ក្រុមយុវជនប្រមាណ ២០នាក់ ជិះឡានពីរគ្រឿង នាំគ្នាយកញត្តិទៅដាក់ និងស្រែកទាមទារនៅមុខទីស្នាក់ការគណបក្សសង្គ្រោះជាតិ នៅសង្កាត់ចាក់អង្រែលើ ក្រុងភ្នំពេញ ដើម្បីឲ្យលោក កឹម សុខា បកស្រាយការពិត។
គោលបំណងធំដែលក្រុមយុវជនទៅដាក់ញត្តិនៅគណបក្សសង្គ្រោះជាតិ នៅថ្ងៃទី១ ខែមេសា នេះ ដើម្បីឲ្យគណបក្សសង្គ្រោះជាតិ បកស្រាយរឿងបណ្ដឹងដែលគណបក្សគ្រោងប្ដឹងក្រុមពួកគេរឿងប្រើទង់របស់បក្ស និងអាវរូបសញ្ញាគណបក្សសង្គ្រោះជាតិ ប៉ុន្តែមិនបានដូចបំណងឡើយ ខណៈការទាមទារនោះ មានប៉ះទង្គិចពាក្យសម្ដី និងរុញច្រានគ្នាទៅវិញទៅមកជាមួយមនុស្សមួយក្រុមទៀត ដែលមាននិន្នាការគាំទ្រគណបក្សសង្គ្រោះជាតិ។ ទោះយ៉ាងណាក៏ដោយ គ្មានមន្ត្រីគណបក្សនេះចេញមកទទួលញត្តិដែរ ហើយក៏គ្មានករណីហិង្សាកើតឡើងនោះទេ។
តំណាងយុវជនម្នាក់ លោក ហួម ចំប៉ា ឲ្យវិទ្យុអាស៊ីសេរី ដឹងថា អ្វីដែលលោកចង់បានគឺការបញ្ជាក់ការពិតពីលោក កឹម សុខា ផ្ទាល់។ លោកថា អ្វីដែលលោកធ្វើនៅពេលនេះ គឺចង់ឲ្យលោក កឹម សុខា ស្អាតស្អំ៖ «យើងចង់ឲ្យបុគ្គលហ្នឹងស្អាតស្អំ យើងស្រលាញ់ពេក អ៊ីចឹងអាចនឹងឈឺចាប់ទៅថ្ងៃអនាគត។ អ៊ីចឹងយើងយុវជនមកនេះគឺចង់ឲ្យបុគ្គលម្នាក់ស្អាតស្អំ។ កាលពីមុនក៏ធ្លាប់គាំទ្រ ហែបក្សអីអ៊ីចឹងដែរ អ៊ីចឹងពេលនេះគាត់អាចខូចចិត្ត បើសិនបុគ្គលហ្នឹងមានស្រី...»។
ក្រុមយុវជនដឹកនាំដោយលោកស្រី ចំរើន ដែលអះអាងថា ខ្លួនជានិស្សិតមកពីសាកលវិទ្យាល័យនានា ក្នុងរាជធានីភ្នំពេញនោះ អ្នកខ្លះពាក់អាវយឺតរូបសញ្ញាគណបក្សសង្គ្រោះជាតិ លើកឡើងថា គណបក្សសង្គ្រោះជាតិ មិនមែនជារបស់លោក កឹម សុខា តែម្នាក់នោះទេ ដូច្នេះពួកគេមានសិទ្ធិពាក់អាវនេះ។
នៅពេលក្រុមយុវជនតវ៉ាទាមទារនោះ មានក្រុមនគរបាលជួយសម្រួលចរាចរណ៍ និងមិនបានហាមឃាត់ពួកគេឡើយ ដែលខុសពីការទាមទាររកយុត្តិធម៌របស់ក្រុមពលរដ្ឋមានបញ្ហាដីធ្លី ដែលសមត្ថកិច្ចតែងតែធ្វើការបង្ក្រាបនៅពេលមានទាមទារអ្វីមួយនោះ។
ក្រោយពេលដែលក្រុមយុវជន ស្រី ចំរើន បានចំណាយពេលជិតមួយម៉ោងតវ៉ាទាមទារនៅទីស្នាក់ការគណបក្សសង្គ្រោះជាតិ ហើយបង្កឲ្យមានការកកស្ទះចរាចរណ៍នោះ ក្រុមប៉ូលិសប្រាប់ឲ្យពួកគេឡើងឡានត្រឡប់ទៅផ្ទះរៀងៗខ្លួនវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។