្វីនៅតាមទីសាធារណៈ នៅតាមផ្សារនៅតាមអីហ្នឹង គឺត្រូវតែសុំច្បាប់តាមអាជ្ញាធរជាមុនសិនដែរ»។
ក្រោយចេញលិខិតពីសាលារាជធានីភ្នំពេញមួយថ្ងៃ នៅឯផ្សារច្បារអំពៅ មានសេចក្ដីរាយការណ៍មកថា អាជ្ញាធរផ្សារនេះបានប្រើកម្លាំងសន្តិសុខផ្សារ ដើរតាមមន្ត្រីគណបក្សសង្គ្រោះជាតិ ក្នុងពេលដែលមន្ត្រីគណបក្សនេះដើរប្រមូលស្នាមមេដៃគាំទ្រពីអាជីវករផ្សារនោះ។
អាជីវករខ្លះបានហៅទង្វើរបស់សន្តិសុខ ក្រោមការបញ្ជាពីអាជ្ញាធរផ្សារ ថាជាការបំភិតបំភ័យ និងរឹតត្បិតសិទ្ធិសេរីភាពរបស់ពួកគេ៖ «អាជីវករគេស្ម័គ្រចិត្តទេ អត់មាននរណាគេបង្ខំទេ។ ប៉ុន្តែខាងសន្តិសុខផ្សារហ្នឹងដូចថាគេតាមដានយើងអ៊ីចឹងណា។ បារម្ភដែរ បើសិនជាយើងនិយាយខ្លាំង គេអាចធ្វើបាបយើងដែរ។ ហេតុអ្វីបានបងសម្រេចចិត្តផ្ដិតមេដៃឲ្យគណបក្សសង្គ្រោះជាតិ? ព្រោះខ្ញុំចង់ប្ដូរមេដឹកនាំ។ ខ្ញុំអត់បានផ្ដិត ឥឡូវខ្ញុំឈរចាំផ្ដិតទាល់តែបាន ខ្ញុំអត់ខ្លាចទេបង ទោះបីជាអត់កន្លែងលក់ក៏ខ្ញុំនៅតែប្ដឹងតស៊ូដែរ បើគេដឹង គេអត់ឲ្យខ្ញុំលក់ទេណា ប៉ុន្តែខ្ញុំខំប្រឹងតស៊ូឡើង ព្រោះអីខ្ញុំកូនខ្មែរ»។
ឆ្លើយតបទៅនឹងលិខិតរបស់សាលារាជធានីភ្នំពេញនេះ លោក កឹម សុខា អនុប្រធានគណបក្សសង្គ្រោះជាតិ បានចាត់ទុកថា ការចេញលិខិតនេះ គឺជាការរារាំងបំបិទសិទ្ធិសេរីភាពរបស់ពលរដ្ឋ។ លោកថា គណបក្សប្រមូលស្នាមមេដៃនេះ មានគោលបំណងទាមទារឲ្យអង្គការសហប្រជាជាតិ និងប្រទេសហត្ថលេខីនៃកិច្ចព្រមព្រៀងទីក្រុងប៉ារីស ទាំងអស់ ឲ្យយកចិត្តទុកដាក់ពីបញ្ហានយោបាយនៅកម្ពុជា ឡើងវិញ នៅក្នុងអាណត្តិទី៥ នេះ ដែលមិនទទួលបានយុត្តិធម៌ចំពោះលទ្ធផលឆ្នោត។
លោក កឹម សុខា៖ «កាលមុនថាយើងហែបាតុកម្ម ថាយើងប៉ះពាល់សណ្ដាប់ធ្នាប់ផ្លូវ ឥឡូវគ្រាន់តែទៅផ្ដិតមេដៃតាមផ្ទះ វាមានប៉ះពាល់អី វាអត់មានប៉ះពាល់អីសោះ។ ឥឡូវសួរសំណួរថា ចុះមានក្រុមហ៊ុនខ្លះដើរចែកពាណិជ្ជកម្មអីផ្សព្វផ្សាយតាមផ្ទះតាមអី ម៉េចគេដើរហុចដើរចែកបាន? ហើយម៉េចក៏គណបក្ស ប្រជាពលរដ្ឋសម្ដែងមតិតាមរយៈផ្ដិតមេដៃ ម៉េចក៏ចោទថាប៉ះពាល់? ហ្នឹងហើយគឺជាសារធាតុយកលេស ដើម្បីបិទសិទ្ធិសេរីភាពរបស់ពលរដ្ឋ ប៉ុន្តែប្រជាពលរដ្ឋមកដល់ពេលនេះហើយអត់ថយក្រោយទេ»។
ទាក់ទងបញ្ហានេះ ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានមតិថា ការចេញលិខិតរារាំងឲ្យសុំការអនុញ្ញាតពីសាលារាជធានីជាមុនសិននេះ គឺជាទង្វើខុសច្បាប់ និងជាការបំពានសិទ្ធិសេរីភាពនៃការជួបជុំសម្ដែងមតិរបស់ពលរដ្ឋ។ លោកថា តាមពិត នេះជាមធ្យោបាយ និងជាជម្រើសមួយល្អ គឺជាវិធីបញ្ចេញមតិដែលជៀសវាងបាននូវការបង្កអស្ថិរភាពសង្គម ដែលមិនធ្វើឲ្យពលរដ្ឋតឹងទ្រូងពេក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។