ការបួងសួងសុំសេចក្ដីសុខសន្តិភាព យុត្តិធម៌ បានធ្វើឡើងនៅលើវេទិកាធ្វើបាតុកម្មអហិង្សា នៅទីលានប្រជាធិបតេយ្យ ដែលធ្វើឡើងដោយគណបក្សសង្គ្រោះជាតិ នៅព្រឹកថ្ងៃទី៧ កញ្ញា ឆ្នាំ២០១៣។
តំណាងសាសនាទាំងបី មានសាសនាព្រះពុទ្ធ ឥស្លាម និងតំណាងសាសនាគ្រិស្ដ បានបួងសួងដូចគ្នា សុំឲ្យមេដឹកនាំខ្មែរកុំឲ្យបែកបាក់គ្នា និងសុំឲ្យរកយុត្តិធម៌ជូនប្រជាពលរដ្ឋដែលជាម្ចាស់ឆ្នោត ទៅលើលទ្ធផលបោះឆ្នោតកាលពីថ្ងៃទី២៨ កក្កដា ឆ្នាំ២០១៣ កន្លងទៅនេះ។
តំណាងសាសនាគ្រិស្ដ បានថ្លែងទៅកាន់ក្រុមបាតុករថា ការរួបរួមគ្នាដើម្បីទាមទារយុត្តិធម៌ និងសន្តិភាព គឺជាបំណងរបស់ព្រះ។ លោកបញ្ជាក់ថា ការរួបរួមគ្នាងើបឈរឡើង គឺកើតចេញពីអំពើអយុត្តិធម៌ ដែលប្រជាពលរដ្ឋគ្រប់រូបមិនអាចទប់នឹងការឈឺចាប់បាន។
តំណាងសាសនាគ្រិស្ដរូបនេះ បន្ថែមថា ការដោះស្រាយវិបត្តិនយោបាយនៅកម្ពុជា ក្នុងពេលនេះ គឺសំខាន់ណាស់ គណៈកម្មាធិការជាតិរៀបចំការបោះឆ្នោត (គ.ជ.ប) និងរដ្ឋាភិបាលយល់ព្រមបង្កើតគណៈកម្មការឯករាជ្យមួយ ដើម្បីត្រួតពិនិត្យលទ្ធផលបោះឆ្នោត គឺជាការបញ្ចប់បញ្ហា ពីព្រោះថា មនុស្សរស់នៅលើលោកគ្រប់រូប អ្វីដែលចង់បាន និងចង់ដឹងនោះ គឺការពិត និងយុត្តិធម៌។
បន្ថែមពីលើសនេះទៀត ពាក្យថាយុត្តិធម៌ និងសំឡេងឆ្នោតខ្ញុំនៅឯណា ក្រុមបាតុករបានស្រែកព្រមៗគ្នា ពាក្យទាំងនេះមានទាំងសរសេរជាបដាទៀតផង។ ក្រុមអ្នកចូលរួមធ្វើបាតុកម្មអហិង្សាទាំងអស់ ឲ្យដឹងថា អ្វីដែលពួកគាត់ចង់បាន គឺសិទ្ធិសេរីភាពពេញលេញក្នុងការចូលរួមធ្វើបាតុកម្មអហិង្សា ដោយគ្មានការរារាំង និងការទប់ស្កាត់ និងគ្មានផ្ទុះអំពើហិង្សាអ្វីកើតឡើងនៅពេលធ្វើបាតុកម្ម។ ក្រុមបាតុករទាំងនោះបានលើកឡើងថា ការបង្កើតគណៈកម្មការឯករាជ្យ ជារឿងសំខាន់មួយដើម្បីឲ្យប្រជាពលរដ្ឋទទួលបានយុត្តិធម៌ក្នុងការបោះឆ្នោតជាតិដ៏សំខាន់នេះ។
នៅលើវេទិកានោះ ប្រធានគណបក្សសង្គ្រោះជាតិ លោក សម រង្ស៊ី បានប្រកាសថា ការធ្វើបាតុកម្មនៅថ្ងៃទី៧ កញ្ញា នេះ គឺកម្ពុជា បានបើកទំព័រប្រវត្តិសាស្ត្រមួយថ្មីសម្រាប់សង្គមកម្ពុជា ការធ្វើបាតុកម្មអហិង្សាដែលគណបក្សប្រឆាំងទាមទារចង់បានអស់រយៈពេលជាច្រើនឆ្នាំមកហើយ ដែលគណបក្សប្រឆាំងខំកសាងប្រជាពលរដ្ឋនោះ គឺវប្បធម៌អហិង្សា។
ដោយឡែក អនុប្រធានគណបក្សសង្គ្រោះជាតិ វិញ លោក កឹម សុខា បានលើកឡើងថា អ្នកកាន់សាសនាទាំងអស់នៅថ្ងៃទី៧ កញ្ញា នេះ មិនថាអ្នកកាន់សាសនាព្រះពុទ្ធ សាសនាគ្រិស្ដ និងអ្នកកាន់សាសនាឥស្លាម នោះទេ ការមកចូលរួមធ្វើបាតុកម្មនេះ គឺទាមទារនូវយុត្តិធម៌ពិត មិនមែនយុត្តិធម៌ក្លែងក្លាយនោះទេ។
ម្យ៉ាងវិញទៀត តំណាងអ្នកកាន់សាសនាឥស្លាម វិញ បានពន្យល់ថា ការកសាងអំពើល្អ វប្បធម៌អហិង្សា និងយុត្តិធម៌នោះ គឺជាកាតព្វកិច្ចរបស់អ្នកកាន់សាសនាឥស្លាម ទាំងឡាយ ត្រូវតែបំពេញ។ លើសពីនេះទៀត ព្រះអល់ឡោះមានយុត្តិធម៌សម្រាប់មនុស្សគ្រប់រូប ផ្ទុយទៅវិញ មនុស្សលោកទេដែលបង្កឲ្យមានអំពើអយុត្តិធម៌នៅក្នុងសង្គមនោះ។ លោកបញ្ជាក់ថា ការចូលរួមធ្វើបាតុកម្មអហិង្សានេះ គឺមិនប្រកាន់ពូជសាសន៍ និន្នាការសាសនា ជាការឆ្លុះបញ្ចាំងថា ប្រជាពលរដ្ឋទាំងអស់រួបរួមគ្នាដើម្បីទាមទារយុត្តិធម៌ ពិសេសគឺយុត្តិធម៌លើលទ្ធផលបោះឆ្នោត។
បន្ថែមពីលើនេះទៀត ក្រុមបាតុករបានលើកឡើងថា ការរីកចម្រើនផ្នែកសាសនាទៅបាននោះ លុះត្រាណាជាតិមានការរីកចម្រើន និងរុងរឿងដែរ ទើបសាសនាមានការរីកចម្រើនទៅបាន។ ហើយការទាមទាររបស់ពួកគាត់នៅពេលនេះ ដើម្បីឲ្យជាតិមានការរីកចម្រើន តាមរយៈយុត្តិធម៌សង្គម និងយុត្តិធម៌ក្នុងការបោះឆ្នោតជាដើម។
អ្នកចូលរួមធ្វើបាតុកម្មបានលើកឡើងប្រហាក់ប្រហែលគ្នាថា ថ្ងៃទី៧ កញ្ញា នេះ ជាថ្ងៃប្រវត្តិសាស្ត្រសម្រាប់សង្គមកម្ពុជា ពីព្រោះថា ប្រទេសកម្ពុជា ជាសង្គមប្រជាធិបតេយ្យ ដូច្នេះអ្នកកាន់សាសនាផ្សេងគ្នាទាំងអស់មានសិទ្ធិស្មើគ្នាក្នុងការបញ្ចេញមតិ។
ការធ្វើបាតុកម្មអហិង្សានេះ មានព្រះសង្ឃជាច្រើនរយអង្គនិមន្តមកពីវត្តមួយចំនួនក្នុងរាជធានីភ្នំពេញ និងនិមន្តមកពីតាមបណ្ដាខេត្តមកចូលរួម ដើម្បីទាមទារសិទ្ធិសេរីភាព និងទាមទារយុត្តិធម៌នៃលទ្ធផលបោះឆ្នោតនេះ។
ព្រះសង្ឃសុំមិនបញ្ចេញព្រះនាម និមន្តមកពីខេត្តកណ្ដាល មានព្រះថេរដីកាថា តំណាងការចូលរួមធ្វើបាតុកម្មអហិង្សាដែលមានអ្នកកាន់សាសនាផ្សេងៗនេះ ជាការឆ្លុះបញ្ចាំងអំពីការសាមគ្គីគ្នា ដើម្បីទាមទារសន្តិភាព និងយុត្តិធម៌។ ព្រះតេជព្រះគុណ សង្កត់ធ្ងន់ថា ពាក្យថាសាសនាជាការទូន្មានឲ្យមនុស្សទាំងឡាយប្រព្រឹត្តអំពើល្អ។
ប្រធានផ្នែកកម្មវិធីការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា មានប្រសាសន៍ថា ការចូលរួមរបស់តំណាងអ្នកកាន់សាសនាទាំងនេះ ជាការសឲ្យឃើញថា គ្រប់អ្នកកាន់សាសនាទាំងអស់ចង់បានសន្តិភាព និងយុត្តិធម៌។ លោកបញ្ជាក់ថា បញ្ហានេះជាសារដ៏ល្អមួយសម្រាប់ឲ្យរដ្ឋាភិបាលពិចារណាទៅលើករណីទាំងនេះ។
តំណាងអ្នកកាន់សាសនាទាំងនេះ បានពន្យល់ថា ការផ្ទុះធ្វើបាតុកម្មនានានោះ កើតចេញពីអំពើអយុត្តិធម៌នៅក្នុងសង្គម។ ហើយអំពើអយុត្តិធម៌នោះ មនុស្សជាអ្នកប្រព្រឹត្តិឡើង ប៉ុន្តែអ្នកប្រព្រឹត្តិអំពើអយុត្តិធម៌នោះ បើមិនកែប្រែខ្លួនទេ ឬក៏ផ្ដល់ភាពយុត្តិធម៌វិញទេ នឹងទទួលទោសពីព្រះ និងទទួលទោសពីច្បាប់រដ្ឋទៅតាមទម្ងន់ទោសដែលគេបានប្រព្រឹត្ត ដែលមានចែងនៅក្នុងច្បាប់នៃប្រទេសនីមួយៗ និងអាស្រ័យទៅលើកំហុសដែលបុគ្គលនោះបានសាង។ ម្យ៉ាងទៀត ភាពយុត្តិធម៌ជាមូលដ្ឋានគ្រឹះនៃអហិង្សា និងសន្តិភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។