អង្គការតម្លាភាពកម្ពុជា ប្រកាសថានឹងពង្រាយអ្នកសង្កេតការណ៍ចំនួន ៨២២នាក់ ដោយប្រើប្រាស់វិធីសាស្ត្រថ្មីមួយសម្រាប់ការសង្កេតការណ៍បោះឆ្នោត តាមរយៈការសង្កេតសំណាកគំរូ។
សេចក្ដីថ្លែងការណ៍របស់អង្គការតម្លាភាពកម្ពុជា ចេញផ្សាយនៅថ្ងៃទី១១ ខែកក្កដា បានអោយដឹងថា អង្គការនេះនឹងដាក់ពង្រាយអ្នកសង្កេតការណ៍បោះឆ្នោតចំនួន ៨២២នាក់ នៅតាមការិយាល័យបោះឆ្នោតដែលត្រូវជ្រើសរើសចំនួន ៤១១កន្លែងនៅទូទាំងប្រទេស។ ការសង្កេតនោះនឹងប្រើប្រាស់វិធីសាស្ត្រតាមសំណាកគំរូ ដែលហៅជាភាសាអង់គ្លេសថា សេមផល ប៊ែស អុបសើវេសិន (Sample Base Observation)។
នាយកប្រតិបត្តិអង្គការតម្លាភាពកម្ពុជា លោក ព្រាប កុល មានប្រសាសន៍បន្ថែមថា វិធីសាស្ត្រដែលលោកយកមកប្រើប្រាស់នេះ មានការទទួលស្គាល់ជាអន្តរជាតិ ថាជាការវាយតម្លៃលើការបោះឆ្នោតប្រកបដោយភាពត្រឹមត្រូវក្នុងការស្វែងរក និងរារាំងភាពមិនប្រក្រតីនានាដែលនឹងអាចកើតមានឡើង៖ «អីចឹងការរៀបចំរូបមន្តនេះ គឺតាមបែបវិទ្យាសាស្ត្រដែលពិភពលោកគេរកឃើញ ហើយយើងអាចទទួលយកទាំងគុណភាព និងសុក្រឹតភាព។ វិធីសាស្ត្រនេះ គឺយើងជ្រើសរើសតាមបែបបច្ចេកទេស ដោយប្រើប្រព័ន្ធកុំព្យូទ័រ។ ដូច្នេះ ប្រសិនបើយើងជ្រើសរើសទៅវាប៉ះចំតំបន់ហ្នឹង ទោះបីតំបន់នេះនៅកោះ ឬនៅទីភូមិដាច់ស្រយាលណា ក៏ពួកយើងខ្ញុំទៅដែរ។ ហើយជាក់ស្តែង ការជ្រើសរើសនេះ គឺបានទាំងការិយាល័យនេះនៅលើកោះនេះក៏មាន នៅលើកំពូលភ្នំក៏មាន ដូច្នេះគឺមានគ្រប់ទីកន្លែងទាំងអស់ ដើម្បីយើងអាចយករបាយការណ៍យើងទៅយើងវិភាគបានត្រឹមត្រូវ»។
លោក ព្រាប កុល បញ្ជាក់ថា លទ្ធផលនៃការសង្កេតការណ៍របស់អង្គការតម្លាភាព នឹងត្រូវផ្សព្វផ្សាយអោយដឹងភ្លាមៗនៅក្រោយការបោះឆ្នោតថ្ងៃទី២៨ ខែកក្កដា។
ទាក់ទិននឹងការសង្កេតការណ៍បោះឆ្នោត អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា បានអោយដឹងថា មកដល់ពេលនេះមានអ្នកសង្កេតការណ៍ទាំងជាតិ និងអន្តរជាតិ ចំនួនប្រមាណ ១ម៉ឺន ៩ពាន់នាក់ ដែលនឹងចូលរួមសង្កេតការណ៍បោះឆ្នោតជ្រើសតាំងអ្នកតំណាងរាស្ត្រអាណត្តិទី៥៖ «ឥឡូវនេះ យើងមានប្រមាណជាជិត ១.៩០០នាក់ហើយ ចំពោះអ្នកសង្កេតការណ៍ជាតិម៉ោពី ២៤អង្គការ ហើយអ្នកសង្កេតការណ៍អន្តរជាតិមាន ៤១នាក់ មកពី ៦អង្គការ»។
ក្រៅពីផ្ដល់អ្នកសង្កេតការណ៍ អង្គការតម្លាភាពកម្ពុជា នឹងផ្ដល់នូវវគ្គបណ្ដុះបណ្ដាលដោយឥតគិតថ្លៃសម្រាប់ប្រព័ន្ធផ្សព្វផ្សាយ និងអ្នកសារព័ត៌មាន ពីរបៀបរាយការណ៍ពាក់ព័ន្ធនឹងការបោះឆ្នោតដែលគ្រោងនឹងធ្វើនៅថ្ងៃទី២៣ ខែកក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។