ការព្រមព្រៀងគ្នារបស់គណៈកម្មការចម្រុះនៃគណបក្សទាំងពីរចំនួន ១៤ចំណុច កាលពីថ្ងៃទី១៧ មីនា នោះ ត្រូវបានអ្នកវិភាគ និងអ្នកឃ្លាំមើលការបោះឆ្នោតបានលើកឡើងថា ជាជំហានដែលគណបក្សទាំងពីរស្វែងរកដំណោះស្រាយរួមមួយនៅពេលខាងមុខ។ ក៏ប៉ុន្តែ កិច្ចព្រមព្រៀងទាំងនេះ មិនឆ្លុះបញ្ចាំងអំពីឆន្ទៈពិតប្រាកដក្នុងការបញ្ចប់ជម្លោះនយោបាយជាប់គាំងនេះទេ។
ការពិភាក្សាគ្នារបស់តំណាងគណបក្សទាំងពីរអំពីការកែទម្រង់ការបោះឆ្នោតនៅពេលខាងមុខនោះ ត្រូវបានគេមើលឃើញថា វាស្ថិតនៅក្នុងភាពស្រពិចស្រពិលនៅឡើយ ដោយសារគណបក្សនយោបាយទាំងពីរមិនបានលើកពីរបៀបវារៈច្បាស់លាស់ ដើម្បីដោះស្រាយបញ្ចប់ជម្លោះនយោបាយ។
ក្រុមអ្នកវិភាគបានលើកឡើងថា នៅក្នុងបរិបទនយោបាយបច្ចុប្បន្ននេះ គណបក្សទាំងពីរត្រូវតែយករបៀបវារៈអំពីដំណោះស្រាយនយោបាយ និងមានជំនួបថ្នាក់កំពូលវិញប្រសើរជាង ដើម្បីបង្ហាញប្រជាពលរដ្ឋ និងសហគមន៍អន្តរជាតិថា គណបក្សជាប់ឆ្នោតទាំងពីរមានឆន្ទៈចង់បញ្ចប់ជម្លោះនយោបាយពិតប្រាកដ។
ប្រធានគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរីនៅកម្ពុជា លោកបណ្ឌិត ហង្ស ពុទ្ធា មានប្រសាសន៍ថា គណៈកម្មការចម្រុះនៃគណបក្សទាំងពីរបានឯកភាពគ្នាចំនួន ១៤ចំណុចនោះ ជាលទ្ធផលល្អមួយ ដែលថា គណបក្សទាំងពីរចង់កែទម្រង់ការបោះឆ្នោត។ ក៏ប៉ុន្តែ លោកបណ្ឌិត ហង្ស ពុទ្ធា បញ្ជាក់ថា ខ្លឹមសារការចរចារបស់តំណាងគណបក្សជាប់ឆ្នោតទាំងពីរ អត់ត្រូវនឹងបរិបទជាប់គាំងបច្ចុប្បន្ននេះទេ។
«សំឡេង»
គណៈកម្មការចម្រុះរបស់គណបក្សប្រជាជនកម្ពុជា និងគណបក្សសង្គ្រោះជាតិ បានជួបគ្នាចរចាបន្ត កាលពីថ្ងៃទី១៧ មីនា ឆ្នាំ១០១៤ ដែលបានឯកភាពគ្នាចំនួន ១៤ចំណុច រួមមាន ការរៀបចំចុះឈ្មោះបោះឆ្នោត និងបញ្ជីឈ្មោះអ្នកបោះឆ្នោត រៀបចំបង្កើតច្បាប់ស្ដីពីហិរញ្ញវត្ថុគណបក្សនយោបាយ កំណែទម្រង់ស្ថាប័នបោះឆ្នោត អព្យាក្រឹត្យភាពសុចរិតភាពរបស់សង្គមស៊ីវិល ប្រព័ន្ធផ្សព្វផ្សាយ និងមធ្យោបាយផ្សព្វផ្សាយរបស់គណបក្សនយោបាយយន្តការនៃការដោះស្រាយវិវាទ ការសង្កេតការណ៍បោះឆ្នោត អព្យាក្រឹត្យភាពនៃមន្ត្រីរាជការកងកម្លាំងប្រដាប់អាវុធ កាលបរិច្ឆេទនៃការបោះឆ្នោត បទបញ្ជា និងនីតិវិធីនៃការបោះឆ្នោត កែសម្រួល និងពង្រឹងទោសបញ្ញត្តិនៅក្នុងការបោះឆ្នោត ការឃោសនាបោះឆ្នោត ការបោះឆ្នោតមេភូមិ និងចំណុចចុងក្រោយ គឺការស្ទង់មតិ។
ទោះបីជាតំណាងគណបក្សនយោបាយបានឯកភាពគ្នាលើរបៀបវារៈចំនួន ១៤នេះក្ដី ក៏ប៉ុន្តែអ្នកវិភាគនយោបាយបានលើកឡើងថា របៀបវារៈទាំងនេះមិនបង្ហាញពីឆន្ទៈក្នុងការដោះស្រាយបញ្ចប់ជម្លោះនយោបាយទេ។ អ្នកវិភាគបានសង្កត់ធ្ងន់ថា ការជួបគ្នារវាងគណបក្សនយោបាយទាំងពីរនេះ ហាក់បីដូចជាការពន្យារពេលរឿងជាប់គាំងនយោបាយទៅវិញ។
អ្នកជំនាញផ្នែកវិទ្យាសាស្ត្រនយោបាយ លោកបណ្ឌិត សុខ ទូច មានប្រសាសន៍ថា ការយល់ព្រមគ្នាចំនួន ១៤ចំណុចនេះ គ្រាន់តែជារបៀបវារៈទេ ក៏ប៉ុន្តែលទ្ធផលយ៉ាងណាមិនទាន់ដឹងច្បាស់លាស់នៅឡើយ។ លោកបញ្ជាក់ថា គណបក្សទាំងពីរត្រូវជ្រើសរើសយករបៀបវារៈណាមួយមកជជែក មុននឹងជួបគ្នាចរចា។
«សំឡេង»
តំណាងគណៈកម្មការចម្រុះមកពីគណបក្សប្រជាជនកម្ពុជា លោក ប៊ិន ឈិន មានប្រសាសន៍ថា កិច្ចប្រជុំទាំងបីលើកកន្លងទៅ មិនបាននិយាយលម្អិតពីចំណុចនីមួយៗក្នុងប្រធានបទដែលបានព្រមព្រៀងគ្នាទាំង១៤ នោះទេ។ លោកបន្តថា ខ្លឹមសារលម្អិតលើចំណុចទាំងអស់នឹងត្រូវគណៈកម្មការកែទម្រង់ការបោះឆ្នោតនៃបក្សទាំងពីរ យកមកពិភាក្សា និងចងក្រងជាគោលនយោបាយក្របខ័ណ្ឌច្បាប់ បន្ទាប់ពីធ្វើសិក្ខាសាលាប្រមូលមតិយោបល់ពីភាគីពាក់ព័ន្ធរួចរាល់នោះ។ លោកបញ្ជាក់ថា នៅដំណាក់កាលចុងក្រោយ គឺថ្នាក់ដឹកនាំកំពូលនៃគណបក្សទាំងពីរជាអ្នកសម្រេចលើការកែទម្រង់ទាំងអស់នេះ។
«សំឡេង»
នៅក្នុងបរិបទនយោបាយជាប់គាំងបច្ចុប្បន្ននេះ អ្នកវិភាគសង្កត់ធ្ងន់ថា របៀបវារៈដែលសំខាន់ត្រូវដោះស្រាយមុនគេជាចាំបាច់នោះ គឺការជជែកគ្នាកែប្រែសមាសភាព គ.ជ.ប និងការជជែកគ្នារកដំណោះស្រាយការជាប់គាំងនយោបាយ ពីព្រោះថា ការជាប់គាំងនយោបាយនេះជារឿងសំខាន់ណាស់ ដែលធ្វើឲ្យប៉ះពាល់ដល់អ្នកវិនិយោគ និងប្រជាពលរដ្ឋទាំងមូល។
បន្ថែមពីលើបញ្ហានេះ លោកបណ្ឌិត សុខ ទូច បានអះអាងថា ការកែទម្រង់ស្ថាប័ន គ.ជ.ប ជារឿងសំខាន់ ព្រោះថា ស្ថាប័ន គ.ជ.ប ជាអ្នករៀបចំការបោះឆ្នោតហើយមានបញ្ហា យកបញ្ហានោះឲ្យស្ថាប័ន គ.ជ.ប ដោះស្រាយបញ្ហាដោយខ្លួនឯងបាននោះទេ ត្រូវបង្កើតយន្តការមួយដោយដាក់ឲ្យស្ថាប័នផ្សេងជាអ្នកដោះស្រាយបញ្ហាដោយតម្លាភាព។
«សំឡេង»
នៅក្នុងពេលកំពុងធ្វើទស្សនកិច្ចនៅប្រទេសអូស្ត្រាលី ប្រធានគណបក្សសង្គ្រោះជាតិ លោក សម រង្ស៊ី បានគំរាមឈប់ចរចាជាមួយភាគីគណបក្សប្រជាជនកម្ពុជា ជាលើកទី៣ ហើយសន្យាថា គណបក្សសង្គ្រោះជាតិ នឹងធ្វើមហាបាតុកម្មបន្ត ប្រសិនបើលោកនាយករដ្ឋមន្ត្រី ហ៊ុន សែន នៅតែមិនបង្ហាញឆន្ទៈស្មោះត្រង់ក្នុងការចរចា ដើម្បីបញ្ចប់ជម្លោះនយោបាយដែលបានជាប់គាំងអស់ជាងកន្លះឆ្នាំមកហើយនោះ។
លោក សម រង្ស៊ី បានផ្ដល់សម្ភាសដល់វិទ្យុអូស្ត្រាលី នៅព្រឹកថ្ងៃទី១៨ មីនា ថា បើសិនជាការចរចានៅសប្ដាហ៍ក្រោយគ្មានរកឃើញផលប្រយោជន៍ណាមួយទេ គណបក្សសង្គ្រោះជាតិ នឹងប្រកាសធ្វើមហាបាតុកម្ម និងប្រកាសប្រាប់ប្រជាពលរដ្ឋថា គណបក្សប្រជាជនកម្ពុជា គ្មានឆន្ទៈចរចាពិតប្រាកដ។
អ្នកឃ្លាំមើលផ្នែកអភិវឌ្ឍន៍សង្គម លោក កែម ឡី មានប្រសាសន៍ថា ការជជែកគ្នាលក្ខណៈបច្ចេកទេសរបស់គណបក្សទាំងពីរនេះ ត្រូវប្រើពេលយ៉ាងតិច១ឆ្នាំដែរ ហើយការជជែកគ្នាបែបនេះខាតពេលវេលា និងបង្ហាញពីយន្តការបញ្ចប់ជម្លោះនយោបាយពិតប្រាកដទេ។ លោក កែម ឡី បញ្ជាក់ថា យន្តការដោះស្រាយសំខាន់នោះ គឺថ្នាក់ដឹកនាំកំពូលជួបគ្នា និងដោះស្រាយបញ្ហាជាប់គាំងនយោបាយសិន បន្ទាប់មកបញ្ហាបច្ចេកទេសនេះ គណបក្សទាំងពីរត្រូវបង្កើតអនុគណៈកម្មការជំនាញនីមួយៗ ដើម្បីធ្វើកិច្ចការនេះ។
«សំឡេង»
ក្រុមអ្នកវិភាគបានពន្យល់ថា នៅក្នុងស្ថានភាពនយោបាយបច្ចុប្បន្ននេះ រដ្ឋាភិបាលត្រូវដោះស្រាយភាពជាប់គាំងនយោបាយនេះឲ្យបានឆាប់ ពីព្រោះថា សហគមន៍អន្តរជាតិនឹងមិនផ្ដល់ជំនួយឲ្យរដ្ឋាភិបាលទេ ខណៈជាប់គាំងនេះ។ ម្យ៉ាងទៀត អ្នកវិនិយោគក៏មិនចូលមកបណ្ដាក់ទុន ឬចូលមកបង្កើនទុនដែលមានស្រាប់ ក្នុងការវិនិយោគនៅកម្ពុជា ទេ ហើយបញ្ហាបែបនេះ អ្នកដែលប៉ះពាល់ គឺគណបក្សប្រជាជនកម្ពុជា ខ្លួនឯង ដែលទុកជំងឺជម្លោះរ៉ាំរ៉ៃនយោបាយរបស់ខ្លួននេះ។ លើសពីនេះទៀត មុខមាត់រដ្ឋាភិបាលត្រូវអាម៉ាស់កាន់តែខ្លាំងនៅលើឆាកអន្តរជាតិ ហើយកិច្ចការការទូតរបស់ខ្លួន ត្រូវធ្លាក់ចុះ និងការបាត់បង់ឱកាសក្នុងការទទួលឥទ្ធិពលល្អ ក្នុងការកែទម្រង់ការបោះឆ្នោតប្រកបដោយតម្លាភាព និងទាក់ទាញយកការគាំទ្រពីប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។