មេបញ្ជាការជាន់ខ្ពស់យោធាថៃ លោក ថាណាសាក់ ប៉ាទីម៉ាប្រាឃន (Tanasak Patimapragorn) នឹងមកទស្សនកិច្ចនៅកម្ពុជា រយៈពេលពីរថ្ងៃ គិតចាប់ពីថ្ងៃទី៣០ ដល់ថ្ងៃទី៣១ សីហា ដំណាច់ខែនេះ។
នៅក្នុងដំណើរទស្សនកិច្ចនេះ លោក ថាណាសាក់ ប៉ាទីម៉ាប្រាឃន នឹងជួបជាមួយលោកនាយករដ្ឋមន្ត្រី ហ៊ុន សែន ដែលភាគីទាំងពីរនឹងអាចពិភាក្សាគ្នាអំពីជម្លោះនៅតំបន់ក្បែរប្រាសាទព្រះវិហារ ទៀតផង ក្រៅពីជជែកគ្នាអំពីបញ្ហាសេដ្ឋកិច្ច ពាណិជ្ជកម្ម និងការកសាងផ្លូវគមនាគមន៍ជាដើម នេះបើតាមកាសែតថៃ បាងកក ប៉ុស្តិ៍ (Bangkok Post) ចុះផ្សាយនៅថ្ងៃទី២៦ សីហា។
ទស្សនកិច្ចរបស់ភាគីថៃ នេះ ធ្វើឡើងបន្ទាប់ពីដំណើរទស្សនកិច្ចខាងភាគីកម្ពុជា ដឹកនាំដោយលោកឧបនាយករដ្ឋមន្ត្រី និងជារដ្ឋមន្ត្រីការពារជាតិ ទៀ បាញ់ ទៅប្រទេសថៃ នៅដើមខែសីហា កន្លងទៅនេះ ដែលភាគីកម្ពុជា ចង់លើកអំពីបញ្ហាជម្លោះនៅតំបន់ប្រាសាទព្រះវិហារ ទៅពិភាក្សាដែរ តែភាគីថៃ ឆ្លើយថា ពេលនោះមិនមែនជាពេលវេលាល្អសម្រាប់ជជែកគ្នាអំពីរឿងជម្លោះនៅតំបន់ប្រាសាទព្រះវិហារ នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។