គណបក្សសង្គមរាស្ត្ររាជាធិបតេយ្យ របស់សម្ដេចក្រុមព្រះ នរោត្តម រណឫទ្ធិ បានសម្ពោធទីស្នាក់ការរបស់ខ្លួនជាផ្លូវការហើយ ស្ថិតនៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ នៅថ្ងៃទី៦ ខែមិថុនា ដែលមានសមាជិកជាង ២០០នាក់ចូលរួម។
ការសម្ពោធទីស្នាក់ការគណបក្សថ្មីនេះ ក្រោមអធិបតីភាពសម្ដេចក្រុមព្រះ នរោត្តម រណឫទ្ធិ ជាព្រះប្រធានគណបក្ស។ នៅក្នុងការសម្ពោធទីស្នាក់ការថ្មីនេះ សម្ដេចក្រុមព្រះ បញ្ចេញសារនយោបាយជាច្រើនទាក់ទងនឹងការកសាងប្រទេសជាតិឡើងវិញ ពិសេសការផ្ដល់ដីសម្បទានសេដ្ឋកិច្ច ធ្វើឲ្យប៉ះពាល់ដល់ប្រជាពលរដ្ឋ និងបញ្ហាព្រំដែន ជាដើម។
សម្ដេចក្រុមព្រះ នរោត្តម រណឫទ្ធិ ប្រធានគណបក្សសង្គមរាស្ត្ររាជាធិបតេយ្យ មានព្រះរាជបន្ទូលប្ដេជ្ញាចិត្តទៅកាន់សមាជិកសមាជិកាថា ព្រះអង្គនឹងសើរើឡើងវិញនៃការផ្ដល់ដីសម្បទានសេដ្ឋកិច្ចរបស់រដ្ឋាភិបាលបច្ចុប្បន្ន ដែលធ្វើឲ្យប៉ះពាល់ដល់ប្រជាពលរដ្ឋនោះ។
សម្ដេចក្រុមព្រះ នរោត្តម រណឫទ្ធិ អះអាងថា ការយាងមកឆាកនយោបាយវិញនេះ ក្នុងគោលបំណងមកស្រោចស្រង់ជាតិ នៅខណៈគណបក្សជាប់ឆ្នោតទាំងពីរកំពុងបែរខ្នងដាក់គ្នាមិនទាន់មានការឯកភាពជាតិនេះ។ សម្ដេចក្រុមព្រះ បន្ថែមថា ព្រះអង្គនឹងលុបបំបាត់អំពើពុករលួយក្រោមការដឹកនាំរបស់រដ្ឋាភិបាលបច្ចុប្បន្នក្នុងមួយឆ្នាំៗប្រមាណ ៥០០លានដុល្លារសហរដ្ឋអាមេរិក និងសើរើឡើងវិញនៃការផ្ដល់ដីសម្បទានសេដ្ឋកិច្ច ដែលធ្វើឲ្យប៉ះពាល់ដល់ប្រជាពលរដ្ឋ និងធនធានធម្មជាតិនោះ៖ «ដីណាជារបស់រដ្ឋ ដីណាជារបស់ប្រជារាស្ត្រ មានកម្មសិទ្ធិត្រឹមត្រូវ គ្មានបរទេសណា ខ្មែរណាដកហូតបានជាដាច់ខាត យល់ទេ? ព្រមទេ? ព្រម»។
ឆ្លើយតបនឹងបញ្ហានេះ មន្ត្រីនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា ការលើកឡើងរបស់សម្ដេចក្រុមព្រះ នេះ គ្រាន់តែជាការទាញយកប្រជាប្រិយភាពរបស់ខ្លួនតែប៉ុណ្ណោះ៖ «ក៏ប៉ុន្តែខ្ញុំសង្កេតឃើញរយៈពេលការដឹកនាំសហនាយករដ្ឋមន្ត្រីកាលពីឆ្នាំ១៩៩៣ គឺមានការផ្ដល់ដីសម្បទាន ៩៩ឆ្នាំតាំងពីពេលនោះមក»។
អ្នកឃ្លាំមើលផ្នែកអភិវឌ្ឍន៍សង្គម លោក កែម ឡី មានប្រសាសន៍ថា សម្ដេចក្រុមព្រះ នឹងលំបាកទទួលយកជោគជ័យនៅពេលបោះឆ្នោតខាងមុខ ពីព្រោះប្រជាពលរដ្ឋបានស្គាល់ស្នាដៃដឹកនាំរបស់ព្រះអង្គកាលពីអាណត្តិទី១ឆ្នាំ១៩៩៣។
ក្រៅពីការប្ដេជ្ញាចិត្តអំពីការកសាងជាតិឡើងវិញនេះ សម្ដេចក្រុមព្រះ នរោត្តម រណឫទ្ធិ បានរិះគន់ធ្ងន់ៗទៅលើគណបក្សសង្គ្រោះជាតិ និងគណបក្សហ៊្វុនស៊ិនប៉ិច ដែលដឹកនាំដោយព្រះអនុជរបស់ព្រះអង្គ គឺសម្ដេចរាជបុត្រី នរោត្តម អរុណរស្មី និងលោក ញឹក ប៊ុនឆៃ នោះ។ ព្រះអង្គមានព្រះរាជបន្ទូលថា គណបក្សហ៊្វុនស៊ិនប៉ិច ដែលជាកេរមរតករបស់ព្រះអង្គនោះ ត្រូវបានរលាយនៅនីតិកាលទី៥នេះ ដោយសារតែការដឹកនាំរបស់អ្នកទាំងពីរ។
ភ្លាមៗនោះ សម្ដេចក្រុមព្រះ រំឭកអំពីអតីតព្រះមហាក្សត្រ ព្រះបរមរតនកោដ្ឋ នរោត្តម សីហនុ ដោយព្រះអង្គធ្វើឲ្យមានការឯកភាពជាតិ ហើយព្រះអង្គក៏បញ្ជាឲ្យសហការីរបស់ព្រះអង្គ ចាក់បទចម្រៀងដែលច្រៀងដោយសម្ដេចព្រះនរោត្តម សីហនុ លាហើយកម្ពុជា (ចម្រៀង)។ ក្រោយពីស្ដាប់បទចម្រៀងនេះ សង្កេតឃើញថា អ្នកចូលរួមជាច្រើនបានស្រក់ទឹកភ្នែកនឹកស្រណោះអតីតព្រះមហាក្សត្រ។
សម្ដេចក្រុមព្រះ នរោត្តម រណឫទ្ធិ បានរិះគន់គណបក្សសង្គ្រោះជាតិ ធ្ងន់ៗថា គណបក្សនេះគួរតែចូលសភា ព្រោះការដែលនៅក្រៅសភាប្រមាណជិត ១០ខែមកនេះ គណបក្សទាំងពីរគ្មានដោះស្រាយអ្វីបានទេ។ លើសពីនេះទៀត សម្ដេចក្រុមព្រះ អះអាងថា ការចង់បោះឆ្នោតមុនអាណត្តិជារឿងខុសរដ្ឋធម្មនុញ្ញ។
អនុប្រធានគណបក្សសង្គ្រោះជាតិ លោក កឹម សុខា បញ្ចេញប្រតិកម្មថា សម្ដេចក្រុមព្រះ កំពុងតែយល់ខុស ហើយថា បើសិនជាសម្ដេចក្រុមព្រះ គិតត្រូវនោះ ប្រទេសជាតិមិនធ្លាក់ដល់កម្រិតនេះទេ៖ «បើរណឫទ្ធិថាសង្គ្រោះជាតិខុស គឺសង្គ្រោះជាតិត្រូវហើយ បើរណឫទ្ធិថាគណបក្សប្រជាជនត្រូវ គឺគណបក្សប្រជាជនខុសហើយ អ៊ីចឹងគាត់គិតអីខុសទាំងអស់ បានជាប្រជារាស្ត្របោះឆ្នោតឲ្យគាត់ហើយ គាត់ដឹកនាំប្រទេសមិនកើត»។
ទោះជាយ៉ាងណា សម្ដេចក្រុមព្រះ ក៏ទទួលស្គាល់ថា គណៈកម្មាធិការជាតិរៀបចំការបោះឆ្នោត (គ.ជ.ប) គ្មានឯករាជ្យ និងតម្លាភាពដែរ។ សម្ដេចក្រុមព្រះ នរោត្តម រណឫទ្ធិ ក៏ចង់ឲ្យកែទម្រង់ស្ថាប័នបោះឆ្នោតដែរនៅពេលខាងមុខ។
គណបក្សសង្គមរាស្ត្ររាជាធិបតេយ្យ នឹងធ្វើសមាជនៅខែវិច្ឆិកា ខាងមុខ។ ការប្រកាសសម្ពោធគណបក្សថ្មីរបស់សម្ដេចក្រុមព្រះ នេះ នៅបន្ទាប់ពីក្រសួងមហាផ្ទៃ ទទួលស្គាល់ និងប្រកាសជាផ្លូវការ កាលពីថ្ងៃទី២២ ខែឧសភា ឆ្នាំ២០១១៤។
សម្ដេចក្រុមព្រះ នរោត្តម រណឫទ្ធិ អះអាងថា ព្រះអង្គនឹងគិតគូរអំពីបញ្ហាព្រំដែន ដែលប្រទេសជិតខាងបានឈ្លានពាននោះដែរ ហើយព្រះអង្គនឹងធ្វើឲ្យកម្ពុជា រួចផុតពីការត្រួតត្រារបស់បរទេស។
សម្ដេចក្រុមព្រះ បានរំឭកកាលពីគណបក្សហ៊្វុនស៊ិនប៉ិច ឈ្នះគណបក្សប្រជាជនកម្ពុជា កាលពីបោះឆ្នោតអាណត្តិទី១ ឆ្នាំ១៩៩៣ ដែលព្រះអង្គជាព្រះប្រធានគណបក្ស ហើយយល់ព្រមចែកអំណាចឲ្យ លោក ហ៊ុន សែន ជានាយករដ្ឋមន្ត្រីទី២នោះ មិនមែនព្រះអង្គទន់ជ្រាយក្នុងការដឹកនាំទេ ដោយសារតែព្រះអង្គធ្វើតាមព្រះបិតារបស់ព្រះអង្គ គឺសម្ដេចនរោត្តម សីហនុ ដោយសម្ដេចឪមិនចង់ឲ្យមានការបំបែកទឹកដីកម្ពុជា ជាពីរនៅពេលនោះ។ ដូច្នេះ ក្នុងគោលបំណងផ្សះផ្សាជាតិ ព្រះអង្គយល់ព្រមដូច្នេះ។ ក្រៅពីនេះ សម្ដេចក្រុមព្រះ នរោត្តម រណឫទ្ធិ អះអាងថា មានការបោះឆ្នោតឆ្នាំ១៩៩៣ នោះ ដែលមានរបបរាស្ត្រនិយម មានទង់ជាតិ មានបាវចនាជាតិ និងមានអ្វីៗដល់សព្វថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។