ភាគីថៃគ្រោងនឹងបង្កើតគណៈកម្មាធិការមួយដើម្បីចរចាជាមួយភាគីកម្ពុជាឡើងវិញ ស្ដីអំពីកិច្ចសហប្រតិបត្តិការពាណិជ្ជកម្មក្នុងតំបន់ដែនសមុទ្រត្រួតគ្នានៃប្រទេសទាំងពីរ។
គម្រោងការបង្កើតគណៈកម្មាធិការនេះ ធ្វើឡើងបន្ទាប់ពីទស្សនកិច្ចរបស់លោកមេទ័ពថ្មីរបស់ថៃ គឺលោក តាណាសក្តិ ប៉ាទីម៉ាប្រាកន (Natasak Patimapragorn) នៅកម្ពុជា កាលពីថ្ងៃទី១ កញ្ញា។
កាសែតថៃ ឌឹ ណេសិន (The Nation) ផ្សាយថ្ងៃទី៣ កញ្ញា ដោយស្រង់សម្ដីមន្ត្រីក្រសួងថាមពលថៃ លោក គួរួជិត ណាឃនថេប (Kurujit Nakornthap) ថា ថៃគ្រោងបង្កើតគណៈកម្មាធិការនេះឲ្យបានឆាប់ដែលអាចធ្វើទៅបាន ដើម្បីចរចាជាមួយភាគីកម្ពុជា ក្នុងកិច្ចសហការដើម្បីផលប្រយោជន៍នៃប្រទេសទាំងពីរលើវិស័យអគ្គិសនី និងប្រេងកាតក្នុងតំបន់ត្រួតស៊ីគ្នាលើផ្ទៃសមុទ្រដែលមានទំហំ ២៦.០០០គីឡូម៉ែត្រក្រឡា។
កាសែតថៃ ដដែលបន្តថា ការចរចានេះនឹងអនុលោមទៅតាមអនុស្សរណៈយោគយល់គ្នារវាងភាគីទាំងពីរដែលបានចុះហត្ថលេខាកាលពីឆ្នាំ២០១០៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។