មន្ត្រីទំនាក់ទំនងការងារព្រំដែនកម្ពុជា-ថៃ ឲ្យដឹងថា តុលាការខេត្តស្រះកែវ ប្រទេសថៃ បើកសវនាការជំនុំជម្រះក្តីលើករណីពលករខ្មែរ ១៤នាក់ ដែលរាជរដ្ឋាភិបាលកម្ពុជា ស្នើសុំឲ្យដោះលែងយ៉ាងប្រញាប់នៅថ្ងៃទី៣ កក្កដា។
សវនាការនេះបានបញ្ចប់រួចហើយ ដោយតុលាការរកឃើញថា ពួកគេទាំង ១៤នាក់នោះ ពិតជាបានប្រើប្រាស់នូវឯកសារឆ្លងដែនក្លែងក្លាយ។ ប៉ុន្តែតុលាការថៃ លើកលែងការចោទប្រកាន់ទៅលើពួកគេ ដោយយល់ឃើញថា ពលករខ្មែរទាំងនោះចាញ់បោកមេខ្យល់ និងបានសម្រេចដោះលែងពួកគេឲ្យត្រឡប់មកកម្ពុជាវិញ។
នាយការិយាល័យទំនាក់ទំនងការងារព្រំដែនកម្ពុជា-ថៃ លោក ពេជ្រ វណ្ណា ឲ្យដឹងថា ពលករខ្មែរ ១៤នាក់ ត្រូវបានដោះលែងភ្លាមៗ បន្ទាប់ពីសវនាការបញ្ចប់ និងត្រូវភាគីថៃ បញ្ជូនត្រឡប់មកកម្ពុជាវិញ នៅថ្ងៃសុក្រ ទី៤ កក្កដា តាមច្រកទ្វារអន្តរជាតិប៉ោយប៉ែត។ ប៉ុន្តែនៅមិនទាន់ដឹងម៉ោងពេលច្បាស់លាស់នៅឡើយ។
លោក ពេជ្រ វណ្ណា៖ «ពលករ ១៤នាក់ ដែលថៃចាប់ថ្ងៃមុនចោទប្រកាន់ថា ធ្វើលិខិតឆ្លងដែនក្លែងក្លាយហ្នឹង គឺគេ (តុលាការថៃ) បានកាត់ក្តីហើយ គេរកកំហុសទៅពួកគាត់មិនដឹងដែរ ដោយសារមេខ្យល់នាំ តែឥឡូវគេកាត់ក្តី ហើយគេដោះលែងឲ្យមកខ្មែរវិញនៅថ្ងៃស្អែក»។
សវនាការដោះលែងពលករខ្មែរ ១៤នាក់នេះ ធ្វើឡើងរយៈពេល ២ថ្ងៃ បន្ទាប់ពីរាជរដ្ឋាភិបាលបានស្នើសុំឲ្យព្រះមហាក្សត្រប្រទានការលើកលែងទោសដល់សកម្មជនអាវលឿងថៃ លោក វីរៈ ស៊ុំក្វាមឃីត (Veera Somkwamkid) កាលពីថ្ងៃទី១ កក្កដា។
មន្ត្រីនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បញ្ជាក់ថា ការដោះលែងលោក វីរៈ ស៊ុំក្វាមឃីត មិនជាប់ពាក់ព័ន្ធបញ្ហានយោបាយ ហើយមិនមែនជាការដោះដូរពលករខ្មែរ ១៤នាក់ ដែលត្រូវអាជ្ញាធរថៃ ចាប់ខ្លួនកាលពីខែមិថុនា នោះទេ។
យ៉ាងណាការដោះលែងសកម្មជនអាវលឿងថៃ រូបនេះ គឺហាក់ធ្វើឡើងភ្លាមៗក្រោយពីរដ្ឋមន្ត្រីស្ដីទីក្រសួងការបរទេសថៃ លោក សីហាសាក់ ភួងកេតកែវ (Sihasak Phuangketkeow) បានស្នើសុំឲ្យលោកនាយករដ្ឋមន្ត្រី ហ៊ុន សែន ដោះលែងលោក វីរៈ ស៊ុំក្វាមឃីត។ ទន្ទឹមគ្នានោះ ភាគីកម្ពុជា ក៏បានស្នើសុំបកទៅវិញ ឲ្យភាគីថៃ ដោះលែងពលករខ្មែរ ១៤នាក់ ដែលអាជ្ញាធរចាប់ខ្លួននៅពេលដែលពួកគេកាន់លិខិតឆ្លងដែនខុសច្បាប់ ហើយជាលទ្ធផលភាគីថៃ ក៏បានបើកសវនាការលើករណីពួកគេភា្លមៗ ដោយមិនបាច់ចំណាយពេលស៊ើបអង្កេតច្រើន រួចក៏សម្រេចដោះលែងពួកគេតាមសំណើ។
ដោយមានមន្ទិលសង្ស័យពីព័ត៌មានដោះដូរអ្នកទោសរវាងភាគីកម្ពុជានិងថៃនេះ លោកនាយករដ្ឋមន្ត្រី ហ៊ុន សែន បញ្ជាក់ថា គ្មានការដោះដូរវាងលោក វីរៈ ស៊ុំក្វាមឃីត ជាមួយពលករខ្មែរទេ។ ការលើកឡើងរបស់នាយករដ្ឋមន្ត្រីនេះ ធ្វើឡើងក្នុងពិធីប្រកាសជាផ្លូវការដាក់ឲ្យអនុវត្តផែនការយុទ្ធសាស្ត្រជាតិ ស្តីពីពិការភាព២០១៤-២០១៨ នៅសាលមហោស្រពកោះពេជ្រ នៅថ្ងៃទី៣ កក្កដា។
លោក ហ៊ុន សែន៖ «ឥឡូវមានទូរទស្សន៍ វិទ្យុ ផ្សាយ ដោះលែង វីរៈ (វីរៈ ស៊ុំក្វាមឃីត) ទៅនេះជាការដោះដូរ។ អត់មានការដោះដូរទេ ខាងថៃ ក៏គាត់និយាយត្រឹមត្រូវ។ អាហ្នឹងគ្មានការដោះដូរទេ។ ឯបញ្ហាដែលខ្ញុំស្នើសុំ ឲ្យ ឬមិនឲ្យ ជាសិទ្ធិរបស់ថៃតើ! ឯខាងនេះ ឲ្យទៅអត់មានលក្ខខណ្ឌអីទាំងអស់ ទៅដល់បាងកកហើយ។ អ៊ីចេះ! ខាងផ្នែកសារព័ត៌មានរបស់យើង ពេលខ្លះធ្វើឲ្យមានការរំខានទៅវិញ។ មិនត្រឹមតែមិនបានក្លាយជាការពិត អារឿងហ្នឹងវាទៅជាយើងដោះដូរ។ បញ្ជូនទៅម្នាក់ឲ្យដោះដូរប៉ុន្មាននាក់មកវិញ? អត់ទេ! អត់មានការដោះដូរអីទេ»។
ទោះជាមានការអះអាងបែបនេះក្តី ក៏អ្នកវិភាគស្ថានភាពនយោបាយ ចាត់ទុកការលើកលែងទោសសកម្មជនអាវលឿងថៃនេះ ថាជារបត់នយោបាយរបស់រដ្ឋាភិបាលកម្ពុជា ក្នុងការទាក់ទងជាមួយរដ្ឋាភិបាលយោធាថៃ នៅក្រោយពេលដែលពលករខ្មែរជាង ២សែននាក់ត្រូវបញ្ជូនមកវិញ។
អ្នកវិភាគគិតថា រាជរដ្ឋាភិបាលកម្ពុជា កំពុងតែបង្ហាញភាពទន់ភ្លន់ជាមួយរាជរដ្ឋាភិបាលថៃ គ្រប់គ្រងដោយយោធា ដែលមានក្រុមអាវលឿងគាំទ្រ និងអាចជាការសម្របសម្រួលមួយ ធ្វើយ៉ាងណាអាចឲ្យពលករខ្មែរដែលអត់ការងារធ្វើទាំងនោះអាចត្រឡប់ទៅធ្វើការនៅប្រទេសថៃ វិញបាន។
ទាក់ទិននឹងការដោះលែងសកម្មជនអាវលឿងថៃ លោក វីរៈ ស៊ុំក្វាមឃីត នេះដែរ ក្រសួងការពារជាតិកម្ពុជា ចេញសេចក្ដីប្រកាសព័ត៌មានមួយ នៅថ្ងៃទី៣ កក្កដា ដោយបដិសេធនូវការចុះផ្សាយព័ត៌មានរបស់កាសែតថៃ ឌឹ ណេហ្សិន (The Nation) ដែលដកស្រង់ខុសនូវប្រសាសន៍លោក ទៀ បាញ់ រដ្ឋមន្ត្រីក្រសួងការពារជាតិថា ការដោះលែងលោក វីរៈ ស៊ុំក្វាមឃីត ចេញពីពន្ធនាគារកម្ពុជា គឺតាមរយៈការទាក់ទងតាមទូរស័ព្ទរវាងលោក ប្រាយុទ្ធ ចាន់អួចា (Prayuth Chan-Ocha) ជាមួយលោកនាយករដ្ឋមន្ត្រី ហ៊ុន សែន។ ក្រសួងការពារជាតិកម្ពុជា អះអាងថា ខ្លឹមសារនោះមិនមែនជាការពិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។