ព្រឹទ្ធសភាដែលជាស្ថាប័ននីតិប្បញ្ញត្តិជាន់ខ្ពស់នៅកម្ពុជា បានគាំទ្រឲ្យ លោក ហ៊ុន សែន នាយករដ្ឋមន្ត្រី បន្តតួនាទីរបស់ខ្លួនទៀត បើទោះបីគណបក្សប្រឆាំងធ្វើបាតុកម្មទាមទារឲ្យទម្លាក់នាយករដ្ឋមន្ត្រីចេញ និងស្នើសុំឲ្យមានការរៀបចំបោះឆ្នោតឡើងវិញ។
ស្ថាប័នមួយនេះបានចេញសេចក្តីថ្លែងការណ៍មួយ កាលពីថ្ងៃសុក្រ ទី២០ ខែធ្នូ ដែលវិទ្យុអាស៊ីសេរី ទើបតែទទួលបាន បង្ហាញជំហរគាំទ្រ លោក ហ៊ុន សែន ឲ្យបន្តធ្វើជានាយករដ្ឋមន្ត្រីស្របច្បាប់។
លោក ហ៊ុន សែន បានប្រកាសបដិសេធថានឹងមិនចុះចេញពីតំណែង ហើយក៏មិនរៀបចំបោះឆ្នោតសភានីតិកាលទី៥ឡើងវិញ តាមការទាមទាររបស់គណបក្សសង្គ្រោះជាតិ។
លិខិតរបស់ព្រឹទ្ធសភា បង្ហាញថា គ្មានហេតុផល និងមូលដ្ឋានច្បាប់ណាមួយដែលតម្រូវឲ្យរំលាយរដ្ឋសភា និងឲ្យនាយករដ្ឋមន្ត្រីលាលែងពីមុខតំណែងមុនចប់អាណត្តិនោះទេ។ ការលើកឡើងនេះ គឺសំអាងហេតុថា រដ្ឋសភា និងរាជរដ្ឋាភិបាលនីតិកាលទី៥ បានកើតចេញពីការបោះឆ្នោតតាមគោលការណ៍នៃលទ្ធិប្រជាធិបតេយ្យ សេរីពហុបក្ស ប្រកបដោយលក្ខណៈសេរី ត្រឹមត្រូវ និងយុត្តិធម៌ ស្របតាមច្បាប់ និងរដ្ឋធម្មនុញ្ញ។
ស្ថាប័នមួយនេះ ក៏ចាត់ទុកការប៉ុនប៉ងទាមទារទម្លាក់នាយករដ្ឋមន្ត្រីរបស់គណបក្សសង្គ្រោះជាតិ និងក្រុមបាតុករ ជាការបង្កឲ្យមានការបំផ្លិចបំផ្លាញសន្តិភាព ស្ថិរភាព សណ្ដាប់ធ្នាប់ ដែលនាំឲ្យមានការបែកបាក់ផ្ទៃក្នុងជាតិ។ ស្ថាប័នព្រឹទ្ធសភា ក៏បានអំពាវនាវឲ្យអ្នកដឹកនាំគណបក្សសង្គ្រោះជាតិ និងបាតុករ ងាកមកគោរពច្បាប់ និងបទបញ្ញត្តិនានា ដើម្បីរក្សាភាពស្ងប់ស្ងាត់ និងស្ថិរភាពសង្គមឡើងវិញ។
សមាជិកព្រឹទ្ធសភាមួយរូបមកពីគណបក្ស សម រង្ស៊ី លោក គង់ គាំ បញ្ជាក់ថា ការចេញសេចក្តីថ្លែងការណ៍គាំទ្រ លោក ហ៊ុន សែន ពីស្ថាប័នព្រឹទ្ធសភាពេលនេះ មិនបានឆ្លុះបញ្ចាំងពីជំហរសមាជិកទាំងអស់ទេ ព្រោះសមាជិកព្រឹទ្ធសភាទាំង ១១រូប មកពីគណបក្ស សម រង្ស៊ី មិនបានដឹងឮពីការចេញលិខិតនោះឡើយ។ លោកបន្តថា លិខិតចេញពីព្រឹទ្ធសភាដែលមានចរិតគាំទ្រ លោក ហ៊ុន សែន ទំនងចេញដោយសមាជិកព្រឹទ្ធសភាជាង ៤០រូប ដែលមកពីគណបក្សប្រជាជនកម្ពុជា។
«សំឡេង»
គណបក្សសង្គ្រោះជាតិ កំពុងដឹកនាំបាតុកម្មតវ៉ានៅទីលានប្រជាធិបតេយ្យ ទាមទារឲ្យមានការបោះឆ្នោតឡើងវិញ និងទាមទារឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែង។
មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត (គ.ជ.ប) ដែលមានភារៈរៀបចំការបោះឆ្នោត ធ្លាប់ប្រាប់ថា ច្បាប់បោះឆ្នោតនៅប្រទេសកម្ពុជា មិនមានចែងអំពីនីតិវិធីបោះឆ្នោតឡើងវិញ ក្រោយពេលមានការតវ៉ាចប់សព្វគ្រប់របស់ភាគីចូលរួមបោះឆ្នោតនៅ គ.ជ.ប និងក្រុមប្រឹក្សាធម្មនុញ្ញនោះឡើយ។
យ៉ាងណា អង្គការក្រៅរដ្ឋាភិបាលដែលធ្វើការឃ្លាំមើលការបោះឆ្នោតនៅកម្ពុជា គិតថា ការបោះឆ្នោតឡើងវិញ អាចធ្វើទៅរួចបើសិនមានវិបត្តិនយោបាយ ឬមានការយល់ព្រមបោះឆ្នោតឡើងវិញពីគណបក្សដែលចូលរួមបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។