ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា នឹងចាកចេញទៅកាន់ប្រទេសបារាំង នៅថ្ងៃទី៣០ មករា ដើម្បីស្វែងរកឯកសារប្រវត្តិសាស្ត្រខ្មែរក្រោមក្នុងសម័យអាណានិគមនិយមបារាំង លើដែនដីកូសាំងស៊ីន។
ដំណើរស្វែងរកឯកសាររបស់លោកនៅពេលនេះ គឺជាផ្នែកមួយនៃយុទ្ធនាការរបស់ខ្មែរក្រោម ក្នុងការទាមទារឲ្យរដ្ឋាភិបាលវៀតណាម ទទួលស្គាល់ប្រវត្តិសាស្ត្រទឹកដីកម្ពុជាក្រោម ដែលមន្ត្រីការទូតវៀតណាម បាននិយាយបំភ្លៃកាលពីខែមិថុនា ឆ្នាំ២០១៤។
បើទោះជាយុទ្ធនាការរបស់ខ្មែរក្រោម ក្នុងការទាមទារឲ្យរដ្ឋាភិបាលវៀតណាម ទទួលស្គាល់ប្រវត្តិសាស្ត្រពិតទឹកដីកម្ពុជាក្រោម ហាក់បានស្ងប់ស្ងាត់បន្តិចមែន ប៉ុន្តែយុទ្ធនាការនេះនៅមិនទាន់បញ្ចប់នៅឡើយទេ។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា ដែលបានដឹកនាំចលនាតវ៉ាប្រឆាំងការបំភ្លៃប្រវត្តិសាស្ត្ររបស់មន្ត្រីវៀតណាម កន្លងមក ឲ្យដឹងនៅថ្ងៃទី២៩ មករា ថា ដំណើរចាកចេញទៅកាន់ប្រទេសបារាំង របស់លោក គឺដើម្បីស្វែងរកឯកសារបន្ថែមទៀតដែលខ្មែរក្រោមមិនធ្លាប់ទទួលបានពីមុនមក ដើម្បីយកមកធ្វើជាភស្តុតាង បញ្ជាក់ទៅកាន់រដ្ឋាភិបាលវៀតណាម ដែលកន្លងមកបានអះអាងថា កម្ពុជាក្រោមជាទឹកដីរបស់វៀតណាម តាំងពីយូរមកហើយនោះ។
លោក ថាច់ សេដ្ឋា បញ្ជាក់ជាថ្មីថា យុទ្ធនាការទាមទារឲ្យរដ្ឋាភិបាលវៀតណាម ទទួលស្គាល់ប្រវត្តិសាស្ត្រខ្មែរ នឹងនៅធ្វើបន្តទៀត។ យ៉ាងណាក៏ដោយ លោកអះអាងថា លោកចង់បានឯកសារមកដល់ដៃជាមុនសិន។ លើសពីនេះ លោក ថាច់ សេដ្ឋា មានជំនឿថា ឯកសារទាំងអស់នេះក៏នឹងជួយឲ្យកូនខ្មែរជំនាន់ក្រោយ បានសិក្សារៀនសូត្រកាន់តែច្បាស់ថែមទៀតអំពីប្រវត្តិសាស្ត្រទឹកដីកម្ពុជាក្រោម។
លោក ថាច់ សេដ្ឋា ឲ្យដឹងដែរថា លោកនឹងយកឯកសារទាំងនេះទៅតម្កល់នៅក្រសួងអប់រំ ឬរាជបណ្ឌិត្យសភាកម្ពុជា និងស្នើឲ្យរដ្ឋាភិបាលបញ្ចូលវាក្នុងកម្មវិធីសិក្សា។
កាលពីខែមិថុនា ឆ្នាំ២០១៤ ពោល គឺបន្ទាប់ពីអង្គការសមាគមខ្មែរកម្ពុជាក្រោម ធ្វើពិធីរំឭកខួបបាត់បង់ទឹកដីកម្ពុជាក្រោម អ្នកនាំពាក្យស្ថានទូតវៀតណាម ប្រចាំកម្ពុជា លោក ត្រឹង វ៉ាំងថុង (Tran Van Thong) បានអះអាងថា ទឹកដីកម្ពុជាក្រោម គឺជាទឹកដីរបស់វៀតណាម តាំងពីយូរយារណាស់មកហើយ។ ការអះអាងនេះ ត្រូវបានខ្មែរក្រោម និងយុវជនយល់ថា វៀតណាម មានចេតនាបំភ្លៃប្រវត្តិសាស្ត្រ និងជាការប្រមាថមើលងាយទៅលើប្រជាពលរដ្ឋខ្មែរ។ ពួកគេបានធ្វើបាតុកម្មជាបន្តបន្ទាប់ចំនួន ៤លើករួចមកហើយ ដើម្បីទាមទារឲ្យរដ្ឋាភិបាលវៀតណាម ប្រកាសទទួលស្គាល់ប្រវត្តិសាស្ត្រទឹកដីកម្ពុជាក្រោម និងសុំទោសពលរដ្ឋខ្មែរជាសាធារណៈ។
ក្នុងការតវ៉ានោះដែរ ពួកគេបានដង្ហែញត្តិទៅដាក់នៅស្ថានទូតបារាំង ដើម្បីស្នើឲ្យរដ្ឋាភិបាលបារាំង ជួយបញ្ជាក់អំពីកិច្ចព្រមព្រៀងនានារវាងបារាំង និងវៀតណាម ដែលឈានដល់ធ្វើច្បាប់លេខ៤៩/៧៣៣ ក្នុងការកាត់ទឹកដីកម្ពុជាក្រោម ទៅឲ្យវៀតណាម នៅឆ្នាំ១៩៤៩។
ជាការឆ្លើយតប ស្ថានទូតបារាំង ប្រចាំកម្ពុជា កាលពីខែតុលា ឆ្នាំ២០១៤ បានផ្ញើលិខិតណែនាំឲ្យ លោក ថាច់ សេដ្ឋា ធ្វើដំណើរទៅស្វែងរកឯកសារទាំងអស់នោះនៅបណ្ណាសារជាតិអូទ្រើមែ (Outre-Mer) នៅខេត្តអេហ្សង់ប្រូវ៉ង់ (Aix-en-Provence) ប្រទេសបារាំង។
លោក ថាច់ សេដ្ឋា ចាត់ទុកការអនុញ្ញាតរបស់រដ្ឋាភិបាលបារាំង នៅពេលនេះ ថាជាឱកាសប្រវត្តិសាស្ត្រដែលខ្មែរក្រោមមិនធ្លាប់ទទួលបានពីមុនមក។ លោកថា លោកនឹងយកឯកសារទាំងនោះមកសិក្សាឲ្យបានច្បាស់លាស់ និងប្រើប្រាស់ឲ្យអស់លទ្ធភាព ដើម្បីបម្រើផលប្រយោជន៍ជាតិខ្មែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។