ប្រធានអង្គការតម្លាភាពកម្ពុជា ត្រៀមសហការផ្តល់បច្ចេកទេសនិងឯកសារអំពើពុករលួយជូនគណៈកម្មការអង្កេត បោសសម្អាត និងប្រឆាំងអំពើពុករលួយនៃរដ្ឋសភា ឬគណៈកម្មការទី១០ ទៅតាមការស្នើសុំរបស់ថ្នាក់ដឹកនាំស្ថាប័ននេះ។
ការប្រកាសនេះ កើតឡើងបន្ទាប់ពីប្រធានគណៈកម្មការទី១០ នៃរដ្ឋសភា ស្នើជួបពិភាក្សាផ្តល់ព័ត៌មានដើម្បីឈានដល់លុបបំបាត់អំពើពុករលួយនៅកម្ពុជា ឲ្យបានប្រសើរនាថ្ងៃអនាគត។
ឆ្លើយតបតាមលិខិតអញ្ជើញរបស់ប្រធានគណៈកម្មការទី១០ នៃរដ្ឋសភា លោក ព្រាប កុល នាយកប្រតិបត្តិអង្គការតម្លាភាពកម្ពុជា បានឲ្យដឹងនៅថ្ងៃទី១៦ ខែកញ្ញា ថា អង្គការលោកត្រៀមផ្ដល់ព័ត៌មាន និងអ្នកជំនាញដើម្បីផ្ដល់ព័ត៌មានបំបាត់អំពើពុករលួយនៅតាមស្ថាប័នរដ្ឋនានា ជូនគណៈកម្មការជំនាញរដ្ឋសភានៅចុងសប្ដាហ៍នេះ។
លោកបន្តថា អង្គការតម្លាភាពកម្ពុជា នឹងសហការផ្ដល់ឯកសារ ឬអ្នកបច្ចេកទេសមានវិជ្ជាជីវៈខ្ពស់ដើម្បីស្រាវជ្រាវពីឫសគល់ ឬដើមហេតុនៃអំពើពុករលួយនៅតាមស្ថាប័នរដ្ឋនានាកន្លងមក៖ «ដើម្បីផ្លាស់ប្ដូរយោបល់ ពិភាក្សា និងជជែកគ្នាអំពីបញ្ហាអំពើពុករលួយ ក៏ដូចជាលទ្ធភាពនៃការធ្វើសហប្រតិបត្តិការរវាងរដ្ឋសភា និងអង្គការតម្លាភាពកម្ពុជា ក្នុងក្របខ័ណ្ឌស្ថាប័ន ហើយយើងនឹងរកវិធីដើម្បីធ្វើការជាមួយគ្នាក្នុងការជួយជាលក្ខណៈបច្ចេកទេស ក៏ដូចជាកិច្ចសហប្រតិបត្តិការដើម្បីរួមចំណែកធ្វើការងារជាមួយនឹងស្ថាប័នរដ្ឋសភាក្នុងការបំពេញមុខងាររួមចំណែកប្រយុទ្ធប្រឆាំងអំពើពុករលួយនៅក្នុងប្រទេសកម្ពុជា»។
លោក ព្រាប កុល បញ្ជាក់ថា លោក ហូរ វ៉ាន់ ប្រធានគណៈកម្មការទី១០ នៃរដ្ឋសភា បានស្នើរូបលោកនិងក្រុមការងារដើម្បីជួបពិភាក្សាលើបញ្ហាពុករលួយ នៅថ្ងៃទី១៩ ខែកញ្ញា នាវិមានរដ្ឋសភា។ ត្រង់ចំណុចនេះ លោក ហូរ វ៉ាន់ បានប្រាប់វិទ្យុអាស៊ីសេរីថា គោលបំណងជួបពិភាក្សាជាមួយមន្ត្រីអង្គការតម្លាភាពកម្ពុជា ដើម្បីចង់បានព័ត៌មានមួយចំនួនពាក់ព័ន្ធនឹងតម្លាភាព និងការអង្កេតជុំវិញអំពើពុករលួយនៅកម្ពុជា។
តាមរយៈជំនួបនេះ លោក ហូរ វ៉ាន់ មានជំនឿថា អាចនឹងជំរុញឲ្យកិច្ចខិតខំប្រឹងប្រែងលុបបំបាត់អំពើពុករលួយនៅក្នុងសង្គមកម្ពុជា ទទួលបានលទ្ធផលល្អនៅថ្ងៃខាងមុខ៖ «យើងចង់បានបទពិសោធន៍ក្នុងការយកព័ត៌មានផ្សេងៗ ដើម្បីយើងយកមូលដ្ឋាន និងបទពិសោធន៍ទាំងនេះ ដើម្បីពង្រឹងគណៈកម្មការទី១០របស់យើងខ្ញុំ ដើម្បីស្រាវជ្រាវ ស៊ើបអង្កេត និងដើម្បីទទួលបាននូវឯកសារគ្រប់គ្រាន់ក្នុងការតស៊ូ និងប្រយុទ្ធនឹងអំពើពុករលួយ»។
ទាក់ទិនបញ្ហានេះ កាលពីថ្ងៃទី៩ ខែកញ្ញា អង្គការតម្លាភាពកម្ពុជា បានចេញរបាយការណ៍ស្រាវជ្រាវរយៈពេល ២ឆ្នាំ រកឃើញថា ប្រព័ន្ធការពារសុចរិតភាពរបស់ប្រទេសកម្ពុជា នៅទន់ខ្សោយ និងត្រូវកែលំអច្រើនទៀត ទោះបីមានសញ្ញារីកចម្រើន និងចំណុចខ្លាំងមួយចំនួនក្តី។
ស្ថាប័នដដែលនេះ ក៏បានរកឃើញថា នៅកម្ពុជា ទាំងស្ថាប័នរដ្ឋ ស្ថាប័នឯកជន ស្ថាប័នអង្គការមិនមែនរដ្ឋាភិបាល ព្រមទាំងប្រព័ន្ធផ្សព្វផ្សាយផង ក៏មានអំពើពុករលួយដូចគ្នា គ្រាន់តែមានក្នុងកម្រិតតិច ឬច្រើនតែប៉ុណ្ណោះ។
ទោះយ៉ាងណា លោក ផៃ ស៊ីផាន រដ្ឋលេខាធិការ និងជាមន្ត្រីនាំពាក្យទីស្ដីការគណៈរដ្ឋមន្ត្រីកម្ពុជា ធ្លាប់មានប្រសាសន៍ថា រដ្ឋាភិបាលបានធ្វើសកម្មភាពឈានដល់លុបបំបាត់អំពើពុករលួយជាបន្តបន្ទាប់ ជាពិសេសបានធ្វើកំណែទម្រង់ស៊ីជម្រៅទៅលើស្ថាប័នរដ្ឋមួយចំនួនដែលមានភាពមិនប្រក្រតី។ ជាងនេះ អង្គភាពប្រឆាំងអំពើពុករលួយ ក៏កំពុងបន្តការងាររបស់ខ្លួនបានសកម្មបំផុត។
យ៉ាងនេះក្តី នៅក្នុងរបាយការណ៍ស្រាវជ្រាវឆ្នាំ២០១៤ របស់អង្គការតម្លាភាពកម្ពុជា បានផ្តល់នូវអនុសាសន៍ពិគ្រោះយោបល់ពីផ្នែកពាក់ព័ន្ធនានា មានដូចជា ទាមទារឲ្យកែទម្រង់ប្រព័ន្ធតុលាការ ធ្វើវិសោធនកម្មច្បាប់ប្រឆាំងអំពើពុករលួយ អនុម័តច្បាប់ស្ដីពីសិទ្ធិទទួលបានព័ត៌មាន និងធ្វើកំណែទម្រង់វិស័យសាធារណៈជាដើម ទើបអាចលើកស្ទួយប្រព័ន្ធសុចរិតភាពនៅកម្ពុជា ឬលុបបំបាត់អំពើពុករលួយនៅកម្ពុជា បានប្រសើរនៅថ្ងៃអនាគត។
ទោះជាបែបណា លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានបដិសេធ និងចាត់ទុករបាយការណ៍របស់អង្គការតម្លាភាពកម្ពុជា ថាមានលក្ខណៈនយោបាយ និងមានឧបាយកលផ្ដួលរំលំរដ្ឋាភិបាលទៀតផង៖ «ឥឡូវសួរលោក ព្រាប កុល ទៅ បើរឿងនយោបាយវិញ នៅចុងច្រមុះគាត់ហ្នឹងរឿងនយោបាយ។ មិនមែនថាខ្ញុំអត់ព័ត៌មានទេ គាត់មានច្រើនណាស់។ គាត់ជាមេបាតុកម្មមួយក្នុងពេលដែលគេធ្វើបាតុកម្មផ្ដួលរំលំរាជរដ្ឋាភិបាលដែរ។ ខ្លួនគាត់អី អិន.ជី.អូ (NGO) យើងខ្ញុំសួរចៅហ្វាយគាត់នៅថ្នាក់លើហើយ ថាខុស។ អិន.ជី.អូ ត្រូវតែអព្យាក្រឹត អត់អាចប្រឆាំង ហើយក៏អត់អាចគាំទ្រទេ ប៉ុន្តែគាត់ធ្វើខុសលើគោក គាត់ចង្អុលគេ។ ឥឡូវសុំពិចារណាមើលទៅ គាត់មានល្បិចកលច្រើនណាស់ ដើម្បីផ្ដួលរំលំ ដើម្បីធ្វើគ្រប់បែបយ៉ាង។ យើងខ្ញុំនិយាយពីគាត់ត្រង់»។
យ៉ាងណាក៏ដោយ របាយការណ៍អង្គការតម្លាភាពកម្ពុជា ឆ្នាំ២០១៤ បានរកឃើញថា ជាទូទៅប្រទេសកម្ពុជា នៅមានប្រព័ន្ធសុចរិតភាពមិនទាន់រឹងមាំគ្រប់គ្រាន់ ដើម្បីលើកជ្រោងនីតិរដ្ឋ និងធានាឲ្យមានការអភិវឌ្ឍប្រកបដោយចិរភាព និងជីវិតរស់នៅរបស់ប្រជាពលរដ្ឋទូទាំងប្រទេសបានល្អ ឬប្រសើរនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។