ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន នៅថ្ងៃអាទិត្យ ទី១៦ វិច្ឆិកា បានដឹកនាំ គ្រូបង្រៀន យុវជន សិស្ស និស្សិត មកពីមហាវិទ្យាល័យមួយចំនួននៅរាជធានីភ្នំពេញ សរុបមានគ្នា ប្រមាណ ១០០ នាក់ ទៅពិនិត្យបង្គោលព្រំដែនកម្ពុជា វៀតណាម លេខ ១៤៧ -១៤៨ នៅក្នុងភូមិខ្នា ឃុំខ្នាថ្នង់ ស្រុករំដួល ខេត្តស្វាយរៀង។
លោក រ៉ុង ឈុន ថ្លែងថា ការដឹកនាំក្រុមយុវជន សិស្ស និស្សិត ទៅពិនិត្យមើលបង្គោលព្រំដែន នៅស្រុករំដួល ខេត្តស្វាយរៀង នេះ ដើម្បីឲ្យសិស្សនិស្សិតប្រជាពលរដ្ឋ បានសិក្សាយល់ដឹងការពិត អំពីការបោះបង្គោលព្រំដែនប្រទេសរបស់ខ្លួន និងបណ្ដុះទឹកចិត្តស្នេហាជាតិ មាតុភូមិ ដល់អ្នកចូលរួមដំណើរទាំងអស់។
មកទល់ម៉ោង ១១ ថ្ងៃត្រង់ ក្រុមសិស្ស និស្សិត បានទៅជិតដល់ គោលដៅ ហើយ និងពុំមានការរារាំងពីសំណាក់ អាជ្ញាធរមានសមត្ថកិច្ចទេ។ លោក រ៉ុង ឈុន ឲ្យដឹងថា បើទោះជាមិនទាន់ការរារាំងក៏ដោយ តែតាមប្រភពព័ត៌មានពី កន្លែងគោលដៅប្រុងចុះទៅមើល បានឲ្យដឹងថា មានកម្លាំងអាជ្ញាធរ ខ្មែរ និងវៀតណាម ជាច្រើននាក់ បានរាយគ្នា នៅកន្លែងជិតបង្គោលព្រំដែនប្រទេសទាំង២នោះហើយ៕
សូមស្ដាប់សេចក្តីរាយការណ៍ផ្ទាល់ពីតំបន់ព្រំដែនកម្ពុជា-វៀតណាម ដោយលោក មុំ សុផុន ដូចតទៅ៖
ក្រុមយុវជនជាសកម្មជនឃ្លាំមើលព្រំដែនប្រមាណ១០០នាក់ដឹកនាំដោយក្រុមប្រឹក្សាឃ្លាំមើលកម្ពុជា បានចុះទៅមើលព្រំដែនប្រទេសកម្ពុជា និងវៀតណាម នៅក្នុងស្រុករំដួល ខេត្តស្វាយរៀង នៅថ្ងៃទី១៦ ខែវិច្ឆិកា ឆ្នាំ២០១៤។
លោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជា និងជាប្រធានសមាគមគ្រូបង្រៀនកម្ពុជា ឯករាជ្យ ថ្លែងថា ការចុះមកមើលព្រំដែននេះគឺដើម្បីសិក្សាស្វែងយល់ និងពិនិត្យមើលភាពមិនប្រក្រតីមួយចំនួនក្នុងការបោះបង្គោលព្រំដែនកម្ពុជា និងវៀតណាម។ លោកថ្លែងទៀតថា សកម្មភាពនេះក៏ជាការបំផុសគំនិតយុវជនឲ្យស្រលាញ់ជាតិមាតុភូមិ និងស្រលាញ់ទឹកដីដែរ។
ក្រុមយុវជនបានដើរទៅមើលបង្គោលកំណត់លេខ៧ លេខ៨ និងលេខ៩ ចន្លោះបង្គោលឡាក់ព្រំដែនលេខ១៤៧ ១៤៨ ព្រំដែនកម្ពុជា ក្នុងស្រុករំដួល ខេត្តស្វាយរៀង ជាប់ប្រទេសវៀតណាម ខេត្តតាយនិញ ឬហៅថា ខេត្តរោងដំរី។
ក្នុងពេលដែលក្រុមយុវជន និងពលរដ្ឋចុះទៅមើលបង្គោលកំណត់ព្រំដែននោះ គឺមានអាជ្ញាធរតាមថតសកម្មភាពក្រុមយុវជន និងអ្នកកាសែតដែលបានទៅសម្ភាសន៍ពលរដ្ឋនៅកន្លែងបោះបង្គោល ហើយក៏មានអាជ្ញាធរវៀតណាម ស្លៀកពាក់ស៊ីវិល នៅឃ្លាំមើលដែរ។
ពលរដ្ឋនៅក្នុងឃុំថ្នាធ្នង់ ស្រុករំដួល ខេត្តស្វាយរៀង ថ្លែងដីកេរ្តិ៍ដំណែល និងដីផ្នូរឪពុករបស់គាត់ត្រូវបោះបង្គោលព្រំដែនកាត់ចូលទៅប្រទេសវៀតណាម។ អ្នកស្រុកខ្លះទៀតថា ចម្ការស្វាយចន្ទីរបស់ពួកគាត់ដែលកាន់កាប់ និងប្រមូលផលជាយូរមកហើយនោះក៏ត្រូវបោះបង្គោលចំពាក់កណ្ដាលចម្ការដែរ។
ក្រុមយុវជនដែលទៅមើលបង្គោលកំណត់ព្រំដែននោះ ហាក់ស្រងាកចិត្តនៅពេលដែលមើលឃើញការបោះបង្គោលទាំងនោះបោះចូលក្នុងទឹកដីរបស់ពលរដ្ឋដែលផ្ទុយពីប្រសាសន៍របស់លោកនាយករដ្ឋមន្ត្រីការបោះបង្គោលព្រំដែនធ្វើឲ្យកម្ពុជាចំណេញដី។ ក្រុមយុវជន និងពលរដ្ឋហាក់មិនជឿជាក់ចំពោះការបោះបង្គោលព្រំដែនទ្វេភាគីកម្ពុជា និងវៀតណាម ទេ ដោយមើលទៅកម្ពុជា ហាក់នៅក្រោមគំនាបនយោបាយរបស់ប្រទេសវៀតណាម។
ទោះយ៉ាងណាលោករ៉ុង ឈុន តំណាងក្រុមប្រឹក្សាឃ្លាំមើលកម្ពុជា ឲ្យដឹងថា របាយការណ៍នៅដែលលោកប្រមូលបាននេះ នឹងដាក់ជូនទៅសមាជិករដ្ឋសភាដើម្បីទាមទារឲ្យលុបចោលអនុសញ្ញាបំពេញបន្ថែមឆ្នាំ២០០៥ ដែលធ្វើឲ្យកម្ពុជាបាត់បង់បូរណភាពទឹកដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។