លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ នៅមិនទាន់ឆ្លើយតបចំពោះសំណើរបស់ប្រធានគណបក្សសង្គ្រោះជាតិ ករណីដែលចង់អោយមានអន្តរាគមន៍ដោះលែងសកម្មជនគណបក្សសង្គ្រោះជាតិ ចំនួន ៣នាក់ កំពុងជាប់ឃុំនៅពន្ធនាគារព្រៃស។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍នៅល្ងាចថ្ងៃព្រហស្បតិ៍ ទី៦ ខែសីហា ថា លោក ស ខេង បានទទួលលិខិតរបស់ប្រធានគណបក្សសង្គ្រោះជាតិ នោះហើយ ប៉ុន្តែនៅមិនទាន់មានការឆ្លើយតបយ៉ាងណានៅឡើយទេ។
លោក សម រង្ស៊ី ប្រធានគណបក្សសង្គ្រោះជាតិ កាលពីថ្ងៃទី៥ ខែសីហា បានផ្ញើលិខិតជូន លោក ស ខេង ដោយស្នើអោយដោះលែងសកម្មជនគណបក្សសង្គ្រោះជាតិ ចំនួន ៣រូប ដែលអាជ្ញាធរចាប់ខ្លួនពាក់ព័ន្ធនឹងហិង្សាដែលកើតមានឡើងក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា។
ពាក់ព័ន្ធនឹងការឃុំខ្លួនយុវជនទាំង ៣រូបនេះ មេធាវីការពារ លោក សំ សុគង់ បញ្ជាក់ថា មកដល់ពេលនេះ ពួកគេនៅពុំទាន់ត្រូវចៅក្រមបើកការស៊ើបសួរនៅឡើយទេ៖ «កាលពីថ្ងៃសៅរ៍ ដោយសារចំថ្ងៃសម្រាក គឺសៅរ៍ អាទិត្យ ហ្នឹង ហើយចៅក្រមដែលគាត់ទទួលបន្ទុកក្នុងសំណុំរឿងហ្នឹង គាត់មិនបានជួបជាមួយអ្នកទាំង៣ហ្នឹងទេ។ អ្នកទាំង៣ ពេលគេបញ្ជូនមកដល់ហ្នឹង គាត់ជួបជាមួយចៅក្រមប្រចាំការ ហើយគាត់ក៏មិនបានសួរយកកំណត់ហេតុអីដែរ គឺគាត់គ្រាន់តែសម្រេចនីតិវិធីទាក់ទងនឹងការបង្ហាញមុខដំបូង និងសម្រេចឃុំខ្លួនបណ្ដោះអាសន្ន។ ចឹងតាំងពីថ្ងៃសៅរ៍ រហូតមកដល់ពេលនេះ ជនជាប់ចោទទាំង៣ នៅមិនទាន់ជួបចៅក្រមកាន់សំណុំរឿងនៅឡើយ»។
យុវជនគណបក្សសង្គ្រោះជាតិ ទាំង ៣រូបនោះរួមមាន លោក ឃិន ជំរឿន ប្រធានចលនាយុវជនគណបក្សសង្គ្រោះជាតិ រាជធានីភ្នំពេញ លោក សាន គីមហេង ប្រធានចលនាយុវជនគណបក្សសង្គ្រោះជាតិ ខណ្ឌទួលគោក និងលោក នាង សុឃុន ហិរញ្ញិកចលនាយុវជនគណបក្សសង្គ្រោះជាតិ ខណ្ឌច្បារអំពៅ។ ពួកគេត្រូវនគរបាលចាប់ខ្លួន និងនាំទៅឃុំបណ្ដោះអាសន្ននៅពន្ធនាគារព្រៃស កាលពីថ្ងៃទី២ ខែសីហា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។