លោក គង់ គាំ ប្រធានគណបក្ស សម រង្ស៊ី មានប្រសាសន៍ថា មូលហេតុដែលសមាជិកសភាទាំង ១១រូប មិនចូលរួមប្រជុំ ឬចូលរួមអនុម័តច្បាប់ថវិកាជាតិឆ្នាំ២០១៤ និងច្បាប់ផ្សេងៗ ព្រោះបក្សប្រឆាំងមិនទទួលស្គាល់រដ្ឋសភានីតិកាលទី៥ ដែលបង្កើតដោយគណបក្សប្រជាជនកម្ពុជា ជាឯកបក្សនេះទេ។ លោកបន្ថែមថា រាល់ការអនុម័តលើសេចក្តីព្រាងច្បាប់អ្វីមួយដែលមានតែសមាជិកសភាគណបក្សប្រជាជនកម្ពុជា ហើយគ្មានការចូលរួមពីបក្សប្រឆាំង គឺមិនស្របច្បាប់ទេ។
លោក គង់ គាំ៖ «ដោយសារថាច្បាប់នេះចេញពីរដ្ឋសភា ហើយរដ្ឋសភាក្រោយការបោះឆ្នោតឆ្នាំ២០១៣ នេះ គឺជារដ្ឋសភាឯកបក្ស ដែលអ្នកតំណាងរាស្ត្ររបស់គណបក្សសង្គ្រោះជាតិ ដែលជាអ្នកឈ្នះឆ្នោតពិតប្រាកដហ្នឹង មិនបានចូលរួមអនុម័តច្បាប់ហិរញ្ញវត្ថុស្ដីពីការគ្រប់គ្រងឆ្នាំ២០១៤ នេះទេ។ យើងគាំទ្រគណបក្សសង្គ្រោះជាតិ ហើយយើងទុកឲ្យនៅរដ្ឋសភា និងព្រឹទ្ធសភា ឲ្យគណបក្សប្រជាជនកម្ពុជា គ្រប់គ្រងឯកបក្សទទួលខុសត្រូវលើបញ្ហាដឹកនាំបច្ចុប្បន្ននេះចុះ»។
ទោះយ៉ាងណា នៅថ្ងៃទី២១ ខែវិច្ឆិកា ព្រឹទ្ធសភាបានបើកកិច្ចប្រជុំវិសាមញ្ញនីតិកាលទី៣ របស់ខ្លួន ដោយលើកយករបៀបវារៈចំនួន៤ មកអនុម័តរួមមាន សេចក្តីព្រាងច្បាប់ស្ដីពីហិរញ្ញវត្ថុសម្រាប់គ្រប់គ្រងឆ្នាំ២០១៤។ សេចក្តីព្រាងច្បាប់ស្ដីពីការបង្កើតក្រសួងឧស្សាហកម្ម និងសិប្បកម្ម និងសេចក្តីព្រាងច្បាប់ស្ដីពីការបង្កើតក្រសួងរ៉ែ និងថាមពល។
កិច្ចប្រជុំវិសាមញ្ញព្រឹទ្ធសភា នៅថ្ងៃទី២១ ខែវិច្ឆិកា មានសមាជិកព្រឹទ្ធសភាមកពីគណបក្សប្រជាជនកម្ពុជា ចំនួន ៤០រូប និងមានតំណាងរាជរដ្ឋាភិបាលចូលរួមការពារសេចក្តីព្រាងច្បាប់ផង។
រដ្ឋសភាបានអនុម័តច្បាប់ថវិកាជាតិសម្រាប់ចំណាយនៅឆ្នាំ២០១៤ កាលពីថ្ងៃទី១២ វិច្ឆិកា មានចំនួនជាង ១៤លានលានរៀល (១៤.១៦៦.១៩៥លានរៀល) ឬស្មើប្រហែល ៣.៤០០លានដុល្លារសហរដ្ឋអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។