ព័ត៌មានការិយាល័យជាតិនៃប្រទេសថៃ (National News Bureau of Thailand) រាយការណ៍ថា រដ្ឋមន្ត្រីក្រសួងការបរទេសថៃ លោក ស៊ីហាសាក់ ភួងកេតកែវ (Sihasak Phuangketkeow) នឹងមកទស្សនកិច្ចកម្ពុជា ដើម្បីសម្របសម្រួលឯកសារមួយចំនួនជាមួយភាគីកម្ពុជា ក្នុងការបញ្ជូនពលករខ្មែរទៅធ្វើការនៅថៃ។
សារព័ត៌មានមិនបានបញ្ជាក់កាលបរិច្ឆេទទេ ប៉ុន្តែមន្ត្រីក្រសួងការបរទេសខ្មែរ បង្ហើបឲ្យដឹងថា លោក ស៊ីហាសាក់ ភួងកេតកែវ មកទស្សនកិច្ច នៅថ្ងៃទី១ កក្កដានេះ។
ដំណើរទស្សនកិច្ចនេះ ធ្វើឡើងស្របពេលដែលពលករខ្មែរជាង ២សែននាក់ ក្នុងនោះភាគច្រើនលើសលុប ត្រូវអាជ្ញាធរថាចាប់បញ្ជូនមកកម្ពុជាវិញ ក្នុងអំឡុងខែមិថុនា ដោយអមនុស្សធ៌ម។
បើតាមសារព័ត៌មានដដែល ដំណើរទស្សនកិច្ចរដ្ឋមន្ត្រីក្រសួងការបរទេសថៃលើកនេះ នឹងជួបភាគីកម្ពុជាលោករដ្ឋមន្ត្រីការបរទេសខ្មែរ លោក ហោ ណាំហុង និងលោកនាយករដ្ឋមន្ត្រី ហ៊ុន សែន ដើម្បីពិភាក្សាអំពីការសម្រួលឯកសារនានា ក្នុងការបញ្ជូនពលករខ្មែរត្រឡប់ទៅធ្វើការនៅថៃវិញ ដោយស្របច្បាប់។
វិទ្យុអាស៊ីសេរីមិនអាចទាក់ទង មន្ត្រីនាំពាក្យក្រសួងការបរទេសខ្មែរ លោក កុយ គួង បានភ្លាមៗនៅល្ងាចថ្ងៃទី៣០ មិថុនា ដើម្បីសុំការបញ្ជាក់បន្ថែម ដោយលោកថាជាប់រវល់។
ស្របពេលនេះដែរ នៅប្រទេសថៃឯនោះវិញ អាជ្ញាធរថៃបានជួយសម្រួល និងផ្ដល់ឯកសារការងារដល់ពលករបរទេសខុសច្បាប់ជាបណ្ដើរៗហើយដែរ។
កាសែតថៃ បាងកកប៉ុស្តិ៍ ចុះផ្សាយនៅថ្ងៃទី៣០ មិថុនា ថា អាជ្ញាធរថៃនៅខេត្ត សមុទ្រសាខន (Samut Sakhon) បានសម្រួលការងារចុះបញ្ជីដល់ពលករខុសច្បាប់បរទេស មានដូចជាពលករខ្មែរ ឡាវ និងភូមា ឬ មីយ៉ាន់ម៉ា ក្នុងមួយថ្ងៃៗរាប់ពាន់នាក់ ឲ្យក្លាយជាពលករស្របច្បាប់ ដើម្បីធ្វើការនៅទីនោះបន្តទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។