ព្រឹទ្ធសភាគ្រោងនឹងបើកកិច្ចប្រជុំពិនិត្យ និងអនុម័តសេចក្តីព្រាងច្បាប់បោះឆ្នោត និងរៀបចំគណៈកម្មាធិការជាតិរៀបចំការបោះឆ្នោត នៅថ្ងៃច័ន្ទ ទី២៣ មីនា បន្ទាប់សេចក្តីព្រាងច្បាប់ទាំងពីរត្រូវបានរដ្ឋសភាអនុម័តដោយឯកច្ឆន្ទរួចមក។
សេចក្តីព្រាងច្បាប់ទាំងពីរ នឹងចូលជាធរមានក្រោយពេលព្រះមហាក្សត្រឡាយព្រះហស្តលេខា។ តំណាងរាស្ត្រគណបក្សកាន់អំណាច និងគណបក្សប្រជាជនកម្ពុជា បានលើកដៃបោះឆ្នោតគាំទ្រច្បាប់ទាំងពីរកាលពីថ្ងៃទី១៩ មីនា ដោយគ្មានការចោទសួរដេញដោលអ្វីទាំងអស់។
លោក សម រង្ស៊ី ប្រធានគណបក្សសង្គ្រោះជាតិ បញ្ជាក់ប្រាប់អ្នកសារព័ត៌មានក្រោយការបោះឆ្នោតថា បក្សប្រឆាំងមិនពេញចិត្តលើសេចក្តីព្រាងច្បាប់ទាំងពីរទាំងស្រុងឡើយ ប៉ុន្តែត្រូវធ្វើសម្បទានឲ្យបក្សកាន់អំណាច ដើម្បីមានការកែទម្រង់ការបោះឆ្នោតខ្លះ។
ទោះបីជាសេចក្តីព្រាងច្បាប់ទាំងពីរត្រូវបានបោះឆ្នោតគាំទ្រដោយរដ្ឋសភាក៏ដោយ ប៉ុន្តែស្ថានភាពចម្រូងចម្រាសផ្នែកនយោបាយនៅតែបន្តកើតមាន។ លោកនាយករដ្ឋមន្ត្រី ហ៊ុន សែន បានចោទប្រកាន់ លោក កឹម សុខា អនុប្រធានគណបក្សប្រឆាំងថាជាមេខ្លោងដឹកនាំការផ្ដួលរំលំរដ្ឋាភិបាលរបស់លោកក្រោយការបោះឆ្នោត។ ទោះបីការចោទប្រកាន់ត្រូវបាន លោក កឹម សុខា បដិសេធទាំងស្រុងក៏ដោយ ក៏ លោក ហ៊ុន សែន ព្រមាននឹងវាយខ្នោះ លោក កឹម សុខា ប្រសិនលោកដឹកនាំធ្វើបាតុកម្មជាបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។