ក្រសួងការបរទេសវៀតណាម ស្នើជាថ្មីទៀតឲ្យរដ្ឋាភិបាលកម្ពុជា ចាត់វិធានការបញ្ឈប់សកម្មភាពខុសឆ្គងរបស់បាតុករខ្មែរ។ ការស្នើនេះ ធ្វើឡើងក្នុងពេលដែលអង្គការសមាគមខ្មែរកម្ពុជាក្រោម និងពលរដ្ឋខ្មែរ គ្រោងធ្វើបាតុកម្មប្រឆាំងការបំភ្លៃប្រវត្តិសាស្ត្ររបស់មន្ត្រីស្ថានទូតវៀតណាម នៅដើមខែតុលា ខាងមុខ ប្រសិនបើរដ្ឋាភិបាលវៀតណាម មិនឆ្លើយតបផ្លូវការតាមការទាមទាររបស់ពួកគេ។
ក្រសួងការបរទេសកម្ពុជា នៅពុំទាន់បញ្ជាក់ថាយ៉ាងណា ចំពោះសំណើរបស់ក្រសួងការបរទេសវៀតណាម គឺគ្រាន់តែអះអាងថា កម្ពុជា មានតួនាទីធានាសុវត្ថិភាពដល់គ្រប់ស្ថានទូតទាំងអស់នៅកម្ពុជា។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍នៅថ្ងៃទី១៣ កញ្ញា ថា ក្នុងនាមជាម្ចាស់ផ្ទះ កម្ពុជា មានភារកិច្ចការពារសុវត្ថិភាពដល់គ្រប់ស្ថានទូតបរទេសទាំងអស់ដែលប្រចាំនៅកម្ពុជា មិនថាស្ថានទូតនោះជារបស់ប្រទេសណាមួយឡើយ។ លោក កុយ គួង អះអាងបន្តថា ចំណែកសិទ្ធិធ្វើបាតុកម្មដោយសន្តិវិធី គឺត្រូវបានធានាដោយរដ្ឋធម្មនុញ្ញកម្ពុជា។
លោក កុយ គួង៖ «រាល់ការធ្វើបាតុកម្មផ្សេងៗហ្នឹង គឺយើងមិនអនុញ្ញាតដល់បាតុកម្មណាដែលប្រព្រឹត្តទៅដោយខុសច្បាប់ ឬឯបាតុកម្មប្រព្រឹត្តទៅក្នុងក្របខ័ណ្ឌច្បាប់ អាហ្នឹងវាមិនជាបញ្ហាទេ ឲ្យតែស្ថិតក្នុងក្របខ័ណ្ឌច្បាប់ ព្រោះសិទ្ធិធ្វើបាតុកម្មយើងដឹងហើយ ថាមានចែងក្នុងរដ្ឋធម្មនុញ្ញណា ហើយយើងមានច្បាប់ធ្វើបាតុកម្មទៀត ច្បាប់បាតុកម្មសំដៅទៅលើបាតុកម្មដោយសន្តិវិធី ដូច្នេះយើងមិនអនុញ្ញាតដល់បាតុកម្មណាដែលខុសច្បាប់ ហើយបាតុកម្មខុសច្បាប់ ភាគច្រើនយើងសំដៅលើបាតុកម្មណាដែលបង្កឲ្យមានអំពើហិង្សានោះ គឺរដ្ឋាភិបាលមិនអនុញ្ញាតជាដាច់ខាត»។
បណ្ដាញសារព័ត៌មានចិន ស៊ិនហួ (Xinhua) បានផ្សាយដោយស្រង់សម្ដីរបស់អ្នកនាំពាក្យក្រសួងការបរទេសវៀតណាម លោក ឡេ ហាយ បិញ (Le Hai Binh) ដែលបានថ្លែងនៅទីក្រុងហាណូយ កាលពីថ្ងៃទី១១ ខែកញ្ញា ថា វៀតណាម ស្នើឲ្យរដ្ឋាភិបាលកម្ពុជា ចាត់វិធានការមានប្រសិទ្ធភាព ដើម្បីបញ្ឈប់សកម្មភាពខុសឆ្គងរបស់បាតុករខ្មែរប្រឆាំងវៀតណាម។ លោក ឡេ ហាយ បិញ ថ្លែងបន្តថា សកម្មភាពខុសឆ្គងរបស់បាតុករនេះ មិនស្របទៅនឹងមិត្តភាពជាប្រពៃណី និងទំនាក់ទំនងល្អប្រសើររវាងប្រទេសកម្ពុជា និងវៀតណាម ឡើយ។
ការថ្លែងរបស់អ្នកនាំពាក្យក្រសួងការបរទេសវៀតណាម នៅថ្ងៃទី១១ កញ្ញា នោះ គឺចំថ្ងៃដែលអនុរដ្ឋមន្ត្រីក្រសួងការបរទេសវៀតណាម លោក ហ្វាម ក្វាង វិញ (Pham Quang Vinh) ធ្វើទស្សនកិច្ចនៅកម្ពុជា និងបានជួបជាមួយរដ្ឋមន្ត្រីក្រសួងការបរទេសកម្ពុជា លោក ហោ ណាំហុង។ លោក កុយ គួង បានអះអាងថា នៅក្នុងជំនួបនោះ លោក ហ្វាម ក្វាង វិញ សន្យាថា ស្ថានទូតវៀតណាម នឹងធ្វើកំណត់ទូតទៅក្រសួងការបរទេសកម្ពុជា ដើម្បីដកមន្ត្រីនាំពាក្យស្ថានទូតវៀតណាម ប្រចាំកម្ពុជា លោក ត្រឹង វ៉ាំង ថុង ទៅវៀតណាម វិញ។
យ៉ាងណាក៏ដោយ បណ្ដាញសារព័ត៌មានវៀតណាម ឈ្មោះ វៀតណាមផ្លាស (Vietnamplus) បានផ្សាយថា ទាក់ទងនឹងការធ្វើបាតុកម្មរបស់ពលរដ្ឋខ្មែរនៅមុខស្ថានទូតវៀតណាម នាពេលកន្លងមក លោក ហ្វាម ក្វាង វិញ បានស្នើឲ្យរដ្ឋាភិបាលកម្ពុជា ចាត់វិធានការចាំបាច់គ្រប់បែបយ៉ាង ដើម្បីរារាំងកុំឲ្យសកម្មភាពដដែលនោះកើតឡើងជាថ្មីទៀត។
នេះជាលើកទី៣ហើយដែលក្រសួងការបរទេសវៀតណាម ស្នើឲ្យកម្ពុជា ចាត់វិធានការចំពោះបាតុករខ្មែរ។ ការលើកឡើងរបស់វៀតណាម ជាបន្តបន្ទាប់នេះ ត្រូវបានអង្គការសមាគមខ្មែរកម្ពុជាក្រោម ចាត់ទុកថា រដ្ឋាភិបាលកុម្មុយនីស្តវៀតណាម កំពុងជ្រៀតជ្រែកចូលកិច្ចការផ្ទៃក្នុងរបស់កម្ពុជា។
សាស្ត្រាចារ្យផ្នែកវិទ្យាសាស្ត្រនយោបាយ លោកបណ្ឌិត រស់ រ៉ាវុធ មានប្រសាសន៍ថា ការស្នើសុំរបស់រដ្ឋាភិបាលវៀតណាម គឺជាសិទ្ធិរបស់ពួកគេ ប៉ុន្តែលោកថា វៀតណាម គួរបញ្ឈប់តាំងខ្លួនឯងជាបងធំរបស់ខ្មែរទៀតទៅ។ លោកមានប្រសាសន៍បន្តថា រដ្ឋធម្មនុញ្ញកម្ពុជា ការពារសិទ្ធិធ្វើបាតុកម្មអហិង្សារបស់ពលរដ្ឋខ្មែរ ហើយថា ប្រសិនបើរដ្ឋាភិបាលកម្ពុជា ធ្វើតាមរដ្ឋាភិបាលវៀតណាម មែននោះ នោះបង្ហាញថា រដ្ឋាភិបាលកម្ពុជា នៅតែទទួលឥទ្ធិពលពីប្រទេសវៀតណាម ដូចការចោទប្រកាន់ដដែល។
លោកបណ្ឌិត រស់ រ៉ាវុធ៖ «ក្នុងករណីការធ្វើបាតុកម្មរបស់ខ្មែរក្រោមហ្នឹង គឺជាសិទ្ធិរបស់ខ្មែរក្រោម ប៉ុន្តែការស្នើនេះប្រសិនណាប្រទេសកម្ពុជា ចាត់វិធានការណាមួយចំពោះបាតុកម្មរបស់ខ្មែរក្រោមអហិង្សានោះ វាផ្ទុយពីរដ្ឋធម្មនុញ្ញនៃព្រះរាជាណាចក្រកម្ពុជា។ អ៊ីចឹងគេអាចចោទរដ្ឋាភិបាលកម្ពុជា ថា នៅចំណុះវៀតណាម ដដែល អ៊ីចឹងការស្នើរបស់វៀតណាម គឺជាសំណើផ្លូវទូតមួយ ប៉ុន្តែការចាត់វិធានការណាមួយរបស់រដ្ឋាភិបាលកម្ពុជា នោះ អាហ្នឹងជាសិទ្ធិរបស់រដ្ឋាភិបាលកម្ពុជា»។
លោកបណ្ឌិត រស់ រ៉ាវុធ មានប្រសាសន៍ថា ជម្លោះប្រវត្តិសាស្ត្រនេះ គឺជាជម្លោះផ្លូវទូតរវាងកម្ពុជា និងវៀតណាម។ លោកថា នៅពេលដែលវៀតណាម សន្យាដកមន្ត្រីនាំពាក្យរបស់គេទៅវិញនោះ នោះបាតុករក៏គួរថយមួយជំហានដែរ ដើម្បីពិចារណាដែរ។
ទោះយ៉ាងណាក៏ដោយ ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា ធ្លាប់បានអះអាងហើយថា បើទោះជារដ្ឋាភិបាលវៀតណាម ដក លោក ត្រឹង វ៉ាំង ថុង ត្រឡប់ទៅវៀតណាម វិញក៏ដោយ វៀតណាម ត្រូវបញ្ជាក់ឲ្យច្បាស់ថា តើការដកនោះដោយសារតែ លោក ត្រឹង វ៉ាំង ថុង ត្រូវផុតអាណត្តិត្រឡប់ទៅវិញ ឬក៏ដោយសារតែការថ្លែងខុសឆ្គងអំពីប្រវត្តិសាស្ត្រទឹកដីកម្ពុជាក្រោម។ លោកថា ប្រសិនបើរដ្ឋាភិបាលវៀតណាម យល់ថា លោក ត្រឹង វ៉ាំង ថុង ពិតជាមានកំហុសមែននោះ វៀតណាម ត្រូវតែសុំទោសពលរដ្ឋខ្មែរជាសាធារណៈ ឬត្រូវទទួលស្គាល់ការបំភ្លៃប្រវត្តិសាស្ត្ររបស់ខ្លួន។ បើមិនដូច្នោះទេ ពួកគេនឹងនាំគ្នាធ្វើបាតុកម្មនៅមុខស្ថានទូតវៀតណាម នៅដើមខែតុលា បន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។